النفس اللوامة

[walaa farouk]

أي كلام بين اتنين لا يمكن إثباته لما واحد فيهم يكذب؛ يبقى كلامه قُصاد كلامك.
تجاربي الشخصية البسيطة مع الدنيا، واللي سمعته من وعن مؤلفي المواقف الأخلاقية بتاعتهم، واللا أخلاقية بتاعة التانيين، المعذبين - في كدبهم يا عيني - بشرور الآخر دائما، والكدّابين، والنصّابين، ومحترفي الكلام، بتنصحك إنك ما تحاولش تدافع عن نفسك؛ إسكت وابقى لطيف مع روحك.
الناس دي - بيصدّقوا نفسهم وهيضحكوا على روحهم زي ما بيضحكوا على الناس، ويمنعوا عن نفسهم خيرهم، ويغلوشوا على نفسهم الحقيقة المفيدة، ويعطّلوا البصيرة بتاعتهم.
الناس دي فاكرة إنها أذكى من نفسها
فاكرين إنهم هيعرفوا يسلكوا مع روحهم زي ما سلكوا مع التانيين.
دا - في رأيي - عقابهم الشديد لنفسهم.
النفس لوّامة وشديدة العقاب؛ وعقابها خبيث؛
واللي دفنه الكدّاب عن نفسه تحت سجاجيده، وورا كَنَبُه، وفوق سندرته، يلمّ عليه دودُه وحشراته.
عدوه مش إنت، عدوه هو.