البراءة

[sama smsma]

تنويعات على اوتار انجيل مرقس اصحاح
نغمة 43
البراءة


وَفِي الصَّبَاحِ إِذْ كَانُوا مُجْتَازِينَ رَأَوْا التِّينَةَ قَدْ يَبِسَتْ مِنَ الأُصُولِ،
21 فَتَذَكَّرَ بُطْرُسُ وَقَالَ لَهُ: «يَا سَيِّدِي، انْظُرْ! اَلتِّينَةُ الَّتِي لَعَنْتَهَا قَدْ يَبِسَتْ!»
22 فَأَجَابَ يَسُوعُ وَقَالَ لَهُمْ : «لِيَكُنْ لَكُمْ إِيمَانٌ بِاللهِ.
23 لأَنِّي الْحَقَّ أَقُولُ لَكُمْ: إِنَّ مَنْ قَالَ لِهذَا الْجَبَلِ: انْتَقِلْ وَانْطَرِحْ فِي الْبَحْرِ! وَلاَ يَشُكُّ فِي قَلْبِهِ، بَلْ يُؤْمِنُ أَنَّ مَا يَقُولُهُ يَكُونُ، فَمَهْمَا قَالَ يَكُونُ لَهُ.
24 لِذلِكَ أَقُولُ لَكُمْ: كُلُّ مَا تَطْلُبُونَهُ حِينَمَا تُصَلُّونَ، فَآمِنُوا أَنْ تَنَالُوهُ، فَيَكُونَ لَكُمْ.
25 وَمَتَى وَقَفْتُمْ تُصَلُّونَ، فَاغْفِرُوا إِنْ كَانَ لَكُمْ عَلَى أَحَدٍ شَيْءٌ، لِكَيْ يَغْفِرَ لَكُمْ أَيْضًا أَبُوكُمُ الَّذِي فِي السَّمَاوَاتِ زَلاَتِكُمْ.
26 وَإِنْ لَمْ تَغْفِرُوا أَنْتُمْ لاَ يَغْفِرْ أَبُوكُمُ الَّذِي فِي السَّمَاوَاتِ أَيْضًا زَلاَتِكُمْ.

التينة يبست من الاصول ... خطر دى ... ربنا ما يسمحش لحد فينا ييبس من الاصول .. تقع ورقة اتنين .. ينكسر فرع لكن ما نييبسش من الاصول ...فى لوقا حكى حكاية تشاور على ان الامر كان وراؤه بعد اخر مش قصة شجرة و يسوع جعان مالقاش ثمر غضب لا ...فيه بعد اعمق
6 وقال هذا المثل.كانت لواحد شجرة تين مغروسة في كرمه.فاتى يطلب فيها ثمرا ولم يجد.7 فقال للكرام هوذا ثلاثة سنين اتي اطلب ثمرا في هذه التينة ولم اجد.اقطعها.لماذا تبطل الارض ايضا.8 فاجاب وقال له يا سيد اتركها هذه السنة ايضا حتى انقب حولها واضع زبلا.9 فان صنعت ثمرا والا ففيما بعد تقطعه ..
على كل واحد فينا يحذر ان يكون له ورق بلا ثمر و عمال يجف فى اصوله ...خادم و متحرك و بتاع تمثيل و بتاع كورال و خدمة عشوائيات و انشطة روحية و فنية ... ورق ... بس لو من غير اصول طبيعى تجف ...حتة كده ربنا قالها لما اتكلم عن مثل الزارع ان فيه بذور وقعت على الارض المحجرة و طلعت نبات بسرعة بس احترق من الشمس يقولك اذ لم يكن له اصل جف ... نسمع عظة لابونا فلان و الخادم الفلانى و نتأثر و ندمع و فى نفس اللحظة و ات ذا مومنت اللى مخصماها تشوفيها قدامك تدورى وشك و ما فيش قرار رجوع عن عناد و لا قرار توبة ...مجرد فرح و تمنى بلا خطوات او تدب جذورك فى الارض و يبقى ليك اصل فتثمر ....جفت من الاصول ... الاسرار المقدسة كلها تساعد على ان تروى التينة و لا تجف .. الانتماء للكنيسة و بليتورجيتها و عبادتها و ابوتها و جذورها يخليك ما تجفش و ما تطلعش ورق فاضى ... انا واحد من كتير لينا ورق بس ما فيش ثمر ... لينا شكل بس مش بتوع صليب بجد ..
يسوع رد على تعجب بطرس انه طلب منه ان يكون له ايمان بالله .. مع ان قبلها بيوم شافوا الشجرة بتدبل و تعجبوا ... الايمان مش استعراض قوة و طلب معجزات عمال على بطال ... قول الجبل انطرح فى البحر ...مش فعليا و لكن الجبل ليه اشارات كتير منها اشارات للست العدرا و منها للسيد المسيح نفسه و منها للكنيسة و المعنى العام بقوة الايمان ممكن ليسوع ان يدخل الى قلبك المضرب اللى بيمثله بحر العالم اللى لا يشرب و لا يروى ...الله يستطيع التغيير ... الله يمكن ان يحول بحر الاضطراب الى جبل استقرار بكلمة ايمان حقيقية و ثقة لا يغلبها شك او زمن ...صلى ... هى ده الكلمة اللى بنسمعها كتير و ساعات بنسمعها بفتور لاننا كم من مرة صلينا و لم يرفع ... و ساعات نعتبرها قلة حيلة ...ده ساعات لما يقولها ابونا لابنه فى الاعتراف يفتكر ان ابونا بيقصر معاه و لا بيخلصه بسرعة و يقوله يعنى ما فيش حاجة اعملها و لا حتى ارشاد ... ابونا ميخائيل ابراهيم القديس ما كنش يعرف غيرها ... و مرة كان حاضر لجنة الاكليركية بتاعة الخلافات الزوجية .... و احتدام الغضب و الخلاف بين الزوجين و اتهامات و ثورة و تجاوز و حاضر اللجنة اسقف و اباء ... ابونا ميخائيل ساكت .. سخن الموضوع و من غير حل ...فالاسقف عاوز يفتح باب فقال لابونا ما تكلمتش قدسك يعنى يا ابونا ميخيائيل ... نعمل ايه ... ابونا قال نصلى ياسيدنا ...سيدنا يعنى الرد ما بردهوش اوى ما هم ابتدوا بالصلاة و لكن لقيمة ابونا ميخائيل قال اللى تشوفه يا ابونا ...وقفوا يصلوا و كان يقول ابونا ابانا الذى فى السموات على مهله ... ابتدا ابانا الذى فى السموات و فى نصها سمع الاسقف نهنئةو بكاء ورا .. بص بطرف عينه لقى الزوجة بتبكى بحرقة و يظهر صعبت على جوزها فراح يمسك ايديها و يطبطب عليها فانهارت و تمت المصالحة ... الاسقف قال لابونا بقالنا 3 ساعات قدسك مش كنت تصلى من بدرى ياراجل يا طيب ..
بس علشان تصلى و تاخد لازم قبل ما تصلى تغفر ... ما فيش عطايا بناخدها فى الصلاة لاننا ما بنغفرش .. كلمة مش مسمحاه و مش مسامحها دى تعطل كتير ... اه واخد على خاطرك وواخدة على خاطرك بس اغفرى و بعد شوية الغضب يروح و المصالحة تتم ... اغفر ... اغفرى ... اقف قوله ادينى اغفر لو مش عارف .. قوله لو دخوله السماء واقف عليا انا بقولك اهه انا غافرله او غافرلها .. الغفران اهم من التناول !!!! تقول ايه ده ده انت هتهرطق ... الغفران اهم من جسد المسيح و دمه اقولك هو قال كده لو لاخوك حاجة عليك اترك مذبحك و اذهب اصطلح اولا مع اخيك ... يعنى سيب المذبح و الذبيحة و اتصالح ...علشان كده الكنيسة تحط صلاة الصلح قبل ما نبدأ القداس و بعد قداس الموعوظين .. قبلوا بعضكم بعضا بقبلة مقدسة ...لو واقف جنب اللى مخاصمه و مد ايه حتقبلها و لا حتعمل نفسك مش شايفه .....
ممكن تعمل كل بلاوى الدنيا بس لو مسكت فى الغفران دى تطلع براءة 100 فى ال 100 و لما ييجى يقولى عملت و عملت و عملت و اتنجست و ادنت و اتراخيت و خنت و سرقت و ما كنتش امين و .. و .. و ... الخ و كله بالمستندات طبعا
ارد اقوله عندك حق يارب ..كل ده معترف بيه من اول قلم و مش حقدر ارفع عينى فيك بس فى حاجة قبل ما تحكم ... فى المادة 25 و 26 من انجيل مرقس اصحاح 11 حضرتك قلت فَاغْفِرُوا إِنْ كَانَ لَكُمْ عَلَى أَحَدٍ شَيْءٌ، لِكَيْ يَغْفِرَ لَكُمْ أَيْضًا أَبُوكُمُ الَّذِي فِي السَّمَاوَاتِ زَلاَتِكُمْ.
وَإِنْ لَمْ تَغْفِرُوا أَنْتُمْ لاَ يَغْفِرْ أَبُوكُمُ الَّذِي فِي السَّمَاوَاتِ أَيْضًا زَلاَتِكُمْ و حضرتك انا بحقى الدستورى اللى حضرتك عطتهولى لما قلت هلم نتحاجج يقول الرب ... انا اطالب بحكم البراءة جملة و تفصيلا و ايداعى الملكوت حتى لو فى اقل مكان نظرا لكم البلاوى اللى عملتها لكن انا ما شلتش من حد و غفرت طول ايامى لكل الناس ... فلو سمحت و تحضرنا العدرا و الملايكة انا متمسك بالمادة دى ... اكيد حتسمع براءة .. ادخل الى فرح سيدك ... اللى بعده
لالهنا المجد و الكرامة الى الابد امين



نبيل شحاتة