روحانية ولا دروشه

[walaa farouk]

عندنا مشكلة في كنايسنا بتبدأ من مدارس الاحد.
. وهي تقديم تعليم سهل ( بقول سهل وليس بسيط) اللي هو خالي من المعرفة والفهم والبحث.. وملخصه ربنا بيحبك ومهما كنت خاطئ هو عاوزك وربنا حنين وحلو.. كله ده طبعاً كويس ومطلوب
.لكن اللي مش حلو انك ما تقولش غيره.
. وده سببه ضعف مستوي الخادم من الناحية الثقافية
نتيجة عدم قراءته او لانه أتربي بنفس الطريقة .
طيب ده نتيجته ايه ؟؟
نتيجته انه بيخرج إنسان مدروش وفاكر ان ده الطريق.
لا يقبل الحديث بالعقل ولا يقبل كلام عن تاريخ الكنيسة. ويفسر آيات الكتاب المقدس علي حسب هواه الشخصي.
وممكن تكون أقوي مرجعيه بالنسباله هي قصص القديسين عن طريق الكتب او الأفلام .
المهم هذه النوعية لها مُحبين ومعجبين.. ويقولك ده قديس.. دا راجل بركة. ياريتنا بس نكون زيه.
وشويه بشويه تنتشر الأفكار السطحية علي حساب الدراسة والتفسير والعمق.
الحل ايه ؟؟
باختصار عدم استسهال الخدمة..
لو انت مش فاضي تحضر وتقدم درس للمخدومين مليان عمق وروحانية وثقافة كنسية ما تروحش.. صدقني ما تروحش
وما تقلقش علي الخدمة ربنا هيبعت ناس عندها وقت وفكر.
قدموا لولادكم معلومات وتاريخ وكونوا مثل حقيقي قدامهم.. مش بس بتواضعك ومحبتك. لكن كمان بعلمك وثقافتك وعمقك في تقديم كلمة ربنا.
ما توصلوش للولاد ان ربنا بتاع الطلبات الديلڤري
.. اطلب بس ومالكش دعوه.
ما تفهمش ولادك ان القديسين هما سوبر مان او كانوا خوارق وفوق الطبيعة.. كانوا تحت الضعف مثلنا وياما غلطوا.
ما تروحش لست جوزها مطلع عينيها وتقولها دا صليبك
.. ربنا ما بيبعتش ناس وحشه لحد.. الناس الوحشه نتيجة اختيارتنا.
ما تقولش لحد ربنا باعتلك المرض وده صليبك.. ربنا ما بيبعتش مرض لحد. لكن ربنا بيبعتلنا احتمال وصبر للمرض.
بلاش معلوماتك يكون اساسها الفيسبوك..

الروحانية تبني الكنيسة والمعرفة تطمئننا علي سلامة الطريق.. اما الدروشه فتسقطنا في مستنقع الجهل والظلام.
ربنا يبارك خدمتكم ويثمرها ويكثرها ويرفع شأن الكنيسة.