ترتيب مواعيد النوم فى الدراسة

[توتا كمال]

الناس اللي بتصحي أولادهم 6 الصبح عشان يروحوا المدرسة وتسهرهم لحد 1 صباحا يحلوا الواجب
الوقت المناسب لنوم الأطفال يوميا حسب الأكاديمية الأمريكية لطب النوم:
- الأطفال من 4 شهور ل 12 شهر: 12 - 16 ساعة نوم
- الأطفال من سن عام لعامين: 11 - 14 ساعة نوم
- الأطفال من 3 سنوات ل 5 سنوات: 10 - 13 ساعة نوم
- الأطفال من 6 سنوات ل 12 سنة: 9 - 12 ساعة نوم
- المراهقون من سن 13 - 18 سنة: من 8 - 10 ساعات نوم

* النوم في السن ده مش رفاهية، ومش كسل، ده وسيلة للحفاظ على الصحة النفسية والعقلية والجسدية للطفل، ومساعد للنمو السليم والصحيح ..
* السهر وتأخير وقت نوم الطفل عن الساعة 9 م جريمة بترتكبها في حق ابنك .. فيه دراسة حددت العلاقة بين النوم المتأخر للأطفال وإصابتهم بالسمنة المفرطة في المراهقة، وذكرت إن فيه علاقة وثيقة بين السمنة وبين إن الطفل يبقى معاد نومه من الساعة 9 م أو متأخر عن كده، وإن الأطفال اللي بيناموا الساعة 8م أو بدري عن كده بتقل فيهم نسبة السمنة، وبالتالي الإصابة بالأمراض المصاحبة لها ..
* التعليم المصري في المرتبة القبل الأخيرة في تصنيف التعليم في دول العالم، فمتجيش على صحة ابنك عشان يحفظ معلومة إن مصر عندها مناجم فوسفات في أبو طرطور ، هيتخرج ولا عمره هيستفيد بالمعلومة ديه في شيء ..
* فيه حاجة اسمها الجودة في الكيف وليس في الكم ..
الطفل ممكن يذاكر عدد ساعات قليلة مع مراعاة إنه ينام بدري وينام بصورة كويسة ومريحة هتخليه يحصل أكتر وأفضل من الطفل اللي بينام 6 ساعات وبيصحى بدري وبيروح المدرسة مش شايف قدامه، وهتكون النتيجة إنه هيعاني من صعوبات التعلم سواء حاليا أو بعد كده لما يكبر ..