زوّادة اليوم: حط حالك مطرح النّاس

[souad jaalouk]

زوّادة اليوم: حط حالك مطرح النّاس
بتكون سايق سيّارتك بتصير تتطلّع حولك. بتشوف الشب اللي مبسوط بسيارتو الجديدة بتتذكّر حالك بس جبت اوّل سيّارة، بتشوف اللي خيفان بعدو عم يتعلّم السواقة جديد بتتذكّر كيف انت تصرّفت بس كنت متلو، بتشوف العيلة الفرحانين اللي رايحين مشوار بتفكّر قدّيش صرلي ما رحت مشوار انا و اهلي، بتشوف الشب اللي رايح عا شغلو بتتذكّر المسؤوليّات اللي عندك ياها، بتشوف سيارة اسعاف مسرعة بلا ما تحس بتصير تصلّي تطلب من الرب يشفي المريض و يبعد عنّك و عن اللي بتحبّن هالكاس، بتشوف سيّارة فيها اصحاب عم يضحكو و يتسلّو بيمرقو عا بالك اصحابك اللي كل واحد منّن مشغول بحياتو و ما بتجتمعو الّا عالمناسبات، بتشوف الصبيّة الشاردة بأفكارها اللي عيونها مدمعين بتسأل حالك شو مزعّلها هلقد...بدون ما تقصد بتكون شفت حالك بكل هالناس و بتوصل مطرح ما رايح انت و حاسس حالك كنت ب 100 محل بنفس الوقت...حلو من وقت للتاني تحطّو حالكن محل الناس و تحسّو متلن...الله معكن