بهدلتنا لنفسنا

[walaa farouk]

كلنا غلطنا في حق غيرنا كتير، بس لو دورنا هنلاقي أكتر حد ظلمناه و محتاجين نصالحه هو " نفسنا ". محتاجين نصالح نفسنا بكلمتين حلوين، بناس حلوة نعرفهم يكحتوا الصدا اللي اللي قبلهم سابه علينا، محتاجين نصالح نفسنا بشوية رياضة، بالقرب من ربنا، بإننا ننجح عشان احترامنا و حبنا لنفسنا يرجع، بإننا نوعد نفسنا إننا مش هنعيش عالة ولا درجة تانية ولا نص نص تاني في أي حاجة .. محتاجين تدين من النوع اللي يدينا أمل و بهجة في الحياة، و ثقة في كرم ربنا، و شياكة و جمال في المظهر و الكلام و المعاملة .. محتاجين نصالح نفسنا بإننا نفلتر كل حاجة داخلة علي عقولنا و قلوبنا .. مانخليش حد يرمي فضلاتة في وداننا، نعمل unlike للصفحات اللي بتحدف علينا عُمق و سواد و كآبة، ننهي أو نحدد علاقتنا بالناس اللي بتحبطنا و بتشدنا لورا و بتقلل مننا، نشتغل علي نفسنا عشان ناكل لقمة محترمة و نلبس هدمة محترمة و نعيش في وسط لائق بدل ما نصحي علي الشتيمة و الخناقات .. محتاجين نخلي وكيلنا و سندنا و قوتنا في الحياة ربنا و بس .. محتاجين نقضي وقت أطول مع اللي بيحبونا، و ندوس علي الأعذار الواهية العبيطة اللي بتجبرنا نقعد و نسمع لناس بتكرهنا و بيحقدوا علينا، محتاجين نختار أفكارنا عشان أفكارنا هتبقي كلامنا، و كلامنا هيبقي أفعالنا .. و كلامنا بيأثر فينا قبل ما بيأثر في غيرنا .. ماينفعش النفس اللي ربنا كرّمها إحنا نهينها .. حتي الحاجات اللي خارجة عن إرادتنا لما تحصل، لازم نشوف وسيلة نطبطب بيها علي نفسنا بعدها و تخلينا نقدر نتعايش من غير ما ندبل و نشيخ. محتاجين نزود احترامنا لنفسنا بإننا نبقي ناس صالحين و نضاف و محترمين و روحنا حلوة. سامحنا يا رب علي البهدلة اللي بهدلناها لأمانتك اللي اديتهالنا : "نفسنا".