في الممنوع!

[walaa farouk]

لما الممنوع يبقي ليه شكل واضح بيخلي الواحد ياخد باله من حاجه ولا اتنين أو حتي اكتر شوية.. بيبقي مش بس مقبول دا بيبقي مريح .. بيخلي الواحد عارف حدوده وأخره فين.
لكن في نوع أغلبنا اتربينا عليه اسمه " آه كدا والسلام" دا اللي بسميه ممنوع عايم ومش محدد .. ممنوع مالوش ملامح .. و مالوش حدود.
دا بيعمل حصار، ايوه حصار ..بيخلي الواحد ماشي باصص حواليه ، وراه، قدّامه، جنبه، تحته، فوقيه..جواه وبراه..لحد ما يجي وقت ويحس إن دي مش عيشه! ولا حتي حصلت موته!! و لا نقدر نسميها سجن .. دا جنان.. دا غلط ، دا مرض ولا يمت للصح بصلة!
لما الواحد تلاقيه بيدور هو ليه ملبوخ و تايه ليه خايف من كل جديد و ليه قلقان لحسن يكون مش قد الحاجات ..و شعور الْخِزْي ملازمه... يجي حل من اتنين :-
يا إما يقعد ويحاول يفهم ويسال أسئلة من نوعية ازاي، و ليه؟ و يتشحتف شوية ويتغاظ شويتين من اللي اتعمل فيه، ومن الناس، و من الظروف اللي خلته هو و الخوف من الغلط( الممنوع العايم) واحد .
وقبل ما أقول الاختيار التاني بشوف إنه في ممنوعات خفيه.. يعني تلاقي الأهل بيخلقوها( قاصدين أو لأ)
ممنوعات بتستخبي ورا كلمة الحرص، و الأمان الزايد، و لحسن، ولو، و احتياطي ..و محدش عارف، و من خاف سلم.. دول علي بعض يخلقوا خوف مسيطر خوف بيحرك كل الأمور .. خوف مصاحب الواحد زي الشيلة التقيلة اللي مش عارف يفارقها.
خوف ذكي ، يخلي رد الفعل عند الطفل( او حتي الكبير) عبارة عن مقاومة.. عِند.. أو كبرياء.. خوف يمنع من معرفة القوة اللي جوه كل واحد ، يمنع استغلالهم لامكانياتهم.. ويمكن في البعض يوصل إنهم يصدقوا إن معندهمش إمكانيات اصلاً 😞
خوف زي الحبل السري، طويل و مرن .. وفيه حجج إنه مفيد بس اللي محتاجه فقط هو الجنين .. اللي لسه ما طلعش للدنيا مش حتي الطفل !!!!
و الحبل مش باين أخره من أوله، ابتدي منين و العقد تنفك ازاي و مين قبل مين ؟
خوف ذكي ، أذكي مني ..
خلاني عنيده ، مقاومة.. وعندي كبرياء
خلي عندي عدم تقدير للقوة اللي جوايا
عدم استغلال لإمكانياتي وصدقت اني معنديش إمكانيات اصلاً!
خوف كان زي الحبل السري ،طويل و مرن .. وفيه حجج انه مفيد بس اللي محتاجه فقط هو الجنين .. مش حتي الطفل !!!!
و الحبل مش باين أخره من أوله، ابتدي منين و العُقَّد تنفك ازاي و مين قبل مين ؟
أما الحل التاني، فهو إن كل حد بيربي يدور يفك خوفه الأول و يدور علي نفسه و يصدق إن الواحد طالما بيدور علي ذاته هيلاقيها. حته حته هتظهر .. و هتبان و هتتفاجيء بيها كمان!
ساعتها هتقدري تفرقي ما بين مباديء كتير و تقدري تدي الحرية لولادك دون الخوف العايم دا ..ساعتها هتعملي الحدود وانتِ متطمنه و هتشوفي أولادك واثقين في نفسهم!
بقول مع كل أم بتحاول وبتدرس و بتتعلم و بتتغير :" دلوقتي بعد ما عرفت ديتك يا خوف ، خلاص جه وقت أوقف أدور هفكها منين .
جه وقت أقطعه .. مش لازمني وجودك مش عايزاك، دلوقتي شفت إني مش محتاجه الخوف عشان أحافظ علي نفسي ولا علي اللي عندي .. عندي طريقي اللي لسه همشي فيه وانا حره، مش هاحط قيود تانية علي نفسي..مش هاحط نفسي تحت قيد الخوف ... روح يا خوف بكل تفاصيلك ،امشي و خد شيلتك التقيلة معاك، وسع عشان اعرف امشي سكتي و عشان أكون أنا وعشان كل ما اعرف نفسي كل ما هعرف أحيا الحياة مش أعيشها بس

.....