فنكش وملاك عيد الأم(اسكتش للاطفال)

[walaa farouk]

اسكتش: فنكش وملاك عيد الأم


الشخصيات: بابا- ماما- فنكش- الملاك

حاجات ممكن تحتاجها: لاب توب وسماعات- موبايل

فنكش: يا ماماااا! يا مامااااا اصحي بقى! كفاية كدة نوم!
)يجري رايح على أوضة ماما عشان يصحيها(
فنكش: اصحي بقى يا ماما! أنا عايز أفطر بقى!
)يظهر له ملاك(
الملاك: فنكش، سيب ماما نايمة دلوقتي
فنكش: إيه ده؟ انت مين أصلا؟ وانت مالك؟ مامتي وأنا حر فيها!
الملاك: حر فيها إزاي يعني؟! عامة، أنا ملاك عيد الأم
فنكش: ملاك عيد الأم؟!!! ده اللي هو إزاي يعني؟
أنا أسمع عن كارت عيد الأم،أغنية عيد الأم لكن ملاك عيد الأم؟! جديدة دي!
الملاك: أيوة يا فنكش، أنا ملاك عيد الأم وجيت لك عشان انت محتاج تعرف شوية حاجات عن ماما
فنكش: وانت بقى هاتعرف ماما أكتر مني؟! أنا عارف عنها كل حاجة!
الملاك: لأ صدقني مش كل حاجة،
عشان كده أنا وانت هانسيب ماما نايمة لغاية ما أقولك
على الحاجات دي كلها
فنكش: )بيكلم نفسه
( معقولة؟ معقولة في حاجات أنا معرفهاش عن ماما؟
)بيكلم الملاك( طيب قول يا عم! لما نشوف!
)ينزل فنكش والملاك من المسرح(

لبس العيد:

صوت الملاك: فاكر يا فنكش لبس العيد؟
)صوت موبايل بيرن، ماما وفنكش على المسرح(
فنكش: (بيجري على ماما( ماما، بابا بيكلمك
)يديها الموبايل ويجري على اللاب توب ويحط السماعات في ودانه(
ماما: طيب هات يا حبيبي )بتاخد الموبايل(
)بتتكلم في الموبايل( أيوة يا بابا ..... كويسين الحمدلله .......
اه هننزل نجيب لبس العيد لي ولفنكش دلوقتي، ما تيجي معانا؟ ...... )بحزن(إيه؟
الراجل لغى الشغل اللي كان طالبه منك؟! ليه كده بس ده الفلوس اللي كانت هتيجي كانت هتنفعنا قوي في العيد! ....... لأ ولا يهمك أنا هاتصرف.....متقلقش ...... باي، ربنا معاك
)بصوت فرحان عادي ( يا فنكش يلا عشان هنتأخر!
)تعلي صوتها عشان مش سامعها( يا فنكااااش!
فنكش: أيوة يا ماما، أنا جاي أهو! وأنا أقدر برضه أتأخر على لبس العيد؟ جايلك ياحبيبييييييي!
ماما: )بتضحك( ماشي يا عم! وعايز لبس العيد لونه إيه بقى؟
فنكش: ودي عايزة كلام يا ماما؟ طبعا أزرق في أحمر!
ماما: اشمعنى أزرق في أحمر يعني؟
فنكش: وده برضه سؤال عشان أبقى زي سبايدر مان طبعا!
وكمان عايز أجيب طاقية سبايدر مان عشان الشمس يعني وكده!
ماما: ماااااااشي يا فنكش
فنكش: وانتي يا ماما عايزة تجيبي لبس العيد بتاعك لونه إيه؟
ماما: (سرحانة شوية( هه؟ )بقلق
( لأ يا فنكش أنا كبرت على الحاجات دي خلاص
(بضحك( لبس عيد إيه بس؟ ده للأطفال الصغيرين بس!
)الملاك وفنكش على المسرح(
الملاك: شفت بقى يا فنكش؟
فنكش: ياااااااه! ده أنا مكنتش أعرف خالص! بقى ماما مجبتش لبس عيد ليها عشان تجيبلي أنا؟!
الملاك: شفت بقى إنك مش عارف كل حاجة؟
فنكش: لأ دي بصراحة مكنتش عارفها فعلا!
الملاك: لأ مش دي بس! فاكر آخر مرة عييت؟ لما كنت سخن قوي؟

لما فنكش كان عيان

)بابا وماما على المسرح(
بابا: أنا ملاحظ إنك مبسوطة كدة إنهاردة!
ماما: فاكر سارة وهبة صحابي من الكلية؟
بابا: أيوة طبعا دول كانوا أكتر اتنين صحابك! مالهم؟
ماما: (بفرح وحماس(أصل إحنا اتفقنا نتقابل إنهاردة عشان فرصة وانت قاعد مع فنكش ونخرج مع بعض، الأول هنركب مركب في النيل بعدين هانشتري شوية حاجات مع بعض زي زماااان وبعدين هناكل في حتة مع بعض!
بابا: يااااااه حلو قوي! ده انتي بقالك كتير قوي مخرجتيش!
ماما: اااه بجد مش قادرة أقولك مبسوطة قد إيه!
)فنكش يدخل وشكله تعبان(
فنكش: اااه يا ماما! راسي بتوجعني قوي!
ماما: (مخضوضة( إيه يا فنكش مالك؟ )بتشوفه سخن
ولا لأ( إيه ده؟ ده انت سخن قوي؟! طيب ادخل ياحبيبي نام على سريرك وأنا هاجيبلك الدوا حالاً!
)يمشي فنكش(
بابا: باقولك إيه؟ أنا هافضل معاه وانزلي إنتي مع صحباتك
ماما: لأ طبعاً انت بتقول إيه؟
بابا: صدقيني مش هايحصل حاجة، ما أنا هاكون معاه
ماما: لأ أنا أصلا مش هاعرف اتبسط وهافضل قلقانة عليه طول الوقت
)تتصل بالموبايل( ألو .... أيوة يا هبة؟ إزيك؟ ........
لأ أنا مش هاقدر آجي ... أصل فنكش سخن قوي ولازم أفضل معاه ..... ااه روحوا انتو وسلميلي
على سارة ..... وأنا كمان بجد كان نفسي أشوفكو قوي! باي
)الملاك وفنكش على المسرح(
الملاك: وطبعا انت عارف إنها قعدت معاك اليومين دول كلهم، واهتمت بيك وبمواعيد الدوا وقعدت تعملك كمادات ....
فنكش: أيوه طبعا! وعمري ما حسيت إنها مضايقة أو أي حاجة! ده أنا طلعت مش عارف حاجة خالص!
الملاك: شفت بقى يا فنكش؟ ده أنا كمان عايز أحكيلك على ....
)يسكت لما يسمع صوت حركة باب(
)صوت حركة باب(
الملاك: ايه ده؟ دي ماما شكلها صحيت طيب أنا هامشي دلوقتي عشان مش عايزها تشوفني
فنكش: يعني ملاك ومش بيطير؟ ده انت حالتك صعبة خالص!
الملاك: وده وقته! أنا ماشي باي! )يمشي الملاك(
ماما: فنكاااش انت فين؟
فنكش: أنا هنا أهو يا ماما
ماما: إيه يا حبيبي، ليه سبتني نايمة كل ده؟
فنكش: أصل انتي من حقك ترتاحي شوية!
ماما: طيب ومين يعملك الفطار لما أنا أنام كل ده؟
فنكش: لأ مش مشكلة الفطار عادي، مش عايزة أعملك حاجة؟
ماما: لأ شكرا يا سي فنكش!
فنكش: طيب أنزل أجيب عيش طيب؟ أي حاجة؟
ماما: لاااا ده انت إنهاردة فيك حاجة غريبة!
فنكش: أصل انتي بتتعبي عشاني كتير قوي يا ماما!