زوادة اليوم : سائق الإمبراطور

[souad jaalouk]

زوادة اليوم: سائق الإمبراطور

بيوم من الإيام أعلنت الصحافة عن موت السائق الشخصي للإمبراطور، وأكيد الإعلان كان مُرفَق بطلب سائق خاص للإمبراطور. كتار يلّي تقدّمو للمنافسة، بَس تلاتة يلّي انقبلو، وأكيد الإمبراطور هوّي يلّي بدّو يختار سائقه الشخصي. يوم الإختبار كتار من الناس تجمّعو ليشوفو مسابقة إختيار السائق الشخصي للإمبراطور، المبارز الأول كان بأوّل شبابو بيسوق السيارة من القصر لأعلى القمة بسرعة هائلة وبيرجع، كان عم بيلِفّ المنعطفات بسرعة، الكلّ بيزقفولو وبيقولولو: «هيدا هوّي الشخص المناسب».
المتنافس التاني بيسوق السيارة أسرع من السائق الأوّل، بيطلع الى قمّة الجبل وبيرجع، الكلّ بيغيّرو رأيُن وبيقولو: «أكيد الإمبراطور رح يختار هيدا الشبّ، هيدا هوي السائق اللائق فيه».
أما المتباري التالت فكان متقدّم بالسنّ، شعرو أبيض، بيسوق السيارة بكل رواق وتأنّي، كان عم ينتبه على المنعطفات ويتحاشى الوقوع بأيّ جورة، وأخد وقت لحتى طلع الجبل ونزل، الحاضرين كلّن قالو: «أكيد مش هيدا هوّي الشخص المناسب».
أما الإمبراطور فَوقع اختيارو على السائق التالت وقال: «هيدا هوّي الشخص المناسب، لأنّو كان حريص على سيارتي يعني رح بيكون حريص على حياتي».
الزوّادة بتقلّي وبتقلّك
بَدّك توصل بسرعة سوق على مهلك، وإذا بَدّك تربح السباق كون مِتّزِن وحكيم، والله معك.