اوعي تقولها لحد

[walaa farouk]

اوعي تقول لحد "لازم تخس أو تخسي" ، و بالذات لو بنت ،
و بالذات لو قدام الناس (علي فكرة الكلمة ح تجرح لو لوحدها، بس طبعاً اكتر بكتير لو قدام حد) ..

انت كده بتقتله ، بتدبحها بسكينة تلمة !!

ده بيخلليها تكره شكلها، و حياتها، و بتدخلها في اكتئاب ..
وفي نوع خاص من الاكتئاب ده بييجي للناس دول اسمه "انوركسيا نرفوزا anorexia nervosa "
.. بتنزوي و ما تقابلش حد ، و تخس و ترجّع و ترفص الاكل تماما ،
لدرجة أن حتي قلبها نفسه بيخس و تبقي جلد علي عضم و ممكن تموت ..

صحيح المرض ده علميا ممكن يحصل لناس تعاني من اضطراب شخصية أو وسواس ،
لكن لقينا أن واحد من أقوي المرسبات لظهوره سخرية الناس اللي بتحسسه بالنقص..
بعد كده يجي له اضطراب في رؤية شكله في المراية
فيشوفها تخينة رغم انه رفيع و يستمر في الامتناع عن الأكل !!

ممكن تكون مش فاهم أو بتهزر أو قلبك عليها و عامل ابو العريف ..
لكن في الحقيقة انت مذنب جدا في حق الناس دول ..

ما لكش دعوة بشكل حد ، خليك في نفسك و ما تعملش من نفسك فاهم أو بتستظرف ..

يا تتكلم حلو و تشجع و تقول لها انت ذكية و جميلة و مبدعة، يا تسكت خالص ..
و لو خايف علي حد ممكن تنصحه كأخ ياخد باله من نفسه بينك و بينه وحدكما
و بأرق الكلمات و بروح مساعدة.. و لو لقيته تعب ما تكررهاش تاني ..

و ياما ناس موتت ناس من غير ما تعرف..
مش كده و لا إيه؟؟