فاهمينها غلط

[walaa farouk]

اوقات بنفهم الايه بشكل غلط ونعتبره وعد لينا ولما ميحصلش بنزعل ونفتكر الله محققش وعده وهو من البداية ميكنش وعدنا بيه. يا تري احنا فاهمينها صح ولا #فاهمينها_غلط




لا تكن في ما بعد شراب ماء بل استعمل خمرا قليلا من اجل معدتك واسقامك الكثيرة - تيموثاوس الأولى 5: 23 -

قليل من الخمر يصلح فُم المعده؟! الناس بتقول أن دي موجودة في الكتاب المقدس وبيستخدموها على انها تصريح لشرب الخمرة حتى ولو بكمية قليله!

لما ندرس الحالة اللي كان فيها تيموثاوس هنعرف انه كان مريض والمرض دا جاله بسبب شُربه للمياة الكتير! علشان كده الرسول بولس سمح له بشرب قليل من الخمرة، والخمر في الكتاب المقدس تعني عصير العنب المختمر لكن مِش الماده الكحولية اللي بتسبب السُكر !!

وده مش معناه أن الكتاب المقدس بيسمح بشرب الخمر، لأن الكتاب مش ممكن يناقض نفسه، مكتوب لا تسكروا بالخمر الذي فيه الخلاعه!



خطفت السفينة ولم يمكنها أن تقابل الريح، سلمنا، فصرنا نحمل.

الأيه دي موجودة في سفر اعمال الرسل 27: 15، كتير اوي بنستخدمها واحنا بنعلن تسليمنا لله وثقتنا في قدرته أنه يقدر ينجينا من المواقف الصعبة اللي بنمر بيها .. وصحيح ان التسليم لربنا أمر كتابي والعناية الالهية فعلاً بتشيلنا بس مِش ده اللي يقصده في الاية دي..

وقت لما كان بولس في البحر والريح هاجت عليهم والموج كان عالي جدا وشديد.. السفينه كانت هتغرق وبعد محاولات رهيبة من الناس انهم ينقذوا نفسهم وفشلوا، اتقالت الجملة دي " سلمنا فصرنا نُحمل " بمعنى تاني، استسلمنا للريح لاننا فقدنا كل أمل في النجاه!




لأن الرؤيا بعد إلى الميعاد، وفي النهاية تتكلم ولا تكذب. إن توانت فانتظرها لأنها ستأتي إتيانا ولا تتأخر. - حبقوق 2: 3 -

النبوة دي في اصلها التاريخي كانت لسقوط المملكة، حبقوق كان لازم يسجل الرؤيا، للأجيال اللي جاية، علشان المسافة بين الوقت اللي اتقالت فيه والوقت اللي هتحصل فيه، زمن كبير! فيه فترة كبيرة وقال ان مملكة بابل هتُقع قدام مملكة مادي وفارس على ايد كورش، وليه التحديد ده كله علشان يقول ان الشر ليه عقاب، حتى لو ظهر وكأن له السلطة الأقوى.

لكن المؤمنين بيشجعوا بيها الناس المحتاجين، واللي بيمروا في ظروف صعبه علشان يصبرهم، وبيعملوا نوع من الربط بينها وبين ( في وقته يسرع به ) وحقايق ايمانية كتير زي محبة الله وصلاحه من ناحية البشر..





ومهما سألتم باسمي فذلك أفعله ليتمجد الآب بالابن - يوحنا 14: 13 -

سمعت كتير التعليق .. باسمي يعني أقول " باسم المسيح استجيب .. أمين أو زي ما بنقول في الصلاه الربانية " بأسم المسيح يسوع ربنا " وبيكون فيه توقع رهيب انه لما بنقول كده الله هيتستجيب، طب ولو محصلش استجابة يا ترى بيحصل ايه! اكيد بنتهز وده بالظبط اللي بيحصل لما نشيل الايه من السياق بتاعها ونستخدمها بشكل مختلف، باسمي بتدل على اني ليَّ علاقه مع الله علشان اطلب منه، واني ابن ليه وعارف خطته ومشيئته وكل سلوكي وكلامي بيشهد على كده، مش أي حد هيقول باسم يسوع أو باسم المسيح، طلبته هتستجاب!




هلم نتحاجج، يقول الرب. إن كانت خطاياكم كالقرمز تبيض كالثلج. إن كانت حمراء كالدودي تصير كالصوف. - اشعياء 1: 18 -

دايمًا بناخد نُص الأيه الأول ونفرح بالغفران اللي لينا من الرب ونسيب باقي الأيه مع أن الأية دي فيها شرط كبير للغفران، "إن شئتم وسمعتم تأكلون خير الأرض وإن تمردتم تؤكلون بالسيف لأن فم الرب تكلم" ..

الله ابتدى يقولهم كده بعد ما إدى لشعبه انذارات كتير وطلب النقاش ده أو فرصة الكلام دي علشان يثبت لهم انهم اللي مانعين الغفران عن حياتهم مِش ربنا .. لأنه آمر ليهم بالبركة والغفران وده وعده ليهم لو كانوا سمعوا صوته ومشيوا في طريقه من زمان..




هنذا واقف على الباب وأقرع. إن سمع أحد صوتي وفتح الباب، أدخل إليه وأتعشى معه وهو معي. - رؤ 3: 20 -

الأيه دي بيستخدموها الوعاظ في التوبه وبيقولوا " المسيح واقف على باب قلب كل خاطي وبيخبط ومستني انه يفتح قلبه ويقبله وساعتها هيكون فيه فرح عظيم! مع ان ده حقيقي، لكن الأية دي في نَص الكتاب المقدس، وده كان المفاجأه إنها متوجهة للمؤمنين مِش الخطاه والدليل على كده ان النَص بيقول: وَاكْتُبْ إِلَى مَلاَكِ كَنِيسَةِ الّلاَوُدِكِيِّينَ .. ملاك الكنيسة يعني الراعي – الخادم – الشخص المسئول في الكنيسة، واللي المفروض انهم مؤمنين بيخدموا وبيعلموا كلام الله للشعب لكن للأسف الله شايف انهم نسيوه وفي كل تحذيرات سفر الرؤيا دي المرة الوحيدة اللي مكتوب فيها إلى كنيسة والكنيسة جماعه المؤمنين ..