نهاية امر خير من بدايته

[walaa farouk]

فكرة بروبوزال الزواج .. او بمعني اوضح اعلان طلب الزواج علي الملأ امام مرئي ومسمع الجميع
.. هي فكرة مبتكرة من الغرب وواضح من اسمها انها طلب الزواج ..
مش طلب الارتباط او الخطوبة (زي هنا) ..
لانهم بيكونوا تجاوزوا الخطوة دي وبيطلبوا الزواج مباشرة ..

علشان كدة بشوف ان بالرغم من جاذبية الفكرة وقد ايه هي مبهجة ومبهرة
ايا كان طريقة عرضها ..
الا انها مش مناسبة اوي لمجتمعاتنا الشرقية حسب ثقافة وتقاليد مجتمعنا ..

في الغرب الصداقة بتكون open جدا لدرجة انهم ممكن يكونوا عايشين مع بعض في بيت واحد
وبيوصلوا انهم عاشروا بعض لفترة كبيرة عن قرب
وشبه متجوزين بس زواج غير رسمي بينهم وبين نفسهم كدة ��
.. وبييجي في وقت بعد ما عاشرها سنين عن قرب جدا
بيقرر انه يتجوزها (قال يعني هما عذاب )

في مجتمعنا للاسف بنحاول نقلدهم بدون ما نكون مدركين تفاصيل الفكرة ..
والشخص بينفء الفكرة بطريقة مبهرة ومبدعة وهما بيكونوا لسه علي السطح
ماعاشروش بعض كفاية و معرفوش هما متفقين ومتفاهمين
ومنسجمين (اجتماعيا ، روحيا ، فكريا ، ماديا ،نفسيا ،عمليا ،جنسيا )
ولا لا .. وما عاشوش مع بعض بدرجة القرب اللي الغرب عاشوا بيها ومن خلالها قرروا .

علشان كدة بشوف الفكرة دي هنا غير مناسبة ..
وناس من اللي بتعملها بيرجعوا يندموا بعدها ..
لان الخطوبة بتتفك وبيكون امر محرج جدا لانهم مقدروش يكملوا
وفي نفس الوقت عملوا فيديو شافه الالاف او عشرات الالاف وهما بيعبروا عن حبهم باروع شكل ..

علشان كدة متنبهرش اوي بالفكرة .. ولو انت ارتبطت ومعملتش كدة متحسش
انك ماكنتش قد المقام .. وانتي متقوليش لخطيبك او جوزك شايف بيعملوا ايه مش انت !

متصدقش انبهار البدايات الخاص بالمشاعر .. الكتاب بيقول نهاية امر خير من بدايته .
. المهم النهاية مش البداية المفرقعة ..

وفي نفس الوقت اللي نفذوا الفكرة وعلاقتهم مكملتش ..
هما مش مجرمين ولا مأفورين ، هما حاولوا ببرائتهم وبساطتهم يعبروا عن مشاعرهم
لكن بعد كدة ماتفقوش في باقي الجوانب .