ربنا شايفك ايه وبيستخدمك ازاى

[sama smsma]

ربنا اختار داود يكون ملك ماكنش اختيار شعب او تزكيه او حتى مجامله
ربنا اختار داود يكون ملك وبعتله صموئيل يمسحه برغم ان ابوه مجبش سيرته لصموئيل عرض عليه كل ولاده الكبير والطويل والعريض
ماعدا داود .. داود اصلا مجاش فى باله كان ابوه مستصغره ومش صغر سن بس لا كمان تقليل حتى اخواته كانوا شايفين انه كده . لكن ربنا قال كده لصموئيل وجدت داود حسب قلبى
ربنا نظرتهُ كانت على القلب . الداخل لا بالشكل ولا بالقوة ولا بالامتيازات .. ربنا بس اللى ميز داود ميزه فى وقت اقرب ناس لداود كانت بتوضعه بتقلل منه ..
اقرب ناس لداود شايفاه ماينفعش غير لرعى الغنم شايفينوا ماينفعش يكون حاجه غير كده .. اقرب ناس لداود ماكنوش حاسين بيه ولا حتى فارق معاهم مجرد واحد من البيت والسلام ..
ربنا بقى له كلام تانى خالص له نظره مختلفه عن كل الناس ربنا شاف فى داود اللى محدش شافه من اقرب الناس له .ربنا حب داود وحب قلب داود .
داود كمان حب ربنا بقلبه فى كل حاجه كانت بتحصله كان القلب اللى بيمشى داود حتى لما رجعوا بتابوت العهد داود رقص قدام التابوت رقص ومهموش يكون ملك مهموش ان زوجته تحتقره او تقلل منه اصلها بنت شاول الملك كان بيرقص كاتعبير من قلبه ..
وده كان بيفرح ربنا اصل ربنا عايز القلب ياما قالها بطرق كتير ياابنى عايز قلبك .. قال اعطنى قلبك ماقلش اعطنى فكرك او علمك او عقلك او طولك او عرضك او شهادتك او جاهك او مالك او منصبك ربنا فوت كل ده وقال قلبك ..
وداود قدم قلبه بس ماكنش عشمان ولا متخيل انه يكون ملك لكن كان واثق ان ربنا معاه فى كل حاجه بيعملها وكان حاطط ربنا قصاده ممها قابلته ظروف قاسيه .
داواد فى صغره فى ملكه فى قوته فى ضعفه كان بيتعامل مع ربنا بقلبه
وعلشان كده علشان قلب داود ربنا خلاه عظيم عظيم فى ملكه فى مزاميره عظيم جدا لما جه من نسله . حتى لما داود غلط غلطه كبيره وكانت كبيره بجد ربنا عاقبه بسيط اوى اوى برغم ان داود حكم على نفسه بس ربنا اتحنن واجل العقاب او رحله لاجيال هاتبقى وحشه وتستاهل ويدوب اخد منه طفل بتشبع وبعدها عطاله سليمان .
لما ربنا بيحب حد اوى بيرفعه اوى بيتحنن عليه اوى بيغفرله اوى بيسنده اوى
محدش شاف اللى شافه داود من اذلال وتقليل ومطاردات وحروب بس كمان شاف انتصارات وبقى داود العظيم ..
انت كمان نظره الناس ليك حتى الاقرب او البعيد ماتهزكش ماتتعبكش
المهم قلبك فين ومع مين المهم ربنا شايفك ايه وبيستخدمك ازاى
المهم انت مستنى من الناس ولا من ربنا
خليك زى مانت اوعى تعظم نفسك بين الناس او تستنى منهم مجد
كل اللى تعمله تستصغر نفسك بين ايدين ربنا تقدمله قلبك الصغيره ده
وربنا بقلبك ده هايعمل اكتر مما تتخيل
ياريتنا نبقى داود علشان نكون حسب قلب ربنا .
عماد حسنى