مسرحية (بابا نويل و مكنة اللعب)

[Marina Greiss]

المشهد الاول :
قبل العيد بخمس أيام في معمل الكمبيوتر عند بابا نويل
بابا نويل جالس أمام الكمبيوتر الرئيسي و المساعدين 2 انسان آلي ... أورك و بورك ... بالاضافة الى فادي و هو طفل في العاشرة و صوت الماكينة في الخلفية
بابا نويل : يلا يا جماعة ... شدوا حيلكم العيد قرب ... و الولاد مستنيين الهدايا ... احنا فاضلنا قد ايه يا أورك
أورك : (زيء- صوت ميكانيكي) فاضلنا 1/3 الهدايا يا بابا نويل
بابا نويل : 1/3 الهدايا !!!... امال كنا بنعمل ايه طول السنة لما يبقى فاضلنا 1/3 الهدايا !!؟؟
بورك : ( صوت ميكانيكي ) نعمل ايه يا بابا نويل ما المكنة كل شوية عمالة تعطل ... و نحاول نصلحها و بعد ما نصلحها نلاقي عدادا الطاقة اللي بيشغلها بينزل... و احنا مش عارفين نعمل ايه ؟...
أورك صوت ميكانيكي ) هو ايه اللي بيشغلها يا بابا نويل ...؟
بابا نويل : ده سؤال وجيه ... تصدق ان أنا مش عارف ايه اللي بيشغلها ... من ساعة ما جدي ال17 بابا نويل الاول شحنها ... و هي ما احتاجتش شحن ... و يا رب ما تحتاجش شحن لأني مش عارف ايه اللي يشحنها ...
أورك :طب ما احنا ممكن نطور في شحنها ... بدل ماهي بتتشحن مثلا مثلا بالفحم ... نشحنها احنا بالبنزين مثلا ... زي محركات العربيات كل شوية يطلعوا بنزين أعلى ليها
بورك : بنزين ... و بنزين ليه ... ما نشحنها بالطاقة الشمسية و لا طاقة الرياح علشان ما تلوثش البيئة
بابا نويل : فحم ايه و بنزين ايه و شمس ايه بس يا جماعة ... المكنة مش بتتشحن بحاجات كدة ... و عامة احنا بنفكر في شحنها ليه دلوقتي تمشي معانا لغاية بعد العيد و بعدين نفكر في شحنها
فادي : بابا نويل ... بابا نويل ... ممكن آخد اللعبة دي ... دي حلوة قوي ...
أورك : ( يصيح ) بس يا فادي ... سيب اللعبة دي ... مش وقت انك تاخدها
فادي : لأ ها أخدها ما لكش دعوة بيا
بورك : يا فادي اللعب دي علشان نوزعها على الاطفال ليلة العيد
فادي : و يعني هي دي اللي ها تفرق معاكم
أورك و بورك يقتربان من فادي في سرعة ثابتة و يقولان في صوت واحد
أورك ،بورك : هات اللعبة اللي في ايدك يا فادي ، هات اللعبة اللي في ايدك يا فادي .....
يتراجع فادي ... ثم يجري ليختبئ وراء بابا نويل ...))
فادي : بابا نويل ... حوشهم عني
بابا نويل : بس كفاية يا جماعة ... ايه اللي أنتوا بتعملوه ده ... ( يوجه حديثه نحو فادي ) فادي يا حبيبي ممكن تأجل موضوع اللعبة لليلة العيد ... خدها بس ليلة العيد ...
فادي : حاضر يا بابا نويل ... ( يوجه حديثه نحو أورك و بورك ) شايفين الناس بتتعامل ازاي ... مش زيكم
(يصدر أورك و بورك أصوات ميكانيكية و يحاولان الاقتراب من فادي ... و لكن بابا نويل يمنعهما باشارة من يده)
بابا نويل : ( يصيح ) بس يا جماعة ... مش كدة كل واحد يشوف شغله بقى
أورك ، بورك : حاضر يا بابا نويل ( صوت الماكينة يصمت)
أورك : صوت المكنة .... صوت المكنة
يذهب بورك لمعاينة عداد الطاقة ))
أورك : بابا نويل ... الحق
بابا نويل : فيه ايه يا أورك
أورك : عداد الطاقة صفر
بابا نويل : أزاي ... ايه اللي حصل ... ليه كدة ...
أورك : لازم نشحن المكنة
بابا نويل : يبقى لازم نعرف ايه اللي ممكن يشحن المكنة دي ... فادي تعال اقعد قدام الكمبيوتر و افتح البابا نويل نت على السايت اللي أسمه
)www. Taket-makanet-elle3ab.com(
فادي : حاضر يا بابا نويل ... ( يجلس الى الجهاز و يحرك أصابعه على لوحة المفاتيح) عملت عليه سيرش و مش موجود على البابا نويل نت ... مش لاقيه ... الكمبيوتر بيقولي ان حاجة زي كدة ممكن تكون موجودة في المكتبة القديمة بتاعة بابا نويل الاول
بابا نويل : ايه ده و احنا ما دخلناش معلومة مهمة زي دي ازاي
فادي : لازم عمر ما حد فكر ان المكنة ممكن تحتاج شحن تاني
أورك : مش ضروري نضيع وقت في المناقشة يا بابا نويل ... يالا نشوف المكتبة القديمة ...
بابا نويل يحاول اخراج كتاب من المكتبة القديمة فيسقط عليه عدد من الكتب بالاضافة الى التراب
بابا نويل : ( كح كح كح - يسعل من التراب) ياه ايه التراب ده كله ... تاريخ مكنة اللعب ... تاريخ مكنة اللعب ... تاريخ مكنةاللعب ... أهو ... ( يسحب كتاب من المكتبة ) ندور بقى جوة الكتاب ... طاقة المكنة ... طاقة المكنة ... طاقة المكنة ... أهي ... طاقة المكنة صفحة 11385 ( حداشر الف و تلتماية خمسة و تمانين ) الكتاب بيقول ان المكنة دي مش بتشتغل لا بالخشب و لا بالفحم لكن بنوع طاقة اسمه المحبة و أول مرة اتشحنت فيها كانت في القرن التالت الميلادي مع بابا نويل الاول سيدنا البابا نيكولاوس ... و ده كان شخص بيحب الناس و يساعدهم و من كتر محبته اتشحنت المكنة و زي ما المحبة بتشحن المكنة الكره يقلل الطاقة بتاعتها . فلازم نلاقي مصدر للمحبة علشان المكنة تتشحن ...
أورك : طبيعي جدا ان طاقة المكنة تقل الفترة اللي فاتت... لأنها كانت فترة مليانة حروب كتير ... ده غير جيرانا اللي جنبنا اللي قعدوا يتخانقوا امبارح ...
بابا نويل : و ناسيين خناقتكم بتاعة النهاردة ... هي المكنة ها تتحمل ايه و لا ايه بس يا ربي ... أعمل ايه دلوقتي ...؟؟
فادي : كدة يبقى لازم نلاقي مصدر تاني للمحبة زي ما الكتاب اللي معاك قال
بورك : ايه رأيك نجرب محبة اتنين اصحاب ...
بابا نويل : نجرب مش ها نخسر حاجة ...
فادي : جون و جورج أصحابي بيحبوا بعض قوي ... تحب نجيبهم ...
بابا نويل : و ماله ... هاتهم ...
( يذهب فادي لأحضار جون و جورج
) أظلام
يضاء المسرح ثم يدخل جون و جورج مع فادي … ينظران الى جنبات المكان في ذهول
جون : فادي انت قلتلنا احنا جايين فين
فادي : جون … مالك … احنا عند بابا نويل
جورج : بابا نويل… بابا نويل …، بابا نويل اللي بيحكولنا انه بيجي يوزع علينا الهدايا في ليلة عيد الميلاد
فادي : أيوة هوة
جورج : أنا كنت فاكره قصة خيالية … مش موجودة غير في الحكايات بتاعة تيتة و جدو … و بعدين احنا في معمل كمبيوتر مش قصر تلج زي اللي في الحكاية
جون : و فين العربية بتاعة بابا نويل اللي الغزلان بتجرها ؟…
فادي : مهو ده بابا نويل القرن ال21 … و طبعا لازم يكون متطور …
( يدخل بابا نويل)
بابا نويل : أهلا … أهلا … أصحابي و حبايبي (يتلفت جون و جورج في ذهول )
جون : … انت بابا نويل …. انت بابا نويل بجد ..!!!؟؟
بابا نويل : ( بهدوء و ابتسامة واثقة) أيوة أنا بابا نويل بجد …ايه مستغربين …؟
جورج : احنا كنا فاكرينك حكاية …؟
بابا نويل : ما هي كل حكاية خيالية …و ليها أصل حقيقي …
فادي : خلينا في المهم يا بابا نويل …
بابا نويل : ماشي كلامك يا فادي … خلينا في المهم ..بصوا يا ولاد... احنا محتاجينلكم
جون : ازاي يا بابا نويل
بابا نويل : هو فادي ما حكالكمش … ماشي ها أحكيلم أنا مكنة الهدايا اللي بتعمل هدايا لكل أطفال العالم كل سنة وقفت و محتاجة تشحن ، و اللي يشحنها مش بنزين أو سولار اللي يشحنها محبة بجد
جون : طب و احنا دورنا ايه
بابا نويل : محبتكم لبعض هي اللي هاتشحنها
جون : طب نجرب يا بابا نويل
بابا نويل: طيب أنا ها أفتح الكتاب علشان أعرف المكنة دي تتشحن أزاي ... أدينا عندنا طاقة حب بس نشحن بيها ازاي
أورك : الكتاب بيقول انه لازم يكون حب مستمر بدون مقابل و مالهوش غرض، ممكن اللي يحب فيه يفدي حبيبه حتى لو أنكره أو أهانه أو رفضه
جون : بس احنا محبتنا مش من النوع ده ، يعني أنا و جورج آه بنحب بعض ... بس مش لدرجة نموت علشان بعض ، صدقني كان نفسنا نساعدك
بابا نويل :كدة يبقى لازم ندور على نوع تاني من الحب
بورك :ايه رأيك في حب ام لأولادها
بابا نويل : فكرة كويسة قوي ..
فادي : بس برضه ... بيتهيألي ان الحب ده مش هيكون كفاية لأنه موجه لعدد محدود من الناس من الام لأولادها حتى لو بقوا 10
بابا نويل : كدة مش هاينفع ... احنا لازم ندور في التاريخ كله على الحب اللي مفيش بعده حب و لا قبله حب ... الحب اللي غطى ناس كتير من غير غرض و لا هدف ، أعملي عليه سيرش على البابا نويل نت يا فادي
شاشة كبيرة للكمبيوتر تظهر عليها الكرة الارضية تدور .. و مؤشر زمني يتحرك
فادي : بابا نويل ... بابا نويل ... الحق
بابا نويل : فيه ايه يا فادي .. لقيت حاجة
فادي: لقيت نقطة منورة ... بس نقطة النور دي من سنين
يتحرك بابا نويل نحو فادي لمتابعة الحدث
فادي : شايف نقطة النور دي كانت سنة 1 ميلادي
بابا نويل : 1 ميلادي !؟ فين يا فادي
فادي : في اورشليم يا بابا نويل في بيت لحم
بابا نويل : ميلاد المسيح ؟! ازاي حاجة زي كدة ماجتش في بالي ... بقى أنا اللي طول عمري بخدم الاطفال في عيد الميلاد ... انسى حب ربنا اللي في الميلاد .. و احتاج للكمبيوتر علشان يفكرني بيه.. طبعا حب المسيح اللي منغير مقابل ... و اللي راح لكل الناس في كل زمان ومكان هو اللي ممكن يشحن المكنة ...
بورك : مش لازم نضيع وقت بابا نويل
بابا نويل : فعلا مش لازم نضيع وقت ... بينا يا أولاد على آلة الزمن علشان نروح نشوف ميلاد ربنا يسوع المسيح .. أورك ماتنساش بطارية المكنة ... بورك مؤشر الطاقة ...

( يدخل الجميع آلة الزمن تكون موضوعة الى الخارج من ستارة المسرح ... و تقفل ستارة المسرح )
المشهد الثاني:
(تبدأ الماكينة في التوقف عن الاهتزاز الى أن تقف تماما و يبدأ بابانويل و الاولاد في الخروج من الماكينة و يفتح ستار المسرح على مشهد منقسم ثلاثة أجزاء
1-المذود
2- الرعاة
3- قصر هيرودس
تتم أضاءة المشاهد بالتناوب حسب المشهد و أظلام الآخرين
كل المسرح مظلم مع وجود سبوت على بابا نويل و الاولاد عند خروجهم من الآلة
فادي : ايه ده احنا فين ...؟؟
بابا نويل : احنا سنة 1 لميلاد المسيح
أورك: احنا في اورشليم و اللي قدامنا مكان ميلاد السيد المسيح
فادي : معقولة .. بقى رب الاكوان ده كله يتولد في المكان الفقير ده ... لأ أنتوا بتضحكوا علي
بابا نويل : أمال احنا ليه بنقول انه حب لا قبله و لا بعده ... يعني هو تنازل ربنا ده لدرجة انه يتولد من بنت فقيرة ...و فمكان فقير كدة ...ده مش حب .... كونه ياخد جسد زي جسدنا ده مش حب ... كونه يهرب من ملك كان عاوز يموته ده مش حب ...
فادي : أعظم حب ...
اظلام
اضاءة المذود :
المكان عبارة عن جدران مغطاة خيش و الارضية قش و مجموعة من الحيوانات محيطة بهم
(صوت طفل يبكي)
سالومي :مبروك يا ست مريم ... ولد زي الفل هتسميه ايه
العذراء : يسوع زي ماقال الملاك
(يدخل يوسف النجار)
سالومي : الف مبروك يا شيخ يوسف ... يتربى في عزك ...امه قالت هتسميه يسوع ... انت ايه رأيك
يوسف : يسوع زي ما قال الملاك
سالومي : خلاص يبقى اسمه يسوع
( تعطي الطفل لأمه ثم تخرج)
يوسف : حمدلله على سلامتك يا مريم ... مبروك ليكي
مريم : مبروك للبشرية كلها ... أخيرا اللي البشرية كلها استنته جه أهو ...
يوسف :يا ربي يسوع ... يا ما كان نفسي تيجي و نستقبلك في قصر ... مش في مكان وحش و ضيق و الحيوانات حوالينا زي كدة
مريم : المكان اللي يجي فيه ربنا ... يبقى أحسن من من القصر يا شيخ يوسف ... ده احنا حوالينا الملايكة فرحانة و بتمجد ربنا من كتر فرحتها
يوسف : بقى انت يا ربي بتحبنا لدرجة انك تاخد جسم زينا و تيجي و تعيش وسطنا
مريم : و يتولد من بنت فقيرة زي و فمكان زي المكان ده ... قد ايه انت حبك كبير لينا يا ربي ...
اظلام

اضاءة منظر الرعاة
الرعاة مجتمعين حول النار
راعي 1: الجو برد قوي ... ايه البرد ده ...
( واحد فيهم ينظر في ذهول امامه )
راعي 2: انت شايف اللي أنا شايفه ...
راعي 1 : شايف ايه ... هو فيه هنا الا العتمة و الخرفان و الديابة ...
راعي 3: هناك فين ... انت شايف ايه ...
راعي 2 : زي ما يكون فيه نجمة من السما نزلت و بتتمشى على الارض ...
راعي 3 : شكلك كدة كتر القعدة مع الخرفان أثر على دماغك ...
راع1 : الله ... ايه ده بصوا هناك ... ده بجد زي ما تكون نجمة
راعي 3 : لأ دي بتقرب مننا كمان
راعي 2 : يلا بينا نهرب بجلدنا من هنا ...
راعي 1 : و الخرفان ...
راعي 3 : خرفان ايه بس ...
الملاك : استنوا يا جماعة ... خايفين ليه
راعي 1: ( بارتعاب ) انت مين و عاوز ايه
الملاك : أنا ملاك الله و جي أبشركم ان فيه فرح كبير هيكون لكل الشعب ... اتولد النهاردة في مدينة داوود مخلص هو المسيح الرب . هتلاقوا طفل صغير ملفوف و محطوط في مزود للبقر
(تظهر مجموعة من بقع الضوء في الخلفية و صوت "المجد لله في الاعالي و على الارض السلام و بالناس المسرة" على 3 دفعات و يظهر دخان ... يختفي الملاك و بقع الاضاءة )

راعي 1: يلا يا رجالة على بيت لحم
راعي 2 : أيوة أنا نفسي أشوف المسيح ابن داود ... يلا يا رجالة
(يقوم الرجال للتحرك)
أظلام
قصر هيرودس الملك
هيرودس جالس على العرش يأتي اله الحارس
الحارس : مولاي الملك
هيرودس : عاوز ايه دلوقتي ...
الحارس : مجموعة مجوس من الشرق جايين يقابلو عظمتك يا مولاي ...
هيرودس : مجوس من الشرق ... أمم ...ممكن يكونوا جايبين معاهم هدايا ... علشان يتمنوا رضايا ... و ماله خليهم يدخلوا
(ينصرف الحارس و يدخل المجوس)
مجوسي 1 : مولاي الملك هيرودس
هيرودس : أهلا بالضيوف ... شرفتوا اورشليم ...
مجوسي 2 : الشرف لينا يا مولاي ...
هيرودس : هل ليكم هدف معين من الزيارة ...
مجوسي 3 : الحقيقة يا مولاي ... أحنا مجموعة من مجوس المشرق
مجوسي 1 : و طبعا اللي زينا يحبوا يراقبوا النجوم و الكواكب و مساراتها هي ماشية ازاي
مجوسي 2 : و فليلة ... و احنا بنراقب النجوم لقينا نجمة أكبر من كل النجوم و شكلها مختلف عن كل النجوم
هيرودس : (بنفاد صبر) ها ... و بعدين ايه اللي حصل
مجوسي 3 : ما احنا جايين لك في الكلام يا مولاي
مجوسي 1 : لما لقينا النجمة دي فكرنا ندور في كتبنا عن معناها ... و لقينا ان معناها ان فيه ملك هايتولد ... و الملك ده يا مولاي هايتولد هنا في اورشليم
مجوسي 2 : طبعا يا مولاي الملك اللي يتولد لازم يتولد في قصر ملكي ... و الحقيقة احنا جينا علشان نسجدله
هيرودس : (ينتفض هيرودس من على كرسيه و يتكلم كمن يحادث نفسه) ملك جديد...ملك تاني ...(يحاول تصنع الهدوء ) اه طبعا طبعا ... بس الحقيقة ما فيش مواليد جداد في القصر
مجوسي 1 : مفيش ... ازاي الكلام ده ... دي النجمة وقفت هنا ...
هيرودس : و هانعرف ازاي ... مفيش غيرهم... اليهود (يحادث نفسه)طيب هانتأكد من الموضوع ده ... يا حراس
حارس : أمر مولاي ....
هيرودس : ابعتوا هاتولي الكهنة و رؤساء الكهنة اليهود (يوجه هيرودس كلامه نحوهم) أما ضيوفنا الاعزاء فيتكرموا بالوجود في ضيافتي لغاية لما يجي كهنة اليهود و نتأكد ...
مجوسي 3 : يكون لينا الشرف يامولاي
(يخرج المجوس ويتحرك هيرودس ذهابا و عودة في المكان)
هيرودس يحدث نفسه) ملك ... ملك برة القصر ... هياخد مني و من عيلتي الملك ...أما نشوف ... هيقدريعمل ايه جلالة الملك ...
(اظلام)
المذود
(الرعاة يدخلون يحاولون استكشاف المكان )
راعي 1:معقولة ... هو ده المكان...؟؟
راعي 2 : بقر و معيز و خرفان
راعي 1 : و حمار و حصان
راعي 2 : تبن و قش و خيش ... ليه اختار ده المكان
راعي 3 : متهيألي هو زي اللي وصفهولنا الملاك
الرعاة يشاهدون العذراء و الطفل فيشيرون لبعضهم بالسكوت))
راعي 1: السلام ليكي يا سيدتي ... السلام ليك يا سيدي ..
يوسف : انتوا قاصدينا احنا
راعي 2 :أيوة يا سيدي ..
راعي 3 : أحنا جايين نشوف المخلص ... و نسجدله
العذراء : وانتوا عرفتوا مكننا منين يا جماعة
راعي 1: من الملايكة ... الملايكة جت و بشرتنا بميلاد السيد
راعي 3 : أنا مشتاق جدا اني أشوفه يا مولاتي ... هو فين
العذراء : أهو...
راعي 2: هو ده ملك اسرائيل ... هو ده مخلص العالم ... الشكر ليك يا رب ... يالي اديتنا فرصة اننا نشوف الميلاد ... ده
راعي 1 : اسمه ايه ...
العذراء : يسوع زي ماقالي الملاك ...
راعي 3 : يسوع ... يعني مخلص
يوسف : و هو جي علشان كدة ... علشان الخلاص
(يسجد الرعاة للطفل مع ثبات لثواني
) اضاءة ... مشهد العرش
هيرودس الملك مع المجوس
الحارس: مولاي الملك هيرودس ... الكهنة طالبين الاذن بالدخول
هيرودس : يدخوا فورا ...
رئيس الكهنة : مولاي الملك هيرودس ...
كاهن 1 : خير يا مولاي ...
هيرودس : خير ... بقى ضيوفنا الاعزاء المجوس .. جايين من بلادهم و بيقولوا في ملك جديد اتولد في اورشليم و افتكروا انه اتولد في القصر و كانوا عاوزين يسجدوله ...
رئيس الكهنة : حسب نبوات الكتاب المقدس ... السيد المسيح هيتولد هنا في اورشليم في بيت لحم ...
كاهن 2 : أيوة و النبوة بتقول " و انت يا بيت لحم أرض يهوذا... لست الصغرى بين رؤساء يهوذا ... لأن منك يخرج مدبر يرعى شعبي اسرائيل " أكيد هو الملك اللي قصدهم عليه ...
هيرودس : بقى كدة ( محدثا نفسه) طيب ... ( ثم يتصنع الابتسام ) أحبابنا و ضيوفنا الاعزاء المجوس ...دلوقتي ... أحنا كلنا عرفنا الملك ده هايتولد فين ... و ياريت لما تروحوا تسجدوله تبعتولي أنا كمان علشان أسجدله ...
مجوسي 1 : شاكرين فضلك يا مولاي ...طبعا و احنا راجعين هنعدي عليك علشان تعرف مكانه
مجوسي 2 : دلوقتي يا مولاي احنا بنطلب الاذن بالانصراف ...
هيرودس : اتفضلوا ...
( ينصرف الجميع)
هيرودس : ملك ... ملك آل ... اما نشوف أخريتها ايه معاك ... يا عظمة الملك ...( بعنف)
اظلام))
اضاءة مشهد المذود ))
يدخل المجوس في ايديهم هداياهم
مجوسي 3 : مش مستغربين من حاجة ...
مجوسي 2 : قصدك على ايه ...
مجوسي 3 : كهنة اليهود ... مع انهم عرفوا بميلاد الملك مجوش يسجدوا معانا ... مع ان النبوة واضحة في كتابهم
مجوسي 1 : مش جايز فيه حاجات تانية شغلاهم
مجوسي 3 : جايز
ينظر مجوسي 1 للمكان حوله باندهاش
مجوسي 1 : معقولة ملك اليهود يتولد في مكان زي ده
مجوسي 2 : واضح انه مش أي ملك أكيد له مملكة من نوع تاني ...
مجوسي 3: الملك أهو و أم الملك اهي...
مجوسي 1 : السلام لأم الملك ...
العذراء : السلام ليكم ... انتوا مين ...
مجوسي 2 : احنا مجوس من المشرق و عرفنا بأمر الملك اللي هيتولد و جينا نسجد له
مجوسي 3 : و جايبين معانا هدايا دهب و لبان و مر ..
مجوسي 1 : يا ريت تقبلوا مننا الهدايا البسيطة دي
( تفتح الهدايا و توضع عند أقدام المسيح ثم يحدث ثبات للمشهد ثواني )
يتحرك بابا نويل و الاولاد الى المذود يسجدون مع ثبات المشهد ثواني
ستار
المشهد الثالث
يخرج بابا نويل و الاولا د
فادي : أنا حاسس براحة و فرحة مش قادر أوصفها
بابا نويل : عندك حق يا فادي ميلاد ربنا يسوع ادانا حاجات كتير قوي .. ربنا علمنا الحب اللي بجد و الفرح و السلام
أورك : بابا نويل ... البطارية اتشحنت للآخر
بورك : عداد الطاقة للآخر يا بابا نويل
بابا نويل : يوه ... فكرتوني بموضوع الهدايا ... بينا يا ولاد نركب البطارية و نشغل المكنة مش فاضل قدامنا وقت كتير ...
يركب بابا نويل و الاولاد آلة الزمن و تغلق الستارة أثناء ذلك و تبدأ في الاهتزاز الى أن تتوقف))
ينزلون ثم تفتح الستارة

المشهد الرابع : في المعمل :

بابا نويل : يلا يا جماعة ... الوقت اللي قدامنا مش كتير
أورك : أنا ركبت البطارية يا بابا نويل
بورك : و أنا ركبت عداد الطاقة
فادي : بابا نويل الحق
بابانويل : فيه ايه يا فادي
فادي : المكنة ..
(يتحرك بابانويل نحو الماكينة)
بابا نويل : ايه ده
فادي : ده حب ربنا ... شايف المكنة شغالة ازاي (الماكينة تدفع بكمية من الهدايا في كل الاتجاهات)
بابا نويل : احنا لازم نبتدي نوزع الهدايا ... و الا مش هنلاحق على اللي بتطلعه المكنة ... يالا يا فادي اديني كيس الهدايا
فادي : كيس الهدايا أهو يا بابا نويل
بابا نويل : شكرا يا فادي
( يملأ بابا نويل الكيس بالهدايا )
بابا نويل : سلام يا جماعة أنا رايح أوزع هدايا العيد ...لازم كل أطفال العالم ياخدوا هدية عيد الميلاد
أورك : هديتك يا فادي
فادي : أنا خلاص مابقتش عاوز هدية ...
لأن ميلاد ربنا هو أغلى هدية ...
ستار