' رساله من ابن لأبيه

[walaa farouk]

'


• بابا حبيبي ..
انا عارف ومتاكد من حبك ليا. وعارف انك عاوزني أكون انسان ناجح وسوى و متميز وتفرح وتفتخر بيا ..بس ليا كام ملحوظه كده كنت عايز ألفت نظرك ليهم. .لو تسمح لي ..
○ممكن يا بابا تحبني حب من غير شروط .يعني حب نقي .حب ابوي .حب من غير مقابل .حب ما يقفش لما اغلط.
○وياريت لما يكون فيه حد معانا ما تتريقش عليا أو تسخر مني وتقول اخطائي قدامهم وتحرجني وتقلل من قيمتي..خلي كلامك معايا بينك وبينك في بيتنا ..
○بابا ..لما تقولي علي حاجه اعملها .انا محتاج الأول اشوفك بتعملها. .علمهاني بحياتك مش بكلامك .انت قدوتي يا ابوي.
○بابا ..من فضلك ..أرجوك. .
ما تقارنيش بحد من أخواتي أو أصحابي أو قرايبي. كل واحد فينا ليه مهاراته وامكانياته وقدرات ربنا ادهاله. فمفيش داعي تقارني بحد وتظلمني وتشوة شخصيتي وتفقدتي ثقتي بنفسي وتشعرني بالنقص .
○اديني يا بابا من وقتك شويه ..انا محتاج اقعد معاك. ..احكي معاك ..العب معاك ..اهزر معاك ..اتدلع معاك ..اسمعك ..وتسمعني. .انت ابويا ومن حقي اعمل كده ..
○يا ابويا انا انسان ليا شخصيتي وكياني وميولي واهتماماتي. .اقبلني زي مانا كده .وساعدني اطور من نفسي .وشجعني. ..انا محتاج تشجيعك اوي ...
○احميني يا بابا .بس مش الحمايه الزياده اللي تخليني معرفش اعتمد علي نفسي وتعلمني الاتكاليه عليك أو علي ماما .ومعرفش بعد كده اخد قرار من نفسي طول عمري ..
○أتفاهم يا بابا انت وماما .عشان تعرفوا تعلمونا وتربونا تربيه حلوة انا واخواتي ..طول مانتوا مختلفين وبتتخانقوا عمال علي بطال كده ..احنا مش ها نطلع زي مانتوا عايزين. لكن ها نطلع زي مانتوا عايشين ..
عارف يا بابا لو عملت كده ...صدقني
ها تشوفنا احلي اولاد في الدنيا كلها ..