لكل يوم زوّادة: عيد القديسة مونيكا : 27 / 8 / 2020 /

[souad jaalouk]

لكل يوم زوّادة: عيد القديسة مونيكا
اليوم 27 آب هوّي عيد القدّيسة مونيكا. يمكن كتار بيعرفو ابنها و بيردّدو اقوالو بدون ما يعرفو انّو هيّي اللي وصّلتو للقداسة! القدّيسة مونيكا هيي إمّو للقدّيس اوغسطينوس اللي حتّى بالقداسة ما بعَّد عن امّو كتير و هوّي عيدو بكرا!
القدّيسة مونيكا، مشهورة انّو بيصلّولها الأمّهات عا نيّة ولادن متل ما هيّي بصلاتها حقّقت توبة ابنها و صار قدّيس! هالأمّ اللي ما تعبت و لا زهقت من الصلا، هيّي ما صلّت اليوم و تحقّق اللي طلَبِتو بكرا! صلّت و صلّت و صلّت بكل ايمان هيّي و اكيدة انّو عند ربنا ما في مستحيل و انّو هوّي بيعرف ايمتى يستجيب، و كانت فاهمة كتير منيح انّو توقيت السما ما بيشبه توقيت الأرض! كتير اشيا منتعلّمها من هالقدّيسة، و منطلب منها اليوم تصلّي مع كل الأمهات بالعالم خصوصا بلبنان في امّهات محروق قلبن عا ولادن و في امّهات خايفين عا ولادن من كل شي! صلّي معن يا قدّيسة مونيكا و تشفّعيلن...الله معكن