مش مجرد أسماء

[walaa farouk]

دي مش مجرد أسماء مختلفة اتقالت على شخص عادي

كل اسم من دول ليه معنى عايش معانا



مش بس عجيب في ميلاده من عذراء، عجيب في كل موقف وطريقة بيكلّم فيها كل واحد فينا، عجيب في استجاباته لصلواتنا.
هو اللي بيمسك بإيدينا ويمشي معانا وبيدينا المشورة وبيحط رجلنا على الطريق الصح، هو اللي مكتوب عنه، إنه إله كل حكمة وبيدي بغنى كل اللي يطلبه.




يسوع الكَلِمة المتجسد، إعلان واضح وصريح بأنه هو الله. ولأنه قدير مفيش حاجة تقف قدامه وتصعب عليه، الموت مكانش ليه سلطان عليه ولا أصعب الأمراض، حتى اللي كان مولود مشوّه بلغتنا الأيام دي قدر يخلق له عينين من تاني ورجّعله بصيرته، قدير جت في أصلها العبري بمعنى جبار، دايماً موجود واقف يحامي عن أولاده.

من أروع العلاقات وأقدسها علاقة الأب بأولاده، تخيلوا قد إيه عايزنا نكون قريبين منه، زي ما الأولاد بيتعاملوا ويقربوا لأبوهم، يروحوله بكل راحة يحكوا معاه في كل حاجة مضايقاهم ومن غير تكليف ولا تذويق بكل لخبطة وهَمّ جواهم، ومايقلقوش ولا يخافوا من نظرة أبوهم ليهم، العلاقة دي مش هاتتغير ولا هاتقل، ثابتة مهما حصل لأنه مش هايغير نفسه، زي ما هو إله أبدي، عهده معانا كمان أبدي ومش هايتغير.

من زمان وكل الناس بتدوّر على السلام والراحة ودلوقتي إحنا في أمسّ الحاجة للسلام وسط الظروف المحيطة المليانة بالتوتر والاضطراب، مش مجرد شخص جاي يسعى للسلام، لكن هو رئيس السلام، هو المسؤول يديك السلام اللي قلبك محتاجه والهدوء والراحة، اتقال عنه " إله سلام لا تشويش"، لو جواك لخبطة وانزعاج عندك الحل تروح تتكلم معاه هو هيديك السلام اللي محتاجه، هايريّح قلبك لأن مفيش حد غيره يقدر يعمل كده..