مفيش نور والكارت مش في مكانه

[walaa farouk]

الكارت ده موجود في معظم الفنادق ..
ووظيفته انك بتفتح بيه باب الغرفة بتاعتك
وكمان بتحطه في مكانه جوة فبيشغلك الكهربا ..
فضلت انا واصدقائي يومين ورا بعض مخدوعين
ومش واخدين بالنا .. بنخرج كل يوم الصبح
وبنسيب موبايلاتنا تشحن في الاوضة
وناخد الكارت معانا علشان نرجع نفتح بيه ..
وبنرجع علشان نسحب موبايلاتنا ظنا انها بقت مشحونة ١٠٠ % .
. لكن كل مرة نفاجأ ان الموبايلات
رغم كل الساعات دي في الكهربا ماشحنتش وزي ما هي .
. ونشكي ان الكهربا هنا في المكان ضعيفة جدا ..
لحد ما صديق معانا قال "ايه ده ..
احنا اغبياء اوي .. الموبايلات ازاي هتشحن
واحنا المفتاح اللي بيشغل الكهربا معانا برة ..
اكيد الكهربا عمرها ما هتشتغل "
وهنا قعدنا نضحك علي نفسنا واستغربنا نفسنا جدا
ازاي كنا ناسيين ومش واخدين بالنا من ده .

وهنا فكرت في نفس الفكرة عمليا وروحيا
اوقات في خدمتنا وفي حياتنا بكامل جوانبها
بنعمل كل اللي علينا واكتر .. ونسأل نفسنا "ليه مفيش ثمر"
.. "ليه حياتنا مش بتتغير" "ليه حياة الناس مش بتتغير"
.. وبنجاوب نفسنا غلط بكلمة "يلا .. ربنا مش رايد" ..
زي ما كنا بنجاوب نفسنا غلط بجملة "اكيد العيب من الكهربا" .
. وللاسف الحقيقة هتفضل حقيقة ان مفيش نور
طالما الكارت (قلبك) مش واصل بمصدر النور الحقيقة
.. مفيش ثمر طول ما الشجرة مش عند النهر
والجذور مش بيوصلها مياه ..
ممكن نعمل كل المحاولات والمجهود اللي في الدنيا
ويكون بلا اي نتيجة حقيقية .. ويبقي حالنا كما هو عليه !

لو الشجرة محتاجة ثمر فلازم تتوصل بالمياه ..
ولو حياتنا محتاجة نور فلازم تتوصل بمصدر النور .

سامحنا يا ابي السماوي يا ابي الانوار
ومصدر كل نور علي كل محاولاتنا ومجهوداتنا
دون ان نفكر اولا في ان تكون قلوبنا متصلة بك جيدا
وعندها سننير ونثمر تلقائيا .