|
 |
 |
 |
|
رقم المشاركة : ( 1 )
03 - 06 - 2019, 10:16 PM
|
|||||||||||
|
|||||||||||
 " انتى عمرك ماهتحبى ولا تتحبى " كان عندى ١٥ سنه يوم ماسمعتها من واحده صاحبتي اه كنا اطفال وقتها بس الجمله اتحفرت فيا ... = يارب نفسى احب زيهم يارب كلهم بيحبوا الا انا تفتكر ممكن يكون شكلى السبب في دا ! مش حلوه كفايه أن حد يعجب بيا ! - مش وقته يابنتي ، انتى اصغر من كدا = أه انا شكلى وحش كل الولاد بتعجب بصحابى وماحدش اعجب بيا انا عارفه - ياحبيبتي انا مش عاوزك تجربي زيهم ف سنك دا اصبرى ع نفسك شويه = ماكنش ينفع تخلقنى احلى شويه عشان حد يعجب بيا ! - انتى مش سمعانى ليه ! المشكله مش ف شكلك المشكله ف سنك ! = عاوزه احب يارب ، ابعتلى حد يحبنى ______ = شكرا بجد مش عارفه اقولك ايه دعتلك ف نفس المكان من سنه انى احب والنهارده فيه واحد اعترفلي بحبه - واحد ايه ! انا مابعتش حد لا دا مش منى لا ماتحبيهوش = انت مش متخيل حلو ازاى ، انا كان نفسى احب وهحبه هو اخير حد اعجب بيا يارب - لا دا مش تبعى مش انا اللى بعته ليكى لا انتى لسه صغيره بلاش تحبيه ، انا مش مستأمنه عليكى ، حاولى تسمعينى المرادى = شكرا حقيقي انك استجبت لصلاتى _______ = عاوز يتسلى طلع مابيحبنيش بجد ! - انا قولتلك أنه مش منى لكن صوتى ماكنش وصلك ! = خلتنى ليه اثق فيه ! - وازاى تأمنى لحد مايعرفنيش ! = ماكنش بيهتم بيا خالص ، فضلت اديلو من غير مااخد حتى اللى يكفينى ! - طبيعى ازاى عاوزه تشبعى قلبك من واحد اصلا قلبه ناقص حب ! = مش عاوزه احب تانى انا غلطانه انى دعتلك ب الموضوع دا مش عاوزه احب تانى - هتحبي بس ف وقته حاولى تسمعينى المرادى ! _____ = قد ايه انت كريم يارب ، ادتنى اللى يهتم بيا ويحبني - لا ! انا مابعتش لسه ! دا كمان مش منى ومش تبعى وانتى لسه مش جاهزه للحب = مش قادره اقولك بحبه ازاى حقيقي كنت عطشانه للاهتمام واخيرا لقيته - بتكذبي ع نفسك لا انتى مش بتحبيه انتى بتعوضى نقصك بيه مجرد لقيتى حاجه كنتى بدورى عليها ، شويه وهتزهقي بلاش تبدأى معاه بلاش اسمعينى = شكرا يارب عشان قصه حبنا دى هتستمر للآخر وهنفضل كدا سوى طول العمر هو بيحبنى جدا عمرى ماشوفت حد بيحبنى كدا - هو مش كفايه لازم تكونى بتحبيه ، انتى بتحبيه ! =بيحبنى اكتر من اللى كان قبله ماكنتش فاكراك هتعوضنى كدا - لا دا مش تعويضى لا حاولى تسمعينى المرادى بجد بلاش تغامرى تانى _______ =انا سبته يارب بس الغريب انى مش حزينه زى المره اللى فاتت - كنت عارف النهايه وحاولت احذرك ، ليه بدأتى ف حاجه خسرانه وكله هيتحسب عليكى وهيتكتب ف تاريخك ، للاسف ماكنش ينفع امنعك بالعافيه من رغبتك = تصدق انا مش زعلانه عليه ! شكلى ماكنتش بحبه - مانا قولت كدا قولت انك بتعوضى نقصك وبتشبعي اهتمام مش بتحبيه لشخصه نفسى ف مره صوتى يوصلك = خلاص يارب لو هحب تانى ابعتلى انت الشخص المره الجايه عشان المره الجايه تبقي اخر مره بقى _____ = معقول ! يكون دا تعويضى ! المرادى كامله من كله ! بجد انت كنت بتجهزلى حاجه حلوه اوى كدا ! شكل وشخصيه وامكانيات وطريقه ووظيفه كل حاجه زى ماكنت بتمنى بالحرف - لا عشان خاطرى اوعى المرادى اوعى بجد انا لازم امنعك بلاش دا ، دا شافك فرصه سهله ماشافش فيكى حبيبته الغاليه ، دا هيستغلك المرادى مش هتبقى سهله جرحك هيبقي اكبر من جرح ف القلب = حقيقي مش عارفه اشكرك ع الشخص دا ازاى - لا المرادى مش هينفع انا لازم امنعك وابعدك عنه استحاله اسيبك ليه استحاله اكتفي بلفت نظرك ماينفعش تضيعى انا هبعده عنك _____ =عمرى ماكنت اتخيل انك قاسى كدا ! ليه بجد عملت كدا ! استخصرته فيا ! لقيته حلو جدا وانا مانفعش ليه ! طاب ليه مانا تعبت كتير قبله كان هيبقي راحتى اللى اخيرا لقيتها بعد عمر مليان جرح _ انا لو كنت سبته يكمل معاكى كنت هتيجى تبكى برضو زى كل مره بس كانت هتبقي القاضيه المرادى كانت هتقضى عليكى وع عمرك وكانت هتجرحنى انا شخصيا لما اشوفك ضايعه وحياتك انتهت ! = بوص بقي أنا زهقت كل مره اصليلك وكل مره تفشل الحكايه فايدتها ايه الصلاه _ مالهاش فايده فعلا عشان كل مره انا بسمع صوتك بس انتى ما بتسمعنيش ولا بتعرفي قصدى ، ولا حتى بتحسى أن الحاجه اللى قدامك دى منى ولا لا ! = نفسى مره اسمعك نفسى مره تجاوب عليا وتفهمنى بتعمل كدا ليه وايه كان قصدك ف كل مره نفسى افهم الحكايه بتبدء ليه مادام بتنتهى نهايه تقطع قلبي ! = انت ليه دايما ساكت رد عليا ف مره وأخرج عن سكوتك !!!! - اخرجى انتى عن نفسك شويه وحاولى تقعدى معايا وانتى هدفك تسمعينى مش بس تحكيلي - كل مره بتيجى تكلمينى وانتى هدفك "انتى" ، انتى بطلباتك واحتياجاتك واهتماماتك عمر صوتى ماهيوصلك عمر ما كان هدفك انك تسمعى صوتى ، ولا كان هدفك اننا نقعد نتكلم سوى تفهمينى وتعرفينى تقربي منى عشان تعرفي جزء من طريقه تفكيرى ، بتضايقى لما الحكايه تبوظ ماهو لازم تبوظ مادام مش منى ! مش انا اللى ببعتهم هو انا بشرح كتير ليه وانتى مش سمعانى ! = خلاص انا مش عاوزه حاجه تانى كفيانى كل خبطه كانت بتنزل ع قلبي قبل دماغى مش عاوزه سيره الحب تعدى عليا تانى - وانا مايرضنيش قلبك ينجرح بسبب سوء فهم بينى وبينك هعوضك اكيد ______ = يارب ، احنا اه علاقتنا متوتره الفتره الاخيره بس معلش ماليش غيرك احكيله ف لازم احكيلك ، بوص هو فيه حد المرادى ، انا اه قولت انى مش هحب تانى بس هى الحكايه جات فجأه ، مش عارفه احدد الصراحه - لا حددى دا هو دا تعويضى ، مش طول عمرك بتقولي نفسى ف حد يشفي جروح قلبي ويكون منك ، اهو دا اللى منى وتبعى ويعرفنى كويس = بس مش عارفه مش حاسه انى بحبه - يابنتى اسمعينى مره ، دا هو دا اللى هيعوضك ، حاولى تسمعينى المرادى بجد = بوص يارب لا انا مش هجازف بقلبي واغامر تانى بمشاعرى انا هقفل البدايه قبل ماتبدء اصلا ومش هسمحله - واضح انه صعب تسمعينى بس انا زى ما قبل كدا بعدت عنك حد بطريقتى ومااكتفتش بلفت نظرك عشان مصلحتك برضو المرادى هقربه منك ومش هكتفي بالعلامات الصغيره اللى ببعتها ، كل اللى فات دا ماكنش منى لكن دا ابنى وبيحبنى فلمصلحتك تقربى منه وانا هساعدك تحبيه وهساعده عشان يلفت قلبك ليه ______ = الحق يارب فاكر اللى كنت بقولك مش حساه ومش حباه ومش حاسه أنه مناسب ليا اطلاقا ، اول مره احس أن حد بيحبنى جدا والمفاجاءه ف انى حاسه انى بحبه ، بحبه رغم عدم اقتناعى ب ظروفه وبامكانياته ، والمفاجاه الأكبر انى اقتنعت بكل ظروفه وقبلاها ، انا قبلت اللى ماكنش داخل مزاجى ف الاول ورفضاه ! - صدقينى مش هتندمى خالص ، حقيقي هو دا اللى هيقدر يشفى جروح قلبك = هيقدر فعلا عشان منك انت - ايه ! انتى قولتى ايه ! انتى رديتى عليا ! = ليك حق تستغرب فعلا ، ازاى يبقى حد بيحكى مع حد فتره كبيره وتبقي دى اول مره يسمع صوته فيها ! - مش مصدق بجد ! اخيرا قدرتى تسمعينى اخيرا هتسمعى ردودى عليكى اخيرا هنبقي بنتكلم سوى مش بتكلمينى وبس ! = انا مش عارفه اقولك ايه ! ، انت مالكش ذنب ف كل دا كل تجربه دخلتها وغامرت فيها لو كنت بسمعك وقتها اكيد ماكنتش دخلتها العيب ماكنش منك ، انا اللى كنت بتكلم كتير ومش مديه نفسى فرصه اسمعك ، بارسل بدون استقبال هدفي افهمك واشرحلك واعرفك انا عاوزه ايه احطلك قواعد تمشى عليها عشان تجبلي اللى عوزاه زى مانا عاوزه بتكلم بدون مااسمع ، كان لازم كل اللى قبل كدا ماينجحش - اللى حصل خلاص انسيه ، المهم انتى حاسه انك اتعوضتى بيه ! حاسه ان دا اللى هيشفي جروحك فعلا ولا انا جابرك عليه ! = لو كان الوضع استمر ب انى مش قبلاه كنت هقولك جابرنى ، لكن انا اتغيرت من ناحيته وكل اللى كنت بدور عليه ف اللى قبله لقيته فيه ، واللى ماكنتش قبلاه فيه اقتنعت بيه ، حسيته منك بجد حسيته مُرسل من الله - مش مضايقه من كل التجارب اللى عدت بيكى ! = لولا كل التجارب دى ماكنتش عرفت انا عاوزه ايه الاولانى عرفت من خلاله انى بحب الاهتمام ، ولازم اللى اخده يعرف يهتم بيا وبطرق مختفله لانى بمل بسرعه والتانى : مش كل اللى بيحبنى لازم احبه وفيه علاقات بتبهت من الوقت ولازم الحب يزيد بالوقت والزهق والملل مايكنش مرض لعلاقتنا التالت : الشكل المبهر والمستوى العالى مابيعملوش قلب نضيف ، قلبهم مُتسخ بحجم نضافة عربياتهم ومن كل دول اتعلمت أن ممكن افضل طول عمرى اصلي وانا مش عارفه اسمع صوتك ، الاسم بتصلي ، من برا دا شخص قريب جدا من ربنا ف كل اللى بيعمله، لكن ايه فايدته وانا مش عارفه اسمع صوت ربنا ف حياتى ، مافيش بينا عشره وعلاقه تقدر توصلني انى احس بقصدك ، الطقوس الدينيه عرفتنى طريق ربنا اه بس ماكنتش قادره احس بصوته وانى افهم أن الشخص دا من ربنا ولا لا شوف هقولك الحكايه مش ساهله القرب منك صعب جدا ومحتاج مجهود ، بس مافيش حلاوه بالساهل ، احنا كبشر بنتمرمط ف ثانويه عامه عشان نوصل لكليه معينه وممكن مانوصلش ، لكن معاك انا ممكن افضل طول عمرى احاول لكن انت مش بضيع تعويض اي مره حاولت اوصلك فيها وطباعى البشريه عمتنى وماعرفتش اوصل لقربك عارف مش فرحانه انى وصلت لتعويضى الارضى والشخص فعلا اللى هيضمد جروح قلبي ، قد مانا فرحت انى وصلتلك ... انا تعبت بس وصلتلك ..✨💙 ابدعت فتكوين شخصيتى ابدعت فطريقه وصولى اليك وصلتلك بعد مرمطه كبيره عشان يبقي غالي عليا البعد عنك بابا_المبدع 
|
|
| قد تكون مهتم بالمواضيع التالية ايضاً |
| الموضوع |
| بصمة المبدع |
| المبدع الاعظم |
| الرجل المبدع |
| المبدع هو ذلك المختلف.... |
| المبدع |
العرض الشجري