نشرة اخبار اورشليم "فكرة جديدة لحفلة عيد القيامة"

[walaa farouk]

المكان : ساندي مذيعة نشرة أخبار ...

تجلس وأمامها وأمامها ترابيزة واثنان من الممثلين يقفوا خلفها على خشبة المسرح
(واحد منهم ملخس يرتدي ملابس حرس رئيس كهنة)


موسيقى نشرة أخبار بعد انتهائها تبدأ ساندي في الكلام

ساندي : مساء الخير وأهلا وسهلا بيكم في النشرة المسائية لأخبار أورشليم ...
معاكم ساندي انهاردة هنكمل تقريرنا الخاص عن الشخص إللي اسمه يسوع الناصري ..
. الراجل العادي ده إللي كل شوية يورينا إنه أكتر من إنه يكون حد عادي في تقرير امبارح بالليل
مراسلنا سنوبس كان بيكلم إليزابيث عن إنه الأطفال ليهم معزة خاصة عند يسوع...
خلونا دلوقتي نتواصل مع سنوبس ... أيوه يا سنوبس إحنا معاك ...

(ساندي تنظر ورائها لأحد الممثلين الواقف بجانب ملخس)

سنوبس : شكرا يا ساندي ... أنا هنا معايا ملخس من حرس رئيس الكهنة
وهو كمان من أوائل الناس إللي قابلوا يسوع وده كان من يومين فقط ... ملخس ..
. قولنا إنت ليه عامل كده ( حاطط إيده على أذنه)

ملخس: (يصرخ) دي ودني !! اتقطعت يا أستاذ !

سنوبس ( ينظر إلى أذن ملخس ويلاقيها سليمة) قصدك إيه ؟
ودنك سليمة يا ملخس ومافيهاش أي مشكلة !

ملخس ( يهدا شوية ويتكلم ) أيوة يا أستاذ ويسوع هو إللي خلاها كويسة
ده بيعمل معجزات يا أستاذ ده مرة ... انت عارف ده مرة وقف عاصفة ببساطة كده (يطرقع بصوابعه )
وكمان سمعت إنه أكل 5000راجل بأسرهم بغدا ولد صغير.

سنوبس : أيوة أنا كمان سمعت كده وإمبارح كنت بتكلم مع أم وقالتلي إنه أخد أولادها مثال للأعظم في ملكوت السموات ... أدينا بنحاول نوصل لحقيقة الراجل ده .

ملخس : بص أنا بعد إللي حصل معايا مابقاش عندي شك خالص.

سنوبس: إحكيلنا...

ملخس : أنا واحد من إللي بعتوهم عشان يقبضوا على يسوع .

سنوبس: (بتعجب ) يسوع اتقبض عليه ؟؟؟

ملخس : أيوة يا أستاذ أصله خلى الناس الكبار إللي في البلد متضايقين منه جدا
وافتكروا إنه عايز ياخد المناصب العالية إللي هما فيها عشان كده قرروا يخلصوا منه.
أنا بقى بعتوني عشان اقبض عليه ,
لكن واحد من أصحاب يسوع اسمه بطرس (يتكلم مع سنوبس بصوت واطي)
على فكرة ده كان عصبي أوي ... المهم بطرس ده أخد السيف بتاعه
عشان يحمي يسوع وفجأة ومن غير ما أخد بالي لقيت دم في كل حتة وملقتش ودني.

سنوبس ( يتألم) بس أنا شايف إن ودنك سليمة أهي.

ملخس : أيوة يا أستاذ أصلك معرفتش باقي الحكاية.
راح يسوع قال لبطرس رجع سيفك مكانه ...
وأنا اخترت إني أعمل الحاجة الصح وأشرب الكاس إللي ربنا ادهالي ...
وبعد كده شفى ودني بكل بساطة كده في دقيقة مكنش فيه حاجة غير دم
وأنا كنت بانزف وفي الدقيقة التانية كأن مفيش حاجة حصلت يا أستاذ

سنوبس ( الكلام عن الدم خلاه يتألم تاني ... يحاول ياخد نفس عميق أو يجلس.. )
جميل جميل أكيد ده امر رائع إنك تخف بالطريقة دي وعلى يد واحد قوي ومحب زي ده

ملخس : إنت مسمعتش يا استاذ ولا إيه الراجل ده اتحاكم بتهمة تنهي حياته...
ده حتى فيه ناس بتقول إنه اتصلب على الصليب امبارح بس أنا مش عارف إيه إللي حصل يا أستاذ ...
كل حاجة متلخبطة اليومين دول.

سنوبس: إيه؟ ده أنا لازم أحقق في الموضوع ده فورا ...
شكرا عشان وقتك ده ( يدي الميكروفون لملخس ويجري)

ملخس : أي خدمة (ثم ينظر إلى ساندي ويقول ) رجعنالك يا أستاذة ...

ساندي : شكرا يا ملخس ...
ده تطور مثير جدا في تقرير انهاردة ..
. هنستنى بفارغ الصبر بكرة بالليل عشان نشوف مراسلنا سنوبس وصل لإيه .
كانت معكم ساندي من نشرة أخبار أورشليم ... تصبحوا على خير