حضن (شحاته)

[walaa farouk]

اقولك على سر ..
انا عمرى ما عرفت اعمل خيمة فى الكشافة ..

طب ليه ما سألتش بابا ..
بابا مش هيحب يتكلم معايا ..
فى الموضوع ده ..

ليه مايمكن لوكنت اتكلمت معاه ..
كان فاجأك ورد عليك ..

اصل انا ماكنتش باشوفه ..

ازاى ماكنتش بتشوفه ..
هو مش انتو عايشين فى نفس البيت ..

ايوة .. بس ماكانش بييجى كتير ..

يعنى ماكانش بييجى البيت خالص؟

لأ كان بييجى ..
بس "فيفى" كانت تملى تقول له عليا ..
انى ولد مزعج ..

حد يتكلم على مامته ..
ويقول اسمها كدة ..

"فيفى" دى مش ماما ..
دى مرات بابا ..

اتحشر جوا الراجل العجوز ..
كلام كتير ..
ومالقاش غير السكوت ..

هو وعدنى ..
انه هييجى الحفلة بتاعة الكشافة ..
عشان يعلق لى وسام مساعدة العواجيز ..

هو هييجى .. مش كدة؟

جه اليوم ..
وبابا ماجاش ..

بس كان موجود اللى علق الوسام ..
وحضنه قدام الناس ..

فيلم كرتون .. بس وجعنى ..
عشان من قصة واقعية ..
فى بيوت كتير ..

فيفى .. مش لازم تبقى مراة بابا ..
ساعات فيفي دى بتبقى ماما نفسها ..

فيفى .. مش لازم تبقى شخص ..
ساعات بتبقى اى حاجة تلهينا وخلاص ..

مهما كان الحضن اللى فى الصورة مريح ..
بتفضل جوانا حاجة بتقول ..
انه حضن "شحاتة"

خلوا 2018 سنة رد الحقوق لولادكم ..
وانتو عارفين الباقى ..