صدقت نفسك ؟؟

[walaa farouk]

صدقت نفسك ؟؟
صدقتها لما فجأة لقيت نفسك كبير
، و انت اصغر قوي من اللي انت فيه؟؟

كبرت علي الناس و عليت عليهم و اللي عِلي عِلي ..

لما كنت في الضل و الخفا كنت وديع و هادي و صوتك واطي
و متواضع القلب و الفكر.. تسلم علي الكل و تحترم الصغير قبل الكبير
، تقف للكل و تبتسم بفرح .. كنت بتراضي الجميع و كانت مشاعر الكل غالية عليك ..

و بعد ما عليت و كبرت، و زغلل عينك المنصب
و العز و الفلوس و السلطة، اتغيرت ..

و نسيت..
نسيت أن ربنا هو اللي اداك اللي انت فيه مش شطارتك
و لا ذكائك و لا قوتك..

و نسيت برضه ان المكانة دي ربنا اداها لك علشان تساعد الصغير
و الكبير و تريح نفس التعبان و المكسور ..

لكنك اتعاليت علي الناس ، و ظهرت علي حقيقتك
، شعث و غضوب و متجبر و متحجر..
سبت اللي بينافقك يقربلك و اللي بيحبك طفش من عنفك و لسانك و مرارة معاملتك..

قربت منك المنافقين و حبيت المديح المزيف
اكتر من النصيحة المخلصة و بعدت عنك اصحابك اللي بيحبوك
؛ و حبيت الفلوس اكتر من العطاء ، و قربت من الاغنياء و طفشت منك الغلابة المحتاجين اللي قصدوك و طلبوك ..

يمكن عرفت تضحك علي الناس ، لكن تفتكر اللي بتعمله فات علي ربنا ، مهما كنت بتمثل التقوي و الفضيلة ..

و نسيت برضه ان بعد كام يوم طالوا أو قصروا
كل اللي انت فيه ح يخلص ، و العز و الجاه و الفخفخة ح يروح ،
و ح تبان علي حقيقتك ..

لكن لسه ليك فرصة ..

فرصة لو سمعت صوت الحق اللي بيصرخ جواك انك تفوق من غفلتك ..

و صدقني ساعتها كل اللي عملته ح يتنسي من الله و من الناس ، و ح تكبر قوي في عينيهم، و تستحق بركة ربنا ..

و يا بخت اللي يعرف أن المكانة اللي ربنا بيديهاله علشان يسعد الناس مش يتجبر عليهم و يتعبهم ..

رسالة تانية لكل اعمي البصر و البصيرة ..

د.مجدي إسحق