انا بجري .... وتعبت !
انا بقالي سنين بجري .....
بجري عشان أحقق الحلم ، بجري عشان اسبق ، بجري عشان خايفه من الزمن ، بجري عشان ......
بجري !
تقع مني ذكريات ، ناس كانوا في يوم احباب ، اصحاب يقعوا في الرحلة وانا ماببُصش ورايا عشان بخاف اتكعبل ، انشغل بحاجة فاتت ومش هترجع ....
بصه قدامي و مركزة ....
الفكرة بس ان كل اما أعدي مسافة احس أني تعبت أني مش قادرة .... اقعد أفكر نفسي بالحلم ، بالمعافرة ، بالجهد اللي لازم الانسان يبذله عشان يكونله حدوتة تستاهل انها تتحكي ؛ أتحمس وأكمل !
ساعات كتير بسأل نفسي "ايه اللي يحصل لو بطلت اجري؟ ايه اللي يحصل لو مشيت ؟
ايه اللي يحصل لو وقفت ؟
ايه ؟
نفسي الطويل بيقصر ومعاه العمر اللي بيعدي في الجري ..
اتخض من السؤال وأحس ان مجرد التفكير فيه ممكن يعطلني احاول اتجاهله وأكمل جري ... مع أني تعبت !
