اجدع صحاب الدنيا

[walaa farouk]

= بس أنا مش عارفة أعملها بالطريقة دي و لا دي!؟
- أنا بقول لو عملتيها كدا هتبقي أحلي
= ماشي، شكرًا
* بعملها ذي ما أقترح عليا و بتطلع أحلي فعلًا*
_________

- أروح بكره المشوار و لا ماروحش
= بلاش ماتروحيش
- بس أنا نفسي أروح
= هيبقي أحسن لو ماروحتيش
* بصحي قافلة من المشوار و قلبي مقبوض و بخاف أروح و بيطلع فـ مصلحتي فعلًا*
_________

= بُص بتكلمني إزاي!
- ماتزعليش
= دانا وقفت معاها كتير!
- و هتقفي معاها تاني
= لو جات تكلمني مش هكلمها
- هتكلميها عشان هتسامحيها وهي بتحبك
* بتيجي صاحبتي تصالحني و تكلمني و بسامحها فعلًا*
_________

= شايف حصل فيا إيه!
- حقك عندي
= أنا زعلانة صالحني بجد
- حاضر
*بتحصل حاجة فـ نفس الوقت بتجبر بخاطري و بحس إنه رد عليا و صالحني*
___________

= شوفت! هو اللي مزعلني و بيقفل فـ وشي
- ماتزعليش منه دا بيحبك
= خليه يجي يكلمني و يصالحني
- هجيبه لحد عندك
= ع فكره لو جه و لا هعبره ومش هكلمه
- هديكي طاقة تقبليه عشان تكملوا، عشان أنا عايزكم تكملوا
*بيجي يعتذرلي فعلًا و يكلمني و بتفاجئ من رد فعلي و إني قبلت و سامحت*
_________

= أنا تعبت
- طريق النجاح مش بالساهل
= كل اللي عملته بفشل فيه
- التجارب الفاشلة الكتيرة بيجي وراها نجاح عظيم
= خليني أنجح فـ حاجة واحده طيب تحسسني إن فيا أمل و إني ماشية فـ الطريق الصح
- حاضر
* بينجحني فـ خطوة جديدة و بيديني حماس إني أكمل و بيثبتلي إني ماشية فـ الطريق الصح*
__________

= أروح إنترڤيو الشغل و لا لأ
- روحي
= ممكن ماقبلش
- بس روحي
= أنا روحت و ماقبلتش ودتني ليه
- لصالحك
* بيجيني شُغل جديد أحسن من الأول؛ عن طريق حد أتعرفت عليه فـ الأنترڤيو اللي أترفضت فيه*
___________

=نفسي أرتبط و أتجوز زي كل الناس
- هبعتلك
= أنا قولت عريس مش شُغل
- أقبلي الشُغل
= ماكنتش عايزاه طيب، أنا كُنت عايزة أرتبط و أتجوز
-هيحصل
*بتعرف ع شخص مناسب فـ الشُغل اللي ماكنش عاجبني، و بيكون هو دا نصيبي اللي جه عن طريق الشُغل*
___________

= دلوقت، صاحبتي غلطت فيا، أسامحها و أكلمها و لا ماكلمهاش
-ماتكلميهاش
= ليه أنا بحبها و ممكن أسامحها عادي
-ماتكلميهاش
= إزاي بتقول كدا مش المفروض نسامح الناس و نحبهم
- اللي بيساعدوكي تكوني كويسة مش اللي معرفتك بيهم هتأذيكي
= بس هي بتحبني يعني مش هتأذيني
- ماتكلميهاش تاني
*بكتشف إنها كانت هتأذيني فعلًا و إني الحمد لله إني بعدت عنها*
__________

= خليني أوصل بدري مش عايزة أتأخر فـ المواصلات عشان الشُغل
- هتتأخري معلش
= عايزة أروح قبل ما يتشطب عليا
- هتتأخري فـ المواصلات و هترجعي و هتغيبي مش هتروحي
= هو أنا مش طلبت إنك تسهل الدنيا و ألحق! ممكن أعرف ماساعدتنيش ليه! أديني مالحقتش و هغيب
- هتفهمي بعدين
* زعلت إني غيبت اليوم بس لو كُنت روحت كانت هتحصل مشاكل أكبر من التأخير، الحمد لله إني المرور وقف و إني ماروحتش*
__________

= ليه أدبلر سنة تاني، كان نفسي أنجح و أتخرج
- هديكي حاجة أحسن من التخرج
= كان نفسي أتخرج و أفرح زي صحابي
- هتفرحي زيهم و أكتر بس فرحتك هتتأخر سنة
*بتخرج متأخرة بسنة عن دُفعتي و يشاء القدر
بإن شركة كبيرة تُطلب تخصصي بشرط يكونوا خريجين السنة اللي أتخرجت فيها مش اللي قبلها زي صُحابي*
__________

=نقلوني لمكان بعيد
- فيه حد محتاجلك هناك
=لأ أنا هقدم رفض للنقل و هرجع مكاني
- النقل هيترفض عشان فيه حد محتاجك تروحي تساعديه هناك
* النقل بيترفض و بروح الشغل البعيد مغصوبة
و بكتشف إني قدرت أساعد ناس كتير كانوا محتاجيني معاهم،
و قالولي إنهم كانوا مستنين حد زيي من زمان*
__________

=و لما أنا هفسخ الخطوبة خلتني ليه أتخطبت
- عشان كان لازم يحصل كدا
= ليه أقابله أصلًا مادام مش هنكمل سوا!
- كان لازم يحصل كدا و هتعرفي ليه لما تتخطبي تاني
*الخطوبة الأولانية عرفتني إيه الحاجات اللي محتاجة ألاقيها فـ شريكي
و إيه يناسب شخصيتي، ودا كان سبب رئيسي فـ نجاحي فـ إختيار خطيبي التاني*
______________

= ماكنتش فاكرة إن الحياه هتبقي كدا!!
- بـ معني ؟!
= ماكنتش فاكرة إني لما أدخلك فـ كل تفاصيل حياتي و أتكلم معاك فيها، الدنيا هتبقي حلوة كدا
- حلوة إزاي
= كُنت بضيع وقت و أقعد أفكر لوحدي أو مع صحابي و فـ الآخر كُنت ببقي محتارة بردو
- و دلوقتي!
=ماباخدش رأي حد غيرك، مابتكلمش غير مع حد غيرك، الحياه ليها طعم مُختلف
- إزاي؟!
=دايمًا رأيك صح، لما بسمع كلامك فـ حاجة بتبقي الأفضل، الحاجة اللي باخد رأيك فيها بتنجح، عُمري ما كلمتك ومالاقتكش مش موجود، حتي لو ساكت، حُضنك بيكون مفتوح، بتديني دايمًا أي شعور محتاجاه، حتي لو مضايقة و غلطانة و مافيش بينا كلام برجع من عندك مطمنة
- ولما بسكُت و مابقولش رأيي فـ نفس وقت سؤالك؟!
=بزعل فـ وقتها و بفضل ألح عليك بسؤال ليه
لكن بعدها بتقولي بس بعدها بفترة؛ بتكشفلي ليه كان كل دا، و بكتشف إنك كُنت صح فمش بزعل
- المهم تكوني مبسوطة!
= اللي يجرب حلاوة العشرة معاك بيوصل لمرحلة من الاستكفاء و الراحة حلوة أوي
= أقولك حاجة كمان!؟
- سامعك
=أنت أجدع صُحاب الدنيا، نفسي كُل الناس تجرب حلاوة العشرة معاك
= أقولك حاجة كمان!
- سامعك بردو
= أنا بحبك

أجدع_صُحاب_الدنيا