حقك علينا يارب

[walaa farouk]

لو واحد من اصحابك عمل فيك جميل ..
او حد من قرايبك ..

تلاقى البوست منور بصورته ..
ومنشن للجدع والسند ..
اللى عمل موقف ..
يتحفر فى التاريخ ..
من كتر ماهو فظيع وشنيع ومريع ..

رغم ان اقصى حدود تصرفه ..
لا يتعدى حد الطبيعى ..
لأنه بشر ..
واكيد انت تقدر تعمل زيه ..
او اى حد تانى ..
بيحب من قلبه ..
ممكن يعمل كدة ..

والواحد مابيبقاش مصدق نفسه ..
من فظاعة وهول الجدعنة ..
ومع ذلك ..
كلنا بنؤكد ان الدنيا لسة فيها خير ..

المفاجأة الكبرى بقى ..
واللى صدمتنى فعلا ..
لما تتحط بجد فى موقف ..
وماحدش ينفع يعمل لك حاجة ..

وربنا بجلال قدره ..
يقف جنب الواحد ..
ويسخر له امور وظروف كتير ..
ويعمل معاه حاجات فوق الطبيعى ..

ودى حاجة مش غريبة ..
ماهو لو اللى ربنا هيعمله طبيعى ..

يبقى مرحب بكل حد بيشكك فى وجوده ..
بما ان كل حاجة هتحصل ..
هنخضعها للطبيعى ..

والاغرب ..
ان ييجى حد ..
يصمم انه يترجم اى حاجة بتحصل ..
ويخضعها للمنطق ..
ولو المنطق ماقبلهاش ..
يبقى اكيد اللى بيحصل ده كدب وتأليف ..

وكأن ربنا له كل الاجلال والتعظيم والقدرة ..
اللى انزل الطوفان ..
وشق البحر ..
وخالق وضابط الكون كله ..

جه الوقت اللى مابقاش ينفع ..
نصدق اى تصرفات فوق المنطق ..

ولقينا كلام كتير يخرجنا من المأزق ده ..
صدفة ..
اكيد الناس متفقين يعملوا معاك كدة ..
ياعم انت بتهول اللى بيحصل ..
فكر كدة هتلاقى اللى بيحصل معاك عادى ..

وهى ولا صدفة ..
ولا اتفاقات ..
ولا تهويل ..
ولا اللى بيحصل عادى ..

احنا بس اللى اتعودنا على رحمة ربنا ..
وبقينا فاكرين ان ده الطبيعى ..

يعنى اللى بيتجوز ..
طبيعى جدا يتوقع ان ربنا يديله طفل ..
ولو ربنا ماسمحش ..
يبقى ربنا يتزعل منه ..

طب كام واحد من اللى ربنا اداهم ..
ادرك المعجزة فى انه يكون السبب ..
فى ولادة انسان جديد للعالم ..

اقصى تعبير بنقوله وقت الولادة ..
سبحان مين بيخلص روح من روح ..

هو صحيح مش هتعرف تعمل بوست ..
وتحط صورة ..
بس سهم جدا تعمل منشن ..
سهل جدا تعترف بينك وبين نفسك ..
ان اللى انت فيه ده كله ..
يستاهل الحمد ..
لأنه ماينفعش حد غير ربنا يعملهولك ..
سهل جدا تتكلم فى كل حتة ..
ومع كل حد ..
وبكل طريقة ..
عن اللى ربنا عمله معاك ..
ويقينك ..
ان ماحدش كان ممكن ينجيك ..
غيره ..

من غير تمييز ..
لدينك او لجنسك ..
للغتك او لشكلك او للونك ..
اقولك ..
من غير تمييز حتى لطايفتك او عقيدتك ..

السؤال اللى بيطرح نفسه ..
ازاى هيكبر جواك ايمانك بربنا ..
فى ارض المنطقية اللى الناس هيسعوا بيها ..
لترجمة كل حاجة بتحصل ..
حتى لو خارج حدود امكانياتهم ..

أرض الايمان ثقة .. مش منطق ..
حقك علينا يارب ..

والكلام ده حقيقى جدااا ...

أمير تادرس