ان اردت تقدر

[sama smsma]

تنويعات علي اوتار انجيل مرقس
نغمة 5... تتمة الاصحاح الاول
ان اردت تقدر!!!
40 فَأَتَى إِلَيْهِ أَبْرَصُ يَطْلُبُ إِلَيْهِ جَاثِيًا وَقَائِلاً لَهُ: «إِنْ أَرَدْتَ تَقْدِرْ أَنْ تُطَهِّرَنِي»
41 فَتَحَنَّنَ يَسُوعُ وَمَدَّ يَدَهُ وَلَمَسَهُ وَقَالَ لَهُ: «أُرِيدُ، فَاطْهُرْ!».
42 فَلِلْوَقْتِ وَهُوَ يَتَكَلَّمُ ذَهَبَ عَنْهُ الْبَرَصُ وَطَهَرَ.
أبرص... البرص هو مرض مزعج و غالبا كان هناك افتراضية انه نتاج خطية و زي ما اتعاقبت بيه مريم اخت موسي لما تطاولت عليه... و حسب التقليد اليهودي يعزل الابرص لان كل ما يلمسه يصبح نجس علشان كده كانوا غالبا يبقوا برة المدينة خارج الاسوار. ويمنع دخولهم إلى الهيكل بل وكل أورشليم، بل وأى مدينة مسورة. وفى حال دخولهم يعاقبون بالجلد 39 جلدة. ولا يخالطون سوى البرص مثلهم. و تتصور لو ماشي و حس ان فيه ناس يصرخ نجس نجس علشان الناس تحذر منه و ما تلمسه منتهي المهانة.. و المرض مشوه للجسم جدا زي ما بتعمل الخطية فينا.. ساعات الواحد يبص علي نفسه و يتحسر.. لا العين بقت بسيطة و لا القلب نقي و الواحد فقد الطيبة و بقي عنده قلق و مضطرب و متوتر .. كل ده عملته الخطية و الدنيا فينا
وسجد... هو يقدم العبادة والخضوع قبل أن يقدم مشكلته.. عاوز تكسب قلب ربنا اخضع الاول و بعدين اطلب
إن أردت تقدر.. هذه صلاة بمنتهي الإيمان بقدرة المسيح على الشفاء..
قال له ان اردت تقدر... مش ان تقدر افعل... كتير نروح لربنا و جوانا شك حيحلها ازاي دي.. تبقي مشكلة مكعبلة اوي.. حياة مرة بين زوجين.. بيت مكسور.. ولاد موجوعين.. خطايا و عادات كتيرة و نجاسة متاصلة في القلب و الجسد و ميت مرة اعتراف و هي هي نفس العادة و نفس الشكوى.. لكن اللي عنده ايمان عارف كويس اوي انه يقدر.. يقدر يشق في البحر طريق.. يقدر يكتم افواه الاسود.. يقدر يسحق جليات بحصوة داود يقدر يشبع خمس الاف بسمكتين و خمس خبزات.. الله هو القدرة نفسها و العجيب نسيبه و ندور علي معرفة و لا كارت و لا واسطة و حاجة تجرح قلبه اوي.... ان اردت تقدر.. قوله كده.. صلي لجوزك اللي مطلع عينك و قولي لربنا ان اردت تقدر.. صلي لمراتك اللي منكده عيشتك و قول له ان اردت تقدر.. صلي من اجل مخدوم مش نافع معاه طريقة تجيبه.. شغل مش قادر تلاقيه.. جوازة مش عارف تتممها و قبل ده كله صلي من اجل تطهير روحك و نفسك لكي تكون مثل عروس مزينة لعريسها ياتي وقتما شاء هي في انتظاره
الرد... أريد فأطهر.. المسيح ده حنين اوي لا بعد وشه و قاله ايه القرف ده و لا قاله دلوقتي جيت بعد ما تذليت بخطيتك.. لا قال له اريد... الوحيد اللي ديماريا تروح له يقولك اريد... تحب تسمع صلاتي يارب في اي وقت.. اريد.. قادر تستحمل شكواي و دموعي.. اريد.. عاوز حضنك.. اريد... عاوز اعترفلك حتسمعني رغم زبالتي.. اريد... هي دي طريقة ربنا... ده زود علي كده معروف ان اللي يلمس نجس يتنجس ويحتاج الي تطهير.. قوم انت تروح تلمسه طب ما نجاسته تقع عليك يقولك عارف انا اشيل خطاياكم واديكم بري.. اخذ الذي لنا و اعطانا الذي له.. تتصور ده بيحصل في القداس في سر الرجعة لماابونا ينزل يبخر وسط الناس.. ابونا نازل يلم وساختنا بدل ما تعمله باي باي و لا تحدفله بوسه في الهوا طاطي راسك و اعترف بسرعة حياخد الزباله و يخش بيها علي المذبح و يرجع ياخد من بر المذبح قوم ييجي في اخر القداس تسمع القدسات للقديسين.. القدسات ده الجسد و الدم الكريمين طب و القديسين.. احنا.. بذمتكوا دي وشوش قديسين؟! لا طبعا بس هو لمسنا فاخذ الذي لنا و عطانا الذي له.. ياخد مننا الموت و يدينا حياة
43 فَانْتَهَرَهُ وَأَرْسَلَهُ لِلْوَقْتِ،
انتهره دي علشان كان مرض نتاج خطية و غالبا خطية نجاسة.. بس خد بالك تحنن جت الاول و بعدين الشفاء و بعدين العتاب و الانتهار.. مهما عملت ربنا عاوزك و لو عايل هم الرجوع حتلاقيه مستني.. يحضنك الاول و بعدين يعاتب
44 وَقَالَ لَهُ: «انْظُرْ، لاَ تَقُلْ لأَحَدٍ شَيْئًا، بَلِ اذْهَبْ أَرِ نَفْسَكَ لِلْكَاهِنِ وَقَدِّمْ عَنْ تَطْهِيرِكَ مَا أَمَرَ بِهِ مُوسَى، شَهَادَةً لَهُمْ».
لانه مرض موت و مرتبط بالنجاسة فان اللي يحكم بالشفاء اهل الخبرة و لكن من يعلن الشفاء هم الكهنة و هناك طقس خاص جدا لاستعلان قيامة هذا الميت للحياة
45 وَأَمَّا هُوَ فَخَرَجَ وَابْتَدَأَ يُنَادِي كَثِيرًا وَيُذِيعُ الْخَبَرَ، حَتَّى لَمْ يَعُدْ يَقْدِرُ أَنْ يَدْخُلَ مَدِينَةً ظَاهِرًا، بَلْ كَانَ خَارِجًا فِي مَوَاضِعَ خَالِيَةٍ، وَكَانُوا يَأْتُونَ إِلَيْهِ مِنْ كُلِّ نَاحِيَةٍ.
اللي يلمس يسوع يعجز ان يتوقف لسانه و قلبه عن الحديث عنه و الكرازة باسمه.. ياتون اليه من كل ناحية... ربنا بتاع الكل و حضنه للكل بس اللي ييجي.. ربناريسوع له جاذبية لمن يتبعه لدرجة ان اباء قديسين كانت احاديثهم العادية ديمافيها يسوع و ساعات منهم اللي كان يرد برد علي اي موضوع برد يقول انه مش هنا مش مع الناس..
يارب ان اردت تقدر ان تطهرني
لالهنا المجد الدائم
نبيل شحاتة