|
 |
 |
 |
|
رقم المشاركة : ( 1 )
22 - 10 - 2020, 10:21 AM
|
|||||||||||
|
|||||||||||
 افْرَحُوا لِكَيْ تَفْرَحُوا فيه اية بتقول ، افْرَحُوا لِكَيْ تَفْرَحُوا فِي اسْتِعْلاَنِ مَجْدِهِ أَيْضًا مُبْتَهِجِينَ." (1 بط 4: 13) في الحقيقة ببقي مش قادر ابلع اي وصية فيها مشاعر .. افرحوا.. احبوا.. اغفروا.. و كنت اسأل نفسي بغيظ هو يعنى حدوس على زرار افرح و زرار احب..؟ في الحقيقة الحكاية مش كده.. لما بيوصي الكتاب في حاجة تخص المشاعر بيبقي قاصد فعل.. عمل يعنى.. فمثلا احبوا اعداؤكم.. مش feeling.. لان فلان ده رخم 😂😂 مش عارف احبه و فلان ده بيعادينى و يكرهنى ححبه ازاى ؟! هنا وصية الحب يعنى عمل حب .. مصدره بحب ربنا اوى و طالما عمل الحب للآخر بيفرحه اعمله علشان خاطره.. علشان كده عطى مثل و قال ان جاع عدوك أطعمه و ان عطش اسقه.. هنا بولس الرسول مش بيؤمر بأننا نفرح.. بمعنى الفرح الشعور اللى بيجى و بيروح .. لكن القصد عزوا نفسكم.. و افرحوا مش بالالم و الا نبقي مرضي لان اصل الآية "بَلْ كَمَا اشْتَرَكْتُمْ فِي آلاَمِ الْمَسِيحِ، افْرَحُوا لِكَيْ تَفْرَحُوا فِي اسْتِعْلاَنِ مَجْدِهِ أَيْضًا مُبْتَهِجِينَ." (1 بط 4: 13) يعنى فيه شركة ألم .. بس حاسب.. هنا نوع الألم او سببه لازم يكون على شكل ألم المسيح او من نوعه.. لانى ممكن اتألم لانى انا وحش ممكن الناس تتجنبنى و تهملنى لان لسانى طويل.. لانى خاين.. لانى ظالم.. ده مش ألم بتاع المسيح ده.. لكن فيه ألم لانى منسوب للمسيح لانى متمسك بتعليمه.. ممكن يتأخر جوازك لأنك مش مفتحة بلغة العالم و محتشمة في لبسك مالكيش في القصير و العريان و المفتوح و المياصة او مالكش في لغة العالم و طريقته و لا بتاع سيجارة حشيش و لا كأس و النحنحة للبنات 😊😊..ممكن تتألم لأنك نمكى و امين في شغلك و مالكش في العوج و لا التملق فتتاخر ترقيتك او ديما بتتعرض لمشاكل.. يوسف الصديق اتألم من أجل المسيح.. لكن يعقوب اتألم لتماكره... هنا بولس بيقول اوع تزعل و لا تتضايق و لا تندب الايام اللى مشيت فيها في سكة ربنا.. لو عملت كده كانك في الحقيقة مقهور و متغصب.. و ربنا مش بيحب حد يجى له متغصب.. الناس فاهمة التغصب غلط.. الناس فاكرة اقوم اصلى بالغصب و اقرا الكتاب حتى لو بقراه سد خانة من غير تركيز و فاكرين انه التغصب هنا حينفع.. . لا... التغصب معناه انا بحبه جدا و نفسي ابقي معاه بس جسدى مش مطاوعنى او وقتى ديما مشغول فابدأ اتغصب و اروض جسدى و ادربه بس مش و انا متكدر.. اكيد كاب مش حبقي مبسوط و مراتى بتجر سارة بنتى من قفاها علشان تقولى صباح الخير..😔😔 لكن حفرح لما الاقي بنتى نايمة على الكنبة مستنية رجوعي حتى لو قافلة عين و فاتحة عين من النعس بس بتحاول تصحى علشان تحضنى.. بولس الرسول يقول افرحوا.. يعنى اتعزوا و افرحوا لان لو المكم بسبب المسيح اكيد حتفرحوا في استعلان مجده .. و خد بالك افرحو لكى تفرحوا.. يعنى تفرحوا التانية دى فيها شرطية انى افرح بالأولى.. علشان كده خد بالك فيه اية قالت لا خائفون يرثون ملكوت السموات.. ربنا مش قهار و لا عاوز نروحله بالغصب.. لو القصة كلها خوف تبقي الحكاية مش ولابد.. أبدية ايه اللى قايمة على الرعب و الواحد داخل يترعش منه .. يعنى بصحى الصبح اصلى لانى خايف يعاقبنى.. بالذمة دى علاقة ربنا يعوزها ؟! طبعا لا.. ربنا بتاع حرية مجد.. تفتح يدخل و يتعشى معاك.. ترفض.. حبيبي تحول و عبر عنى.. و انا الخسران.. طريق المسيح للتمتع حتى لو فيه ألم شرط انه يكون لأننا تبعه مختومين بختمه.. التمتع وسط الألم ييجى مش من الألم نفسه طبعا لكن من اختبار معيته في حياتنا لان وسط الألم عندنا وعد بسنده.. فيه اتون النار.. اه.. بس فيه رابع شبيه بابن الالهة حاجة تفرح .. فيه جب اسود.. اه.. بس فيه ملاك يسد افواهها.. حاجة تفرح .. فيه سجن ظلم.... اه.. . بس فيه يوسف بقى الرجل الثانى في مصر.. ، افْرَحُوا لِكَيْ تَفْرَحُوا 
|
|
| قد تكون مهتم بالمواضيع التالية ايضاً |
| الموضوع |
| (في 4: 4) وَأَقُولُ أَيْضًا افْرَحُوا |
| افْرَحُوا كُلَّ حِينٍ |
| افْرَحُوا كُلَّ حِينٍ |
| افْرَحُوا وَتَهَلَّلُوا |
| "افْرَحُوا فِي الرَّبِّ كُلَّ حِينٍ، وَأَقُولُ أَيْضًا: افْرَحُوا" |
العرض الشجري