إنجازي في حياتك هو أنت

[walaa farouk]

أنت متخيل أن أهم فترة في حياة يوسف قضاها في السجن .
. من وهو عنده ١٧ سنة لحد ٣٠ وهو مسجون .. من غير سبب، ومن غير اي تدخُل من الله.
والكُل بره عايش حياة طبيعية ومستمتع بأحلى فترة في عُمره ..

وبتخيل كدة يوسف وهو في العشرينات (في السجن)
بيبُص على اللي في سنُه بره وازاي هما مبسوطين وبينجزوا في حياتهم ..
اللي بيحب وهايتجوز مثلاً .. واللي اشتغل شغلانة حلوة .
. واللي اترقى وعمل فلوس تأمنه في المستقبل .
. واللي مبسوط مع عيلته .. واللي بيتحرك ورا حلمه مفيش حاجة موقفاه ..

كلّه بينجز وبيتحرك .. إلا يوسف.. مسجون!

فاكر وقتها ابتديت اصلي واتكلم بهدوء كدة بس مقدرتش اكمل بالهدوء ده الصراحة
.. مع الوقت ابتديت ابكي واتكلم بغضب وحُرقة منه.. زي ماتقول الصلاة قلبت "خناقة" بيني وبينه في الآخر..

فاكر قولتله بكل مرارة "بس فهّمني ليه الدنيا ماشية معايا بالعكس من ساعة ما قابلتك.. ؟
ليه حياتي واقفة وكل اللي حواليا بيتحركوا ؟
وليه من الأول زرعت حلم جوايا ملوش علاقة بالواقع؟
وليه قولتلي اسيب الكل وأمشي وراك وأنت عارف انها هاتبقى صعبة كدة؟

ما كنت تسيبني أبقى "عادي" زي الباقيين.. ولا صراع ولا فشل ولا معاناة
.. اهو اعيش اليوم بيومه زي الناس وخلاص؟
أو تخلينا كدة من بعيد لبعيد .. ابقى اصليلك في المناسبات
واحاول ابقى كويس في تصرفاتي .
. وأنت تبقى تباركني برضو من بعيد لبعيد .. زي ما بتعمل مع الباقي ..

لكن أنا من ساعة ما مشيت وراك .. وحياتي عمالة تُقع ..
من ساعة ما سلّمتك حياتي وأنا شايفك بتضيعها مش بتنجز فيها حاجة ..
الكُل بينجز .. لكن أنت قولي أنجزت ايه في حياتي من ساعة ما قابلتك؟؟ "

وكنت متوقع يفهمني ، ويشرحلي كل ده بيحصل ليه..
أو بقى يقولي هعوضك أو يغير الواقع .. لكن رده كان غريب اوي..

قالي بكل هدوء.. " إنجازي في حياتك هو "أنت".
أنت الهدف ياحبيبي مش حاجة بتعملها .. أنت الإنجاز مش الحلم اللي اديتهولك..

وحتى السنين اللي بتضيع دي في خطّتي، حتى لو بسبب اختياراتك الغلط ..
فا اللي بيسلملي حياته .. مابيبقاش فيها وقت ضايع.
حتى السجن والعبودية .. بحضّره فيهم للي دعيته ليه..
زي يوسف .. مكنش هايقدر يستحمل المُلك، غير لما يعدّي في السجن الأول..

ولو على التعويض والخير .. فا دول اسهل حاجة، بديها للكُل!
لكن المُهم عندي هو قلبك .. المهم اني أخليك شبهي .. على حسب قلبي.
تبقى شبهي وبعدها أطلعك للمجد وأديك أضعاف اللي بتحلم بيه ومخفش عليك
، لكن قبل كدة اخاف التعويض والراحة تضيعك وتتوهك عني..
وقبل ما تحقّق الهدف .. لازم أنا احضّرك ليه الأول ..
وهاستخدم كل حاجة في حياتك -حتى السجن والعبودية والسنين اللي بتضيع-
.. عشان أخليك قد الحلم اللي اديتهولك..
لأن الأهم عندي من تحقيق الحلم.. هو أنت ..
صدقني أنت الإنجاز اللي بعمله مش حاجة تاني .. "