انت ابنى

[walaa farouk]

انا يارب ..

انا حد عادى بصلى حاجات قليله وممكن مصليش وانسى ..

انا مش بخدم وحتى لو خدمت تبقى حاجه بسيطه كده على قدى ..

بروح القداس بس مش كتير لو روحت مرات مش بركز واسرح ومرات انشغل بالعيال ..

بعدين انا بغلط وبشتم وبحلف ومرات كده بكذب .

. انت اولادك قديسين اولادك الناس إللى فى الكنيسة بايتين ..

لكن انا اروح فين انا منفعش ابنك ..
انت حبيبي وانا نزلت من السماء من اجلك وعارف خطيتك وضعفك .

.عارف انا جايبك منين وبحبك بحبك وانت وحش

وبحبك وانت بعيد وبحبك وانت منجس نفسك بالخطية والعلاقات والشات .

. الله انت عارف الشات .. اه والصور والفيديوهات والرسائل المسجات ..

ياه انت كده كسفتنى ارفع راسي ازاى ولسه عايزنى بتحبنى وبتقول على ابنك ..

اه لسه بحبك وانت ابنى ومستنيك ترجع لحضنى ..

اه بس قالوا لى انك زعلان ومش عايزنى وهتعاقبنى وانا عارف انى استحق العقاب .

. عقاب عقاب ايه انا لو عايز اعاقبك كنت نزلت من السماء لأجلك

كنت اتصلبت وخلصتك انا مش جاى اعاقب انا جاى اخلص افرح اشفى احرر ..

انا بفرح لما اشوفك لما بحس انك هتقرب منى بس للاسف بلاقيك بتقرب وتبعد وتقرب من بعيد ..

بكون عايز احضنك عايز اغسلك بس انت مش بتدينى فرصه ..

عارف موضوع خطيتك ده مش شاغلنى ..

ازاى ده كل الخدام والوعاظ بيقولوا انك زعلان وانك غضبان واللى هيقع في فى ايدك هيروح في خبر كان .

. ههههه انا اب مش سياف هم ميعرفوش انا استقبلت ازاى الابن الضال

وعملت ايه مع السامرية والست اللى مسكوها بتعمل الخطية .

. الله امال يعنى ايه قديس .. قديس بالنسبه لى يعنى خاطئ حاسس بخطيته وتايب

.. يعنى عنده موقف من الخطية كارها رافضها

حتى لو مغلوب مش قادر يبطلها هقف معاه واسنده لحد ما يقدر ينتصر

. قديس يعنى بيحبنى ويتضايق اوى لما يغلط وما يقدرش يرتاح من غير لما يصالحنى

. قديس يعنى ما يقبلش يفضل واقع لكن اول ما يقع يقوم ويجرى يترمى فى حضنى .

قديس يعنى حاسس انه ضعيف وطول الوقت بيقول لى اسندنى

. قديس يعنى روحى القدوس فيه ويقوده ويبكته

. قديس يعنى بيقرب منى بياخد منى علشان يبقى شبهى

قديس يعنى بيعيش بقوتى وبطريقتى والناس تشوفنى فيه

انا بقى شايفك كده ابنى إللى بتعبر عنى

حتى لو لسه فى اول الطريق انا شايفك فى الصوره إللى فى قلبي ليك انت ابنى