مش كل من مد لك ايده بيساعدك

[walaa farouk]

صورة معروفة اكيد شفناها لواحد بيسكب ماء مغلي في المحيط علشان "
قال ايه!" يدفي واحد بيغرق، بدل ما يرمي له طوق نجاة ..

و فيه كده للاسف الشديد ناس من براها تبين أنها عاوزة تساعدك ،
لكن من جواها بتتلذذ بوجعك ..

ناس يمكن ليها عذرها لانها اتوجعت و اتهجرت من اقرب الناس ،
فقررت تتشفي و تنتقم من اللي بييجي في سكتها ..

الدرس هنا مهم جدا و قاسي جدا .. طبعا فيه ناس كويسة قوي و ربنا بيبعتها لك من ايده ..
بس خللي بالك قوي من اللي شكله بيحبك و هو بيورطك أو بيوحلك بدل ما يسندك ..
مش كل يد تتمد لك تاخدها بسرعة بحسن نية أو بطيبة قلب ..

افتكر أن يعقوب ضحك علي اخوه عيسو و هو بيقدم له طبق عدس علشان يشتري منه البكورية
..و افتكر ان اخيتوفل اللي كان بيقدم المشورة لداود هو اللي خانه و باع اسراره لابنه ابشالوم ..
افتكر برضه أن يهوذا خان السيد المسيح و حضنه و قبله و هو بيسلمه لليهود ..

مش دعوة للشك في الناس ، بس دعوة الحكمة
و التروي في انك ترمي قلبك و عقلك و ثقتك و أسرارك لكل من هب و دب ..

مش كل من قال بيحبك فعلا بيحبك.. و مش كل اللي بيقدم لك ايده عاوز ينقذك، ده ممكن يغرقك ..

و ربنا يرشدك للي بيحبوك ، و ينجيك من فخ اللي عاملين بيحبوك ..