سَيَجْعَلُ مَعَ التَّجْرِبَةِ أَيْضًا الْمَنْفَذَ

[walaa farouk]

معلش يارب كده من غير مقدمات..
انا دلوقتى لا نافع معايا استنى و لا اصبر و لا كلمات تطمين ،“ لا تخف ايها القطيع الصغير“ و “ لا تضطرب قلوبكم و لا تجزع“... او ان امنت ِترين مجد الله.. و لا طوبى للذين آمنوا و لم يروا.. حاليا كل ده مش نافع معايا من غير ما أجمل الكلام
انا دلوقتى عاوز لمسة قوية.. تدخل واضح كده من غير تأويل.. انا دلوقتى بتاع علامة العهد.. جزة صوف جدعون.. عين جيحزى اللى لازم تنفتح علشان تشوف ان اللى معانا اكتر من اللى علينا... انا دلوقتى بتاع " فحلَّ عليه روح الرب فشقه كشق الجدي وليس في يده شيء" (قض 14: 5، 6) ايوة انا مش في ايدى شىء و مش حينفع كلامك اللى بتطمن بيه ولادك معايا دلوقتى .. دول مؤمنين عايشينك مصدقينك.. انا أضعف... وَكَانُوا يَمْتَلِئُونَ مَاءً وَصَارُوا فِي خَطَرٍ فمعلش سورى مش وقت نوم خالص او تخلى.. دى نؤ عظيم" وَفِيمَا هُمْ سَائِرُونَ نَامَ. فَنَزَلَ نَوْءُ رِيحٍ فِي الْبُحَيْرَةِ،." ااستيقظ يارب و اهتم بنفسي واحبائى الانهلك
"اسْتَيْقِظْ وَانْتَبِهْ إِلَى حُكْمِي، يَا إِلهِي وَسَيِّدِي إِلَى دَعْوَايَ." (مز 35: 23)
الوقت ده مش وقت اختبار ايمانى لأنك حتلاقي قلب مضطرب و نفس موجوعة و ضعف كده ما ينفعش معاه الا انك تتدخل بقوة و تستعلن ذراعك ايها السيد و ان تتقلد سيفك ايها الجبار..
فَقَامَ وَانْتَهَرَ الرِّيحَ وَتَمَوُّجَ الْمَاءِ، فَانْتَهَيَا وَصَارَ هُدُوُّ
معلش... اصنع لعبدك رحمة و بعدين عاتبنى ،لومنى و قولى كل الكلام اللى مزعلك منى.. قولى يا قليل الإيمان لماذا شككت.. قولى لا تلمسينى.. بس مش حينفع تسيب ابن الأرملة يمر بنعشه من غير ما تستوقفه .. حيندفن.. ما فيش كعكة ده ياحلاله ملء كف الايد دقيق في الكوار و قليل من الزيت في الكوز و عودين قش.. و انت عارف آخرهم نعملهم و نموت.. دلوقتى وقت إِنَّ كُوَّارَ الدَّقِيقِ لاَ يَفْرُغُ، وَكُوزَ الزَّيْتِ لاَ يَنْقُصُ، إِلَى الْيَوْمِ الَّذِي فِيهِ يُعْطِي الرَّبُّ مَطَرًا عَلَى وَجْهِ الأَرْضِ..
معلش اتكلمت كده بعشم و من غير مقدمات و لا استحقاق اصلا و لا حتى الواحد يقدر يرفع عينه قدامك بس أصلها يا سيد الرب يسوع مالهاش حلول غير تدخل واضح و يستعلن فيه خلاصك.. ده وقت المنفذ علشان نقدر نتحمل
بَلْ سَيَجْعَلُ مَعَ التَّجْرِبَةِ أَيْضًا الْمَنْفَذَ، لِتَسْتَطِيعُوا أَنْ تَحْتَمِلُوا." (1 كو 10: 13)..