تاملات كتابية بالعامية (3 تجارب....انتصر)

[walaa farouk]

انجيل متى
الاصحاح الرابع

1-التجربه على الجبل: مت4 : 1-،10

يسوع بعد المعموديه والصوم الروح دخله الى البريه وجه ابليس يجربه.
زى اى انسان مسيحى يقبل ويؤمن بالسيد المسيح فيتعمد ويدى ضهره للخطايا ويبدا حياه البر بالانسان الجديد... لكن يجى وقت اختبار الايمان بالتجارب..
والتجارب 3 انواع كبار ل 3 حاجات كبار موجودين فى العالم
"لأَنَّ كُلَّ مَا فِي الْعَالَمِ: شَهْوَةَ الْجَسَدِ، وَشَهْوَةَ الْعُيُونِ، وَتَعَظُّمَ الْمَعِيشَةِ، لَيْسَ مِنَ الآبِ بَلْ مِنَ الْعَالَمِ" 1يو2: 16
اخونا البكر يسوع مش بس جى لتنفيذ الخلاص بالصليب ويوهبنا بره بالفداء.. هو كمان جى يورينا نكسب الحرب ازاى قصاد ابليس..

*الحرب/التجربه الاولى* حروب شهوات الجسد

كل متطلبات الجسد من راحه شهوات جنس نهم اكل.... كل حاجه الجسد بيصرخ يطلبها عشان يشبع..وانتصار الحرب ديه بالمكتوب "ليس بالخبز وحده يحيا الانسان بل بكل كلمه تخرج من فم الله" الشبع من كلام الله مش من اى اشباع جسدى.. لو مشبعتش من الكلمه مفيش حاجه هتشبعك.. حتى لو شربت الاثم كالماء هتفضل عطشان لحاجه!! الحاجه ديه هى الشبع بربنا..

** الحرب/التجربه الثانيه* حروب تعظم المعيشه(الفشخره)

الذات عايزه اكل عايزه اشباع بالمجد والكرامه وسط الناس عايزه تحس بالتميز..انا مش زى اى حد انا احسن من اى حد.. جه يحارب يسوع ويقوله ارمى نفسك والملائكه تمسكك والناس تسقف والشعب يهلل واسمك يعلى ويعلى ... تصير مثل الله عارف فاهم متميز.. رد يسوع بالمكتوب لا تجرب الرب الهك.. مش هجربه عشان اكسب كرامه مش عايز اعلى كرسيا على كرسي الله مش عايز اتفشخر ولا اتميز بحاجات هتروح هتروح مسيرها بخار... عايز افتخر بحاجه واحده بس عمرها ما هتروح "وَأَمَّا: «مَنِ افْتَخَرَ فَلْيَفْتَخِرْ بِالرَّبِّ»".2كو 10: 16 "وَأَمَّا مِنْ جِهَتِي، فَحَاشَا لِي أَنْأَفْتَخِرَ إِلاَّ بِصَلِيبِ رَبِّنَا يَسُوعَ الْمَسِيحِ، الَّذِي بِهِ قَدْ صُلِبَ الْعَالَمُ لِي وَأَنَا لِلْعَالَم"ِ.غل6 : 14 ديه الحاجه اللى افتخر واتفشخر بيها محبه يسوع ليا ودمه اللى انسفك عشانى وعشان خلاصى .. امشى رافع راسي بصحيح وانا مدفوع فيا دم ثمنه غالى دم يسوع المسيح ابن الله

*الحرب/التجربه التالته : شهوه العيون : الامتلاك

مش غريب ان الحرب دى تبتدى بكلمه اعطيك هذه كلها ان سجدت لى.. الطفل من صغره اول كلماته بتاعتى..شهوه الامتلاك بكل انواعها من اول لعبه الطفل لملايين الفلوس والعقارات.. كلمه "عندى".. يسوع رد كالعاده بالمكتوب " اذهب يا شيطان لانه مكتوب للرب الهك تسجد واياه **وحده** تعبد" كلمه السر هى وحده يسوع وحده هو بس اللى يستاهل العباده والتبعيه.. كل حاجه ابليس هيديها هيطلب عباده ليها سجود ليها تحافظ عليها وتقاتل عليها.. هتبقى شريكه لربنا فى عبادته.. مكتوب لا تقدر ان تخدم سيدين الله او المال ومكتوب عن المال الطمع الذى هو عباده الاوثان كو3: 5

3 حروب و 3 ردود بس انا بس اللى هقرر هرد زى المسيح رد ولا هيضحك عليا بكذب ابليس!!
ادينا معونه يارب وقت الايمان ما يختبر.امين