نعم ياسيد

[sama smsma]

تنويعات على اوتار انجيل مرقس اصحاح 7
نغمة 27
نعم ياسيد ..!!
ثُمَّ قَامَ مِنْ هُنَاكَ وَمَضَى إِلَى تُخُومِ صُورَ وَصَيْدَاءَ، وَدَخَلَ بَيْتًا وَهُوَ يُرِيدُ أَنْ لاَ يَعْلَمَ أَحَدٌ، فَلَمْ يَقْدِرْ أَنْ يَخْتَفِيَ،
25 لأَنَّ امْرَأَةً كَانَ بِابْنَتِهَا رُوحٌ نَجِسٌ سَمِعَتْ بِهِ، فَأَتَتْ وَخَرَّتْ عِنْدَ قَدَمَيْهِ.
26 وَكَانَتْ الامْرَأَةُ أُمَمِيَّةً، وَفِي جِنْسِهَا فِينِيقِيَّةً سُورِيَّةً. فَسَأَلَتْهُ أَنْ يُخْرِجَ الشَّيْطَانَ مِنِ ابْنَتِهَا.
27 وَأَمَّا يَسُوعُ فَقَالَ لَهَا: «دَعِي الْبَنِينَ أَوَّلاً يَشْبَعُونَ، لأَنَّهُ لَيْسَ حَسَنًا أَنْ يُؤْخَذَ خُبْزُ الْبَنِينَ وَيُطْرَحَ لِلْكِلاَبِ».
28 فَأَجَابَتْ وَقَالَتْ لَهُ: «نَعَمْ، يَا سَيِّدُ! وَالْكِلاَبُ أَيْضًا تَحْتَ الْمَائِدَةِ تَأْكُلُ مِنْ فُتَاتِ الْبَنِينَ!».
29 فَقَالَ لَهَا: «لأَجْلِ هذِهِ الْكَلِمَةِ، اذْهَبِي. قَدْ خَرَجَ الشَّيْطَانُ مِنِ ابْنَتِكِ».
30 فَذَهَبَتْ إِلَى بَيْتِهَا وَوَجَدَتِ الشَّيْطَانَ قَدْ خَرَجَ، وَالابْنَةَ مَطْرُوحَةً عَلَى الْفِرَاشِ.
31 ثُمَّ خَرَجَ أَيْضًا مِنْ تُخُومِ صُورَ وَصَيْدَاءَ، وَجَاءَ إِلَى بَحْرِ الْجَلِيلِ فِي وَسْطِ حُدُودِ الْمُدُنِ الْعَشْرِ.
ما استريحش المسيح للعبادة الشكلية و حكاية غسل الايادى دى فقام و مشى و راح لصور و صيدا يعنى ساب خاصته و راح للامم ... لما ربنا يلاقيك مشغول و مرتبك بحاجات ظاهرية ما يرتحش و يقوم و يبعد ...طب يدخل بيت و يختفى ليه لانه لسه ماكانش وقت كرازة الامم و كانه بس بيديهم عربون الخلاص كمان رد عملى على ظاهرية العبادة و نقص الحب و الرحمة عند اليهود فراح للى اليهود بيشوفوهم منتهى النجاسة و كانهم كلاب ..
تيجى المرأة السورية و يظهر سمعت عن يسوع فابتدت تصرخ له ان يرحمها لان ابنتها بها روح نجس و فى انجيل متى تقول مجنونة جدا .. خد بالك قالت زى ما سمعت يابن داود ارحمني هى مش من اليهود تعرف مين داود او مش متعمقة فى الايمان و لا الناموس ...لكن ايمانها يخليها تعدى المنطق و الفهم و تصدق بس ...هات طفل كده و شاور له على يسوع و قول له مين ده يقولك بابا يسوع .. هو مصدقها ببساطة و لا مدرك تجسد و لا فداء كل اللى يعرفه هو ده بابا يسوع اللى يعرف يعمل كل حاجة و بيحبه و بيحميه .. فى الاول حسب نص انجيل متى ما ردش المسيح و فضلت تصرخ لدرجة ان التلاميذ قالوا له مشيها ..عمالة تصرخ ورانا ..و بدل ما المسيح يمشيها يرد عليها برد شكله قاسى اوى ..خلى البنين يشبعوا الاول و ما ينفعش ناخد خبز البنين و نطرحه للكلاب ... طبعا يسوع صمته الول اللى يبان تجاهل و الجملة القاسية دى ما يقصدش معناها لكن بيقدم ليها فكر اليهود عنها و عن جنسها و بيدين فيها اليهود و خاصته اللى جه ليها و رفضته .. سكت الاول و ماردش لحد ما التلاميذ طلبوا منه كده انه يتدخل و دى بداية رسالتهم الى حب يعلمهالهم و يحطهم على اول الطريق للكرازة انهم سيكرزوا للامم و للوثنين كمان ردد الكلام الى كان بيتداوله اليهود لا عن قناعة لكن لكى يكسر هذا الكبرياء و العجرفة باستعلان ايمان هذه المرأة .. خد بالك شعب كنهان ده كان شعبا ملعونا من ايام نوح و منه نسل سدوم و عمورة و كان شعبا مستفحل فى الخطية و النجاسة و الشذوذ حتى مع الحيوانات .. اكيد ان السيد المسيح ما قالش هذه الجملة بطريقة قاسية او صادمة للمرأة بدليل انها اكملت الحوار ...هو عرض لها ما يراه اليهود و ما هى حقيقة و لكن بطريقة تحثها على التوبة و الاستمرار مش انها تنفر و تمشى ... ممكن خادم يلفت نظر واحد او شاب بطريقة منفرة تخليه يعاند و خادم حنين يشاور على الغلط طريقة تدفع للتوبة ...فيه ابونا يزقك على التوبة و يكشف الخطية مش بينتقصك لكن بيشجعك تتخلص منها ..عاوزة الحتة دى قلب حنين و حكمة و حب حقيقى ... فيه زوجة تمسك جوزها تهريه تانيب و ملامة لدرجة تخليه يتعصب و يزعق و يسيب البيت غضبان و فيه زوجة بحكمة تلومه و تعاتبه بس وهو فى حضنها و بين ايديها فتقتنيه ... كمان اكيد السيد عارف انها مش حتتراجع بالعكس كان عاوز يقدمها فى شكل يزكيها بيه ..و يرفعها بعد ما تتوب ..
نعم ياسيد ... دى علامة الموافقة منها .. ده اعتراف ضمنى ان جذورها فى النجاسة و من شعب مرفوض ... ما هللتش للمسيح و قالت له كلاب ايه و نجاسة ايه .. ليه شايفنى بمشى على اربعة و لا بهوهو ..!!! انت مخلص انت ؟ مالى .. هو انا مش بنت تسعة زى بقية الخلق .. لا ما عاندتش .. اتضعت قوم ربنا حيرفعها ...نعم ياسيد ... ايوه و انا بضم صوتى ليها و بقوله معاها ... نعم ياسيد ..انا باكد على كلامك ... ايوة انا زى الكلاب من جهة الاستحقاق لخلاصك و نعمك عليا بس هى القصة مش واقفة على استحقاقى لا ... دى واقفة على رحمتك اللى تخلى الكلاب تبقى قريبة من مائدة البنين و لما يشبعوا و ده حقهم ما هم ولادك و قديسين اكتر منى و بيحبوك بجد ...برضه فيه شوية فتافيت كده تلحسهم الكلاب برضى ...انا يارب مستحيل ابقى زى العدرا و لا مارجرجس و لا مارمينا و لا القديسين الحلوين دول و لا زى ليديا و لا فادى ولا عم نبيل حارس كنيستك و لا اى حد من ولادك اللى مشرفينك بس برضه انا ابنك حتى لو عاق بس يعنى مش حتموتنى من الجوع حتى لو مش نضيف حتى لو يعنى وصلت فى مزبلة خطيتى زى الكلاب برضه رحمتك على الكلاب واسعة ...انا مش حقدر ابقى فى مجد الانبا بيشوى و لا الشهيدة دميانة لكن معلش خدنى السما و لو اخر الصفوف ..ادينى الفتات و انا راضى ..صحيح مش ده طموحى بس للاسف دى امكانياتى ..
فى انجيل متى كرم السيد ايمان هذه المرأة و قال لها عظيم هو ايمانك .. و فى انجيل مرقس يشاور انه علشان الكلمة دى و الاعتراف الحلو ده و التوبة اللى من القلب دى حتاخد من يسوع كل البركة ... خرج الشيطان من ابنتك ..
يا صديقى صر على صراخك و لا تيأس .. حتى لو لم يجيبك اولا .. حتى لو كان الرد شكله عنيفا ... اتمسك برحمته و لا تطلقه ان لم يباركك .. النهاية سعيدة ..سيخرج الشيطان من ابنتك ..من نفسك ..من جوزك ..من مراتك .. من خدمتك ..من اللى واجعك ... مشكلتنا اننا مش بنعرف نلح على ربنا و ما تزعلوش كاننا كده تنكين فى طلباتنا !!!! نطلب مره و خلاص ... فيه زوجة نص طلباتها من جوزها و لا يعمل حاجة .. ليه .. ؟ تقولك انا ما طلبش او ما اكررش الطلب .. تناكة .. !! ما يمكن نسى ..ما يمكن ماجله مايمكن حيجيب احسن من اللى طلبتيه .. او زوج يقول حاجة و مراته ما تعملهاش من اول مره يروح يقولها انا مش قلت كذا ..خلا ص مش عاوز من وشك حاجة ..!!! و تجيبله مراته الحاجة و لا تعمله الشاى اللى طلبه يتعذرن و يقول مش طافح و يمشى ... الامور ما تجيش كده !! ربنا اب و يحب ياخد و يدى مع ولاده ...حب مش ذل ... بنتى تقولى عاوزة كذا ... ارد ليه انشاء الله ؟ تقولى علشان كذا و كذا ... و بدلع كده تقول ايه يا بابا .. اهزر و ارد ايه يابابا .. ككبو !! ..هرتونى مصاريف .. تهزر و تبوس و تحضن و يالولو اصلى نفسى فيها .. و انا احضن و اطبطب و اقول عينى .. انا بهزر معاكى و ازود على طلبها و ازيد ..عاوز استمتع بحبها ... عارفين ليه طلباتنا مش مجابة بسرعة مع ربنا علشان احنا ما بنعملش حاجة معاه غير اننا بنطلب و لانه بيحبنا ما بيصدق يبقى لنا طلب و يطول هو علشان نفضل قدامه اطول فترة و نكرر الوقوف و الحوار ...عارفين لو كنا اصلا بنقف نكلمه من غير حاجة و نحب فيه كده و يبقى هو محور حياتنا طلباتنا تتنفذ كده بطرقعة صباع لو فيها خيرنا طبعا ...انا كنت استعجب لما اسمع عن البابا كيرلس يقول لحد مثلا مارمينا حيجيلك النهارده او حبعتله مارمينا ... كده من غير تكليف و كده بالسرعة دى ...ااااه اصلهم اصحاب و بيتكلموا على طول فمافيش مقدمات بقه لسه ...
نعم ياسيد ..و الكلاب ايضا تحت المائدة تاكل من فتات البنين
لالهنا المجد و الكرامة



نبيل شحاتة