لَوْ كَانَ لَكُمْ إِيمَانٌ مِثْلُ حَبَّةِ خَرْدَل

[sama smsma]

قَالَ لَهُمْ يَسُوعُ: «لِعَدَمِ إِيمَانِكُمْ. فَالْحَقَّ أَقُولُ لَكُمْ: لَوْ كَانَ لَكُمْ إِيمَانٌ مِثْلُ حَبَّةِ خَرْدَل لَكُنْتُمْ تَقُولُونَ لِهذَا الْجَبَلِ: انْتَقِلْ مِنْ هُنَا إِلَى هُنَاكَ فَيَنْتَقِلُ، وَلاَ يَكُونُ شَيْءٌ غَيْرَ مُمْكِنٍ لَدَيْكُمْ. "
اشمعني حبة الخردل؟! طول عمرنا الاجابة انها اصغر البذور و الكتاب نفسه قال كده في انجيل مت 13
يشبه ملكوت السماوات حبّة خردل أخذها إنسان وزرعها في حقله.
وهي أصغر جميع البذور،
ولكن متّى نمت فهي أكبر البقول،
عمليا الخردل مش اصغر البذور بشكل مطلق زي ما ناس حاولت تشكك في الكتاب المقدس و قالت ان الخردل مش اصغر البذور فازاي نقول المسيح اله متجسد و هو مش عارف كده... فعليا مش مقصود smallest و لكن smaller
و الكلمة اليونانية اللي اتكتبت "ميكروتيرون" (mikroteron)، وهي كلمة في صيغة المفاضلة وقد تعني مثالا أصغر بين جميع الحبوب... بس مش الصغر بس اللي خلي المسيح يقول لو ليكم ايمان مثل حبة الخردل علشان يقول اد ايه حجم ايمان صغير اوي يعطينا مجد كبير اوي... فيه صفة في حبة الخردل انها من البذار ذات الفلقة الواحدة... يعني ايه
البذرة ببساطة تتكون من غلاف خارجي يحمي البذرة من المؤثرات الخارجية مثلا جلدي الملمس كده زي الترمس و الفول او خشبي زي بذرة البطيخ
و بعدين تحت القشرة حاجة اسمها الفلقتين او الفلقة الواحدة... زي اوضتين ( فلقتين) او اوضة واحدة ( فلقة واحدة) مخزن غذا احتياطي يتغذى بيه الجنين في حالة ما فيش غذا مستفاد من الارض و الشمس و الهوا
و الجزء التالت من البذرة اسمه الجنين كانه نبات صغنن جوه يكبر في حالة توافر البيئة الملائمة و يبقي نبات جديد...
الخردل بقة من ذوات الفلقة الواحدة..
الايمان طريقه واحد.. ما ينفعش تؤمن بطريقين او تخدم سيدين... يا اما تؤمن بربنا فتعبده ياما البعل فتعبده .. ربنا عاوز يقول لنا مش مهم حجم ايمانك يبقي صغير قد الخردل بس طريق واحد.. صدقه بس... ساعات اقول لبناتي حاجة و بعدين تقولي بس اصحابي بيقولوا.. يصعب عليا و اقولها حتصدقي اصحابك و تكدبي بابا؟! .. الايمان ايقان بامور لا تري... يا تؤمن انه حيدبرها يا تروح تدور علي كارت واسطة.. يا تؤمن انها حيعولك و مش حيحوجك لكن تطنش العشور و تقول هو عارف بالحال ما يمشيش... يا مصدق انه بيحبك و بيغفر لكن سقطت علشان بيعاقبك و لا اتخبطت لانك ما صلتش مش بتاعته.. حيديك زوج في الوقت المناسب من ايده ياما مش عاوزك تتجوزي لخيرك لكن شات علي الفيس و لبس ملفت في الافراح مش سكته.. فلقة واحدة... حتي لو منمنمة زي الخردل بس ايمان بجد.. ننقل جبال.. ثقة الطفل في ابوه غير محدودة كل ما بيكبر و يفكر و يشغل عقله يتعب و يتهز...ربنا يخلينا اطفال مصدقين وعوده بايمان طفل ان ابويا يقدر يعمل كل حاجة و بيفهم في كل حاجة.. اجمل الذكريات لما بنتي كانت تكسر عروستها ولا تبوظ لعبتها تجيبهالي و تقولي صلحها... لا فكرت حقدر و لا لا و لا انا بفهم فيها و لا لا... طالما انا اللي جبتها يبقي حقدر...
نبيل شحاتة