محتاجين اعادة نظر

[walaa farouk]

ندى رأى غريب شوية بالنسبة لموضوع الامراض المنتشرة واللى بتزيد فى الانتشار كل يوم :
1- الله مش سبب فى 95 % من الامراض اللى بنتعرض ليها
2- فيه امراض كتيرة سببها الانسان نفسه واهماله لصحته .. ياعنى مثلاُ لما تشرب سجاير كتير ويجيلك سرطان رئة ماتقولش ليه يارب .. وفيه امثلة كتير على نفس الشكل
3- فيه امراض كتير سببها البيئة الغير نظيفة اللى بقينا عايشين فيها مش بس بلدنا لكن فى العالم كله عايشين فيها على دخان المصانع وعوادم السيارات واشعاعات الليزر والموجات الكهرومغناطيسية للواى فاى والنت والموبايلات وكل الاجهزة الالكترونية اللى مالية حياتنا ليل نهار
4- فيه امراض سببها كتير من التجارب والابحاث الغير ادمية اللى جرت على بشر وتم تناقلها وتكرار العدوى والاصابة بيها زى الجمرة الخبيثة وغيرها .. وزى اختراع مواد مخدرة للتأثير على ادمغة البشر واللى بيتم تسريبها وسرقتها مقابل ملايين من الدولارات عشان توصل لناس مدمنة تشتغل على تدمير جهازهم العصبى
5- فيه امراض سببها الاكل الغير صحى واللى بيتزرع ويترش بكتير من المبيدات والمواد الكيماوية والمسرطنة .. قيس كمان على الهواء الملوت والماية الملوثة .. والاكل اللى بنشتريه من برا واللى معظمه فيه مكسبات طعم ولون ورائحة او مواد حافظة اللى ضررها متراكم جدا على الجسم وبيسبب كتير من الامراض
6- فيه امراض سببها سوء التغذية .. وعدم الرياضة .. وعدم اعطاء اجسامنا اللى بتحتاجه من مغذيات وفيتامينات ومكملات غذائية
7- فيه امراض كتير سببها الادوية اللى بيكون ليها تأثيرات جانبية متراكمة تكاد تكون اصعب مليون مرة من المرض اللى بنتعالج منه فى الاساس
8- كتير من الامراض بتتنقل لينا بالجينات من ناس مريضة فى عائلتنا .. ويستمر المسلسل جيل ورا جيل
*
*
ملخص كل الكلام ( المختصر اللى فات ) .. ان الانسان هو اللى بيدمر نفسه بنفسه وبيدمر بيئته وصحته اجيال ورا اجيال .. وربنا مالوش اى دخل فى المعمعة اللى احنا بنحط نفسنا فيها ونتهمه هو فى الاخر بصنعها تحت عناوين روحية ( تجربة ، صليب ، ربنا بيشوف ايمانك ) .. ربنا مابيتلذذش زى مافيه ناس بتعتقد بمرض او ألم انسان .. لا طفل صغير ولا كبير .. الله يشفى ولا يُمرض .. يداوى ولا يُؤذى .. العالم بكل مافيه اصبح موبوء وكل انسان مُعرض انه فى اى وقت جسمه يتصاب بمرض بسبب حاجات احنا البشر اللى سبب فيها سواء بقصدنا او لا .. سواء بإهمالنا او بجشعنا او بابحاثنا او بتجاربنا او بتكنولوجيتنا الغير نظيفة او بالكيماوى او بالنووى اللى قادر على فناء الجنس البشرى كله فى لحظات .. وزى مابنأذى بعض نفسياً وبنتوارث الامراض النفسية ديه .. وزى مابنعثر بعض روحياً وبنتوارث العقد الروحية ديه من خلال التربية .. احنا كمان بنمرض بعض جسدنياً حتى لو بطرق غير مباشرة وبرضو بنتوارث الامراض ديه
*
*
ملحوظة : الله مش محتاج من حد انه يدافع عنه .. لكن طريقتنا الصبيانية فى العتاب واللوم بلا اى تفكير بقت محتاجة اعادة نظر بطريقة علمية وواقعية وياريت لو بحثية .. ومش معنى عدم جهلنا بمصدر المرض اننا نحولها على ربنا كمصدر لكل الامراض