كلنا بنعمل صح وبنعمل غلط

[marit jesus]

لكن كثير مننا مش قادرين يتخيلوا إن الأب...إنسان...!
له حسناته وعنده نقاط ضعف...ونقاط قوة.
ساعات الأب بيبقى قاسي قوي...علشان هو عاجز قوي.
وساعات مش قادر يعبر...ويبقى حزين إنه مش قادر يكون كويس.
وساعات حزين إن إيده مش طايلة.
وساعات الأب بيبقى تعب وشقي وهو صغير...وشايف إنك متدلع.
أنا مثلا أبويا الله يرحمه...طول عمره شايف إني عيل فرفور، ومش عايش عيشة أهلي، ومش بتاع شغل
- دي وجهات نظر...يا حاج...الله يبارك لك !
هو شايف إن اللي ما ينزلش يشتغل أي حاجة في أي مجال...فهو مش عيل جدع.
وأنا طول عمري شايف قوتي في عقلي...رغم إني كنت قوي جسديا والحمد لله.
لكن كنت شايف إن الواحد بعقله وتركيزه على تطوير مهاراته، وتنمية مواهبه.
يقدر يحقق أكثر بكثير من إنه يضيع وقت في شغل بيتطلب مجهود بدني كبير.
طبعا الظروف ساعات تجبرك إنك تشتغل، في مجالات أنت مش عايزها...على عكس تخطيطك لمشوارك.
لكن الذكاء والقدرة والرغبة في تحقيق الحلم.
تخليك تتعامل مع الظروف دي كمرحلة مؤقتة.
وترجع تاني تشتغل على نقاط قوتك وتنمي مهاراتك ومواهبك.
مثلا،،،
أبويا كان شايف إني لما أجيب جهاز كمبيوتر، هضيع وقتي في اللعب والجيمز.
وجهة نظر سليمة جدا...وصحيح كنت بعمل كده في أوقات كثير في البداية.
لكن أنا فعلا كنت محتاج كمبيوتر، علشان أطبق عملي اللي بدرسه نظري. وفعلا جبت كمبيوتر وأتعلمت ونجحت بعد مجهود خرافي والحمد لله.
ساعتها أنا وأبويا كنا بنختلف...وساعات أزعل منه.
لكن لما كبرت...عرفت إن هو كان بيبص على العائلة كلها.
ليه يجيب لي جهاز كمبيوتر أنا المستفيد الوحيد منه؟
وكمان هو عارف إني هتحكم في الجهاز.
أنا شخصيتي جامدة شويتين...ولسه كنت مراهق وعنيد ومتمرد
ويمكن قدراته وأمكانياته ما تسمحش برفاهية جهاز كمبيوتر لي لوحدي...ومش عارف يجيب إيه لأخويا...ومش عارف إيه لأختي...!
يبقى نجيب حاجة تخدم البيت كله...والكل يفرح بها.
وجهات نظر...ومختلفين مع بعض...!
هو عارف إني شاطر وطموح.
بس هو عنده حسبته...اللي هو مسئول عنها.
أنا صمتت على حلمي...وبذلت المجهود اللي يتناسب مع رغبتي في تحقيق حلمي.
زعلنا سوا...شوية واثنين وثلاثة.
بس بعد كده فهمته.
عرفت يعني إيه الأب بيبقى شايف إن فيه ابن أقوي من التاني.
فبيدعم الضعيف شوية أكثر.
صحيح مش مفروض يظلم القوي...بس الأب بيحاول يعدل الكفة شوية.
هتحس ساعتها بشوية ظلم...يمكن!
بس هي حسبة مش هتفهمها غير لما يبقى عندك أولاد.
هتعرف يعني إيه طفلين...ويعني إيه هم عينيك الاثنين.
ما تقدرش تضحي بعين علشان التانية.
بس لما عين فيهم توجعك...هتراعيها أكثر شوية.
فيا ريت تقدروا ضعف الآباء...لو كانوا ضعفاء، وعندهم مشاكل في التواصل أو التعبير أو توزيع المشاعر...ممكن فعلا مش بيعرفوا يتواصلوا.
ويا ريت تحاولوا تفهموا قراراتهم وتقدروها.
والأهم تعرفوا إن كلنا بشر...
كلنا ضعفاء...
كلنا بنعمل صح وبنعمل غلط