بيخبّرو عن مجموعة من الرجَال اجتمعو قدّام باب ضخم وتقيل وكان عندُن مهمّة يفتحو ليفوتو على قلب القصر. جرّبو كل الطرق، شدّو بقوتُن وأكتر من قوّتُن، بَس ما وصلو لنتيجة، لدرجة إنّو كانو رح يكسرو الباب والنتيجة بعدُن واقفين برّا وما قدرو يدخلو على القصر. وفجأة بيوصل رِجّال ختيار علّمتو الحياة دروس كتيرة، بيشوفُن على هالحالة، بيقرّب من الباب بيحطّ كمية قليلة من الزيت على مفصّلات الباب بينتظر شويّ ليحَلحِل الصِدي وبيقلّن هلّق فتَحو، والباب بينفتح بكل سهولة. الزوّادة بتقلّي وبتقلّك قدّام المشاكل ما لازم نستعمل بَس العنف والشدّة والقساوة، مرّات كتيرة بيكون الحل بشوَيّة ليونة وقليل من اللطف. خلّينا نتذكّر إنّو اللطف من ثمار الروح، والقدّيس بولس بيقول برسالتو لأهل غلاطية: «وأما ثمر الروح فهو لطف»، والله معكن.
التعديل الأخير تم بواسطة souad jaalouk ; 08 - 10 - 2018 الساعة 02:38 AM
08 - 10 - 2018, 02:32 AM
العرض الشجري