الشعرة اللى اتبدلت

[walaa farouk]

فيه ايه مال صوتك

- لا مافيش بس تعبانة شوية ..
ممكن تعدى عليا وانت راجع من الشغل

- طيب حاضر .. هاخلص واجيلك

- الو .. تعالى يابنى بسرعة

- فيه ايه يا بابا

خلاص يعنى ايه؟
ماينفعش اللى انت بتقوله ده
انت اكيد غلطان ..

لالالا .. ماينفعش تموت ..
دى طول عمرها واقفة فى ضهرى

ماينفعش تروح منى ..
طب والهدية اللى جبتهالها
داعيد الام فاضل عليه ايام

طب بلاش الهدية .. هتمشى كدة وتسيبينى
طب استنى لما اطيب خاطرك اعتذرلك

عن كل مره ..
عضيتك فيها فى صدرك وانتى بترضعينى ..
وماكنتش عارف انى باوجعك

عن كل مره ..
جيت لك من المدرسة بمشكلة ورميتهالك ..
وقلت لك اتصرفى

عن كل مره ..
زعقت فى وشك عشان مالقيتش لبسى جاهز ..
لبسى اللى هالبسه عشان اخرج واسيبك

عن كل مرة ..
قمت من على الاكل وقلت لك انا زهقت ..
مافيش تغيير

عن كل مرة ..
عليت فيها صوتى عليكى ..
وخرجت من البيت وقفلت ورايا الباب ..
من غير مافكر انتى هتعملى ايه

عن كل مرة ..
قلت لك فيها .. ماتتصليش بيا وسط اصحابى ..
انا بقيت راجل ..
ماتصغرينيش قدام زمايلى

عن كل مرة ..
قلت لك فيها .. انا مابقيتش صغير ..
وكأنى انا باكبر وانتى ثابته مكانك ..

عن كل مرة ..
قلت لك فيها .. دى حياتى ..
لو سمحتى ماتدخليش فيها ..
ونسيت انى اساسا واخد حياتى منك

عن كل مرة ..
زعلتى فيها من الدنيا واللى بتعمله فيكى ..
ومافرقش معايا انى اشيل عنك

عن كل مرة ..
دموعك نزلت فيها ..
وايدى اتشلت انها تمسحها ..
وانتى اساسا كنتى بتلحسى دموعى
عشان ماتقعش ع الارض

طب استنى اعتذرلك ..
عن كل شعرة سودة اتبدلت بشعرة بيضا ..
وماكنتش عارف ان العمر بيجرى بيكى ..
وانا باجرى منك

وادينى واقف قدام صندوقك اهو ..
مش لاقى جوايا غير ندم ..
وكلمة واحدة .. سامحينى

حوار كئيب جداً ..
بس مش بعيد انه يحصل ..

بجد يا بختك ..
لو لسة تليفون امك ممكن يرن ..
وترد عليك ..
دا معناه ان لسة فيه فرصة تقول لها

وحشتينى ..
بحبك ..
ماتزعليش ..
سامحينى

يابختك لو لسة تقدر تعدى عليها ..
تلاقيها بتفتح لك الباب ..
دا معناه انك ممكن تمسك ايديها وتبوسها
تحضنها ..
تطبطب عليها ..
تضحك فى وشها

فيه غيرك نفسه ان الزمن يرجع ..
ويشوف امه ولو يوم واحد ..
بس عشان يقول لها .. ماتزعليش

بس حتى اللى امه سافرت من الدنيا اللى احنا فيها دى ..
مايزعلش ..

قلب الام مضاد للزعل ..
ولو راجع ذكرياته ..

هيفتكر يوم ما راح يعتذر لها قبل كدة وسمع منها
"هو انا اقدر ازعل منك يا حبيبى ..
دانت ضنايا ..
هو فيه ام تزعل من ضناها برضه ..

روح يابنى ربنا يرضى عليك"

عيد الأم قرب ..
لو هى موجودة ..
حسسها فعلا انه يومها ..

اقفل موبايلك وقول لها دا يومك ..
اتصور معاها كتيــــــــــــــــــــر ..

ياعالم .. ايه اللى ممكن يحصل بكرة
ولو مش موجودة ..

افتكر طلب ياما اتحايلت عليك تعمله ..
وراحت منك قبل ماتنفذه ..

واعمله وانت بتقول لها ..
حقك عليا .. انا بانفذه وانتى مش موجودة ..

انت يمكن مش حاسس بيها ..
بس هى اكيد حاسة بيك دلوقتى ..
أكتر من الاول ..

انزل فى اليوم ده ..
واعمل اى حاجة تخلى الناس .. يدعوا لها ..

روح خبط على باب ناس غلابة مايعرفوكش ..
وقول لهم ..
ماما باعتالكم الحاجات دى ..
هيدعولها من غير مايعرفوها ..