البابا إللى مانعرفهوش

[walaa farouk]

قلت له كدة بالنص ..

انا من اللى طلعوا للدنيا ..
مايعرفوش غير بابا واحد للكنيسة ..
"البابا شنودة"

لما رجع السما .. انهارت ..
لأنى حسيت ان السند راح خلاص ..

ولما ابتدينا فى مرحلة القرعة ..
ماكنتش فاهم يعنى ايه ..
ييجى بابا تانى ياخد مكان بابا ..

قلت له كدة فى وشه ..
وهو على وشه ابتسامة ..
مالهاش وصف بصراحة ..

قلت له ..
اللى حصل فجأة ..
انه بمجرد ما اعلن اسم قداستك ..
لقيت نفسى فرحان جدااا ..
ووقفت اتنطط قدام التليفزيون ..

وكان سؤاله ..
طب انت تعرفنى منين عشان تفرح ..

قلت له قداستك مش سبب الفرحة ..
دى عظمة كنيستنا ..
وعظمة المحبة اللى المسيح بيحطها فى قلوبنا ..
للى بيشغل المنصب ده ..

وكأنه بيقول ان الابوة دى ..
انا مصدرها ..
مش الشخص اللى فى المنصب ..

وبمنتهى الاتضاع ونفس الضحكة ..
قاللى عندك حق ..

قلت له طب انا عندى مشكلة ..
ان الناس برة مش شايفاك على حقيقتك ..

قاللى .. تفتكر ليه؟
قلت له لازم تطلع للشعب ..
لما يبقى فيه جدل فى موضوع ..
لازم التوضيح ييجى منك ..

انا باقول له .. "لازم" ..

وهو بمنتهى المحبة ونفس الضحكة ..
قاللى هافهمك ..

وابتدا يقوللى بالأرقام ..
عندنا كام اسقف .. وكام كاهن ..
كام كنيسة .. وكام دير .. وكام شماس كبير ..
وكام مكرسة .. وعدد الأقباط الارثوذكس ..

قاللى الكنيسة مؤسسة عظيمة ..
ماينفعش اختزل كل دول فى شخص البابا ..

قاللى انا عارف اللى بيتقال عليا ..
قلت له ..
لما قالوا عليك بتبيع الأرثوذكسية ..
وبتوقع على معاهدات ..
وكأنك مش فاهم ..
وكأنك مش مدرك حجم المسئولية اللى عليك ..
وكأنك مش عارف انك هتتسئل عن ملايين قدام ربنا ..

ضحك وقاللى ..
مش لازم اعلن كل اللى باعمله ..

بس ابسط رد هاقولهولك ..
فيه فرق بين .. بيان .. ومعاهدة .. ووثيقة ..

اللى حصل بين كنيسة مصر وكنيسة روما ..
دا اسمه "بيان" ..
وانا اهتميت ان البيان يطلع من كنيسة مصر ..
عشان عظمة الكنيسة وقوتها ..

والنقاط المكتوبة ..
مش اكتر من بيان بالمواضيع اللى تم مناقشتها ..

وفى الاخر ..
قاللى حاجة ..
انا عن نفسى عمرى مافكرت فيها ..

قاللى انا يومى بيخلص فى مصر ..
على الساعة 11 م ..
عشان يومى يبدأ مع اقباط المهجر ..
عشان فرق التوقيت ..

لحظتها بصيت فى عينيه ..
فعلا مافيهمش لون ابيض ..
من كتر الاحمرار اللى فيهم ..

قلت له باين فى عينيك يا سيدنا ..

افتكرت كل ده ..
لما شوفت الصورة دى ..
هو باصص لى ومركز فى كلامنا ..

لكن بكفه حاضن وش دودو ..
رغم انه صغير ..
ومش محور الحوار ..
بس برضه مش تايه من باله ..

قداسة البابا ..
انت فعلاً أب ..

#البابا_تواضروس_الثاتى_بابا_الاسكندرية_وبطريرك_الك رازة_المرقسية



أمير تادرس