الـ emotional abuse ( الإساءة العاطفية )

[Rena Jesus]

الـ EMOTIONAL ABUSE ( الإساءة العاطفية ) لها نماذج كتير :

1- الـ DEGRADATION ( الإذلال ) :
و ديه أشهر الأنواع و اللي بتظهر غالبا مع الزملاء ، لما يكون فيه زميل بيعاني من ازمة نقص بيتعمد السخرية او الإسفاف علي زميل تاني ليه .. فيبتدي بتعامل مع فكرة إهانته علي اساس انها امر مضحك او مسلي سواء لباقي المجموعة من الزملاء او حتي ناس غريبة عنهم .. و طبعا بتقي قاسية اوي لو اتعملت بين اتنين المفروض انهم بيحبوا بعض زي زوج و زوجة و طرف منهم يتعمد التهكم الجارح مع الشريك التاني ،،، اللي هما المفروض روح واحدة فازاي روح تنقض علي ذاتها و تذل نفسها !!

2- الـ DOMINATION ( التسلط ) :
و ديه ساعات بنتخيل انها حاجة عادية و خصوصا انها مشهورة اوي بين الاهالي و اولادهم .. فمفيش إساءة اصعب من فكرة ألغاء كيان الشخص و التحكم في قرارته تحت اي مبرر كان .. فالإساءة هنا هي تجريده من ابسط حقوقة كانسان !

3- الـ BLAMING ( اللوم ) :
بتظهر كتير الطريقة ديه في الإساءة بين الشركاء و خصوصا الشركاء عاطفيا زي المتجوزين مثلا .. تلاقي راجل بدون اي منطق او أحقية بيرمي اللوم علي الست بطريقة مؤلمة و قاسية او العكس .. ففكرة لوم الاخر بمثابة ادانته بتهمة هو برئ منها بس لمشكلة ما جواك انتا قررت تحولة متهم و كمان تحسبه ..

4- الـ NEGLECT ( الإهمال ) :
في ناس كتير بتتخيل ان الاساءة العاطفية اني اواجه حد او اهينه بطريقة مباشرة ،، بس الحقيقة أن ساعات التجاهل و الإهمال بيكون من اقسي انواع الإساءات العاطفية و خصوصا لما يكون من شخص انتا كنت بتقدر اهتمامه و حرصه بيك زي .. فعاوز توجع حد بتحبه اوي و تسيئ لذاته .. متشتموش او حتي تأذيه جسديا ، إنما كفاية انك تتجاهله و تعامله انه اقل من مجرد انه يكون علي بالك ..!

5- الـ EMMESHMENT ( التورط ) :
و الحقيقة إن المصطلح ده مستحدث و خصوصا في علم النفس فاول واحد قاله هو Salvador Minuchin و اللي كان بيقصد بيه تورط الاشخاص في نسيج عائلي بدون اي صورة فردية ليهم ...او بمعني اصح هو تعامل بعض الاهالي او اولاياء الامور مع اولادهم انهم يعتبروا extension ( إستكمال ليهم ) .. فهنا القضية مش قضية تسلط و إجبار إنما محو كامل لفردية الإنسان .. ساعات بيكون برضة الموضوع ده مع الازواج فنقطة تعامل الزوج مع مراته انها extension منه و بكدة تبقي محكومة بصفاته و خلفياته الثقافية ..

في النهاية لو انتا إنسان بتمارس اي نوع من أنواع الإساءات العاطفية لاي شخص و متخييل انه موضوع عادي ، لا الحقيقة هو أمر مؤلم جدا مش بيدي اي دلالة علي قوة شخصيتك او سيطرة جدية ليك انما هو مؤشر علي هشاشتك الداخلية و فشلك في التعامل الناضج مع الاخر فبتلجأ لاسلوب مبتذل زي تكسيره او تحطيمه عاطفيا عشان تحس بهيمنة مزيفة و قيمة مغشوشة ليك ..

أما لو انتا شخص بيتم ممارسة الاساءات العاطفية تجاهك فيستحسن تتكلم و تعبر عن مدي رفضك للسلوكيات ديه ، حتي لأضعف الايمان لو مقدرتش تغيرها بسبب ظروف ما .. علي الاقل متحسش كل مرة و انتا بتتعرض للإهانة ديه انك راضي و خانع ، انما في إحترام لكيانك متمثل في رفض و مقاومة ... ففعلا محدش حيحترم انسانيتك لو مكنتش انت في الاساس بتسعي ليها ...