اشرس كلاب فى العالم

[joy]

بيت بول

النهارده بقى هتكلم عن كلب متفرد من نوعه و هو البيت بول، الكلب المظلوم ابدا واكتر كلب مهدور دمه و مش واخد حقه، واللي ياما سمعنا عنه كلام مفيش اسوأ منه والسبب هو احنا كمربين مش حد تاني.

وزي مانتو عارفين انا بعيد شويه عن التقليديه، وعلشان كده الموضوع هيناقش المجموعه دي من النقاط بالترتيب ده:

1- مقدمة عن البيت بول.

2- السمات المميزة لشخصية البيت بول.

3- التكوين العام لجسم البيت بول و ودراسه لمميزات التكوين الجسماني.

مقدمة عن البيت بول


البيت بول من أشهر الكلاب في العالم، واكتسب شهرته بسبب السمعة السيئة اللي لاحقته في كل الدول. و البيت بول بينتمي لمجموعة من الكلاب اسمها Bullies وهي مجموعة من سلالات الكلاب التي تم تهجينها بغرض صيد الثيران والسيطره عليها، ومن هنا اكتسبت الاسم Bull في أحد مقطعي الاسم. والمجموعة دي بتحتوي على العديد من الكلاب منها على سبيل المثال لا الحصر البيت بول (Pitbull) و البول تيرير (Bull Terrier) و الستافوردشاير تيرير (Staffordshire Terrier) و البول دوج (Bull Dog) وسلالات تانيه كتير لكن دول اشهرهم. واللي بيميز المجموعة دي ان التكوين الجسماني ليهم مميز بقصر القامة والعرض الزائد، والرقبة المتكتلة العضلات، و الفك القوي جدا و العريض.
ودي صور لمجموعة ال Bullies اللي اتكلمت عنهم :

البيت بول Pitbull

البول تيرير Bull Terrier

الستافوردشاير تيرير Staffordshire Terrier

البول دوج Bull Dog

والبيت بول من الكلاب التي لم يوضع لها مواصفات قياسية ثابته زي الجيرمن مثلا، علشان كده هنلاقيه في كل دوله شكله مختلف بصورة طفيفه عن الدوله التانيه، واشهر الدول اقتناء للبيت بول هي الولايات المتحدة، وهناك في اندية معترف بيها للبيت بول وتم اخيرا الاستقرار على نوع وسموه American Pitbull Terrier اللي هي بنشوف اختصارها كتير اوي APBT. ومن الدول المحبة جدا للبيت بول دول امريكا اللاتينية زي بيرو و الارجنتين على وجه الخصوص، وبعدهم روسيا ودول الاتحاد السوفيتي السابق، وبعدين أوروبا.
ودي مجموعة صور لكلاب بيت بول أمريكية :





وايضا توجد كلاب بيت بول روسيه ...

وأكيد طبعا هنلاحظ الفرق في البنية الجسدية بين الأمريكي و الروسي، فالأمريكان بيميلوا للضخامه الزايدة مع قصر القامة، في حين ان الروس بيحبوا الرشاقه والجسد المعتدل ومعاهم بتوع أمريكا اللاتينية.

والبيت بول من الكلاب اللي بتتمتع ببنية عضلية رائعة وشراسه طبيعية زائدة وسمات شخصية مميزة، وده خلاها أداة مناسبة لكل أصحاب النفوس الضعيفه علشان يستخدموها في أعمال العنف والسطو المسلح و التظاهر والمنظرة. وطبعا الكلب مجرد حيوان لو تم تدريبه على اعمال العنف هيبدع فيه وبالتالي البيت بول اكتسب السمعة السيئة دي، وتم منعه في العديد من الدول منعا للمشاكل، ونقدر نمثل البيت بول بالعربية الهامر مثلا، عربية قوية و امكانياتها جباره، لكن ممكن تستخدم غلط وهو ده بالظبط اللي حصل مع البيت بول وطبعا منقدرش نظلم الكلب انما الذنب واقع على اللي بيربي الكلب على الاعمال الوحشية دي.


لكن على الجانب الآخر، البيت بول اثبت كفائه تامة في كل الاعمال اللي تم تدريبه عليها زي اعمال الحراسه واعمال الانقاذ ومكافحة المخدرات، ده غير تألقه الدائم في الحراسه الشخصية، وحراسة الأماكن المغلقة، زي المستودعات و المخازن لقابليته الكبيره على القفز والمناوره في أماكن مزدحمة وضيقة.

ودي صورة بسيطه كده بتوضح الارتفاع اللي ممكن يوصل ليه بيت بول من الثبات، واكيد ملاحظين ان القفزة كانت من بعد العربيه وملاحظين اد ايه المسافه الافقية صغيره جدا في حين ان الارتفاع اللي وصل له رهيب.

2- السمات المميزة لشخصية البيت بول :

نيجي بقى لتاني نقطه في الموضوع وهي شخصية البيت بول، وما يميز شخصيته، وفهم شخصية البيت بول هو طريق النجاح علشان نعرف نتعامل معاه. والبيت بول عامة كلب غريب جدا، وشخصيته غير واضحه على عكس بقية الكلاب، هنلاقي الرودفايلر مثلا عنده كبرياء و عزة نفس واضحه، و الجيرمن مثلا فيه وفاء و خضوع بصورة لا تخفى عن عين حد ، في حين ان البيت بول شخصيته غير واضحه، وناس كتير اوي بتقول عليه عنيد و غبي واللي بيحركه شراسته المبالغ فيها، و الكلام ده غير صحيح بالمره. وممكن نحدد السمات المميزه لشخصية البيت بول كالآتي:

1- طباعه حاده جدا.

2- عنده كبرياء شديد.

3- عنده لا مبالاه ولا يهتم باي متغيرات بتحصل حواليه غير لما تكون كبيره.


4- واثق من نفسه ومن قدراته لأبعد الحدود.

5- وفي لصاحبه لأبعد الحدود.

6- وطبعا كلب شرس لأبعد الحدود وشراته غالبا موجهه تجاه الحيوانات أكتر من البشر.

7- كلب جسور و مغامر ومبيفكرش في عواقب تصرفاته.

8- صموت وهادئ وغير محب للضوضاء.



وكالعادة هنمسك نقطه نقطه نحللها، وبسم الله نبدأ.

1- حدة الطباع:

البيت بول كلب طباعه حاده جدا، و يعني ساعة الهجوم بيهاجم بكل طاقته، وساعة اللعب بيلعب بكل طاقته، وبينقلب من مود الللعب مثلا لمود الهجوم في لحظة، ده غير انه بيرد الهجوم بأعنف ما يمكن، وحدة طباعة خلته من أشرس الكلاب لأنه بيستخدم كامل قوته في الهجوم وده بيخدم شراسته جدا.


2- الكبرياء:

أكتر حاجة بتميز البيت بول كبريائه اللي دايما بيتفهم على انه غباء خصوصا لما بيختلط بحدة طباعه. البيت بول كلب عنده كبرياء شديد، ومش بيتقبل الهزار أو الاهانة ابدا، ده غير انه دايما بيصر يكون هو القائد، ودي أكتر مشكلة بتواجه المربين، وهو ازاي نخلي الكلب يسلم القياده لصاحبه من غير ما نهيت كرامته او نلغيها من شخصيته. ودي طبعا نقطه محتاجه نوع خاص من المعامله وهو اننا بندي الكلب وضعه و مركزه وفي نفس الوقت نحسسه ان زي ما هو له شخصية، القائد شخصيته اقوى منه وان هو لازم يطيع القائد لحبه فيه مش لمجرد الخضوع له. يعني مفتاح البيت بول في استغلال كبريائه وجعله هو المحرك للوفاء. بمعنى آخر يكون الكبرياء هو الدافع للوفاء لصاحبه وطاعته لان الطاعه بتعني تحقيق الوفاء و ده بيزود من كبرياء الكلب. اتمنى اكون قدرت اوصل المفهوم ده لانه معقد شويه.

3- اللامبالاه:

البيت بول من الكلاب اللي عندها ثقه كبيره في نفسها وده بيخلي عندها نوع من اللامبالاه، ومش مهتم باي حاجة تحصل حواليه طالما مش حاجة كبيره. يعني مثلا حاجة مكانها اتغير او صوت عالي حصل نلاقي الكلب مش مهتم بالصوره الكبيره، كل اللي بيحصل انه بيوجه اهتمامه ليها ويتابع من بعيد، ولو الامور اتطورت لشيء مقلق ساعتها يبتدي يتحرك وينفذ مش مجرد استطلاع. ودي نقطه من النقط اللي بتعمل مشاكل في حراسة البيت بول، لانه مش بيكتفي مثلا بالتهويش او النباح و الحاجات دي، لا ده على طول بيهاجم اي وضع غريب، يعني لو لص مثلا دخل مكان بيحرسه بيت بول الكلب لما بيدرك ان ده شيء غريب على طول بينفذ و يهاجم ويتعامل بأعنف ما يمكن بسبب حدة الطباع.

4- الثقه:


كلب البيت بول من أكتر الكلاب ثقه في نفسها وقدراتها، وده لأنه مقتنع تماما ان مفيش كلب تاني اقوى منه، وعلشان كده نلاقي ان البيت بول مش بيهاجم ابدا أي كلب تاني غير لما ياخد الأمر، او الكلب التاني يبدأ الهجوم، وغالبا البيت بول بيهاجم بعد أول ضربه ومش بيكون هو البادئ. والثقه دي هي اللي اهلت البيت بول انه يكون من أقوى كلاب مصارعة الثيران، لانه مش بيهتم بحجم أو قوة الخصم لقته الشديده في قدراته وده بيخليه يهاجم أي خصم مهما كان بيستخدم من وسائل الارهاب المعروفه في عالم الحيوان.
وطبعا دي من الامور اللي خلت الناس تاخد انطباع سيء عن البيت بول بأنه كلب شرس ومش بيتفهم، وده غلط جدا لأن البيت بول مش بيخاف بس، وده اللي بيوحي بالشراسه الزايده.

5- الوفاء:

البيت بول من اوفى الكلاب، وعامة مفيش كلب مش وفي، لكن وفاء البيت بول شديد جدا لصاحبه لدرجة انه بيستميت في القتال علشان صاحبه وبيضحي بنفسه علشانه ومستحيل ابدا يتراجع في قتال علشان صاحبه حتى لو الخصم كان اقوى منه و تمكن منه واصابه اصابات خطيره جدا. على عكس كلاب تانيه كتير اوي لما بتصاب بتتراجع وتعلن الاستسلام، لكن البيت بول بيشترك مع الدوجو و الرودفايلر في عدم الاستسلام مطلقا.

6- الشراسه:

شراسة البيت بول طبعا مش محتاجه كلام، ومعروف عنه أنه من أشرس أنواع الكلاب، وشراسه البيت بول بتحركها اربع حاجات وهي "القوة الجسدية" و "الثقة" و "الحدة" و عامل فطري. وهنلاقي ان الاربع عوامل دول هم اللي بيرسموا شراسة البيت بول لان القوة الجسدية و حدة الطباع و وعدم التردد بتخلي عنده ثقه تامه في قدراته وبالاضافه لعامل الشراسه الفطري الزائد، كل دي حاجات بتدي البيت بول شراسه فوق الطبيعية، لكن ميزتها انها شراسه مميزة و موجهة وسهل التحكم فيها على عكس الشائع عنه. والتحكم في شراسه البيت بول بيكون بتعريفه من الصغر على كل ما هو عادي وكل ما هو غير عادي، علشان زي ما قلت في نقطة اللامبالاة اي شيء غير عادي البيت بول بيتحرك ضده بأعنف ما يمكن.

7- الجسارة:

طبعا مش محتاجه كلام و الادله عليها كتير، البيت بول من أكتر الكلاب جسارة وعناد، فهو كلب مبيهموش اي حاجة وقلبه ميت ولما بيحط حاجة في دماغه لازم يوصل لها بجساره مش موجوده في اي نوع تاني من الكلاب باستثناء حاجات قليلة جدا زي البول تيرير و الدوجو أرجنتينو كمثال.

8- الهدوء:

البيت بول كلب هادئ جدا بطبعه، وغير محب للنباح بالمره حتى في اوقات الهجوم، ودايما نلاقي هجوم البيت بول بيتم بدون نباح، ولا حتى نباح تحذيري، انما بتكون مجرد زمجره. وفي اوقات الهدوء بنلاقي البيت بول بيحب الاستجمام وبيميل للهدوء التام، ولو صاحبه انشغل عنه بيفضل انه ينام جنبه عن انه يعمل اي حاجة يجذب بيها انتباهه. على عكس البوكسر مثلا. كلب البوكسر من الكلاب اللي لو صاحبها انشغل عنها تلاقيها بتعمل اي حاجة علشان تجذب انتباهه. ودي من النقط المميزه جدا و الجميله جدا في البيت بول، وكمان بتأهله انه يقضي فترات طويله بعيد عن صاحبه بدون مشاكل، وبيكون كل همه فيها انتظار صاحبه وبس بدون ما يعمل اي حاجة ممكن تتسبب في مضايقته.

وبعد تحليل الشخصية نقدر نستخلص النقط دي:

-1 من أقوى وافضل الكلاب التي يمكن استخدامها في الحراسه علشان بينته القوية جدا وامكانياته العاليه جدا في القتال، وكمان شجاعته المتناهيه و حدة طباعه بثقته بتأهله انه يكون حارس ممتاز، وخاصة في الحراسه الشخصية أو حراسة الاماكن المغلقة. وعامة البيت بول من أفضل الكلاب لحراسة المخازن و الأماكن المزدحمة، لانه بيقدر يتعامل بسهولة شديده مع العوائق لامكانيته الجسديه، وكمان كلب هادئ في هجومه وسريع التصرف.

2- سهل تربيته في المنازل بشرط ان يكون المربي على درايه تامة بشخصيته علشان يقدر يوظف امكانياته صح وميتعاملش معاه بصورة تؤدي لنتائج عكسية. وحجمه الصغير بيخليه سهل تربيته في البيت، وحبه الشديد للاطفال وحنيته عليهم بتأهله لانه يكون جليس اطفال ممتاز.

3- كلب محتاج معاملة غذائية ورياضيه خاصة جدا، وطبعا معامله نفسيه خاصة ومن شخص على دراية وخبرة.

4- تدريبه سهل جدا بشرط معرفة كيفية التعامل معاه.

5- ممتاز في الحراسه وكمان تم استخدامه في حاجات تانيه كتير زي عمليات الانقاذ و وغير مناسب لأعمال الرعي.


3- التكوين العام لجسم البيت بول و ودراسه لمميزات التكوين الجسماني :


البيت بول له مميزات جسدية لا توجد في اي نوع آخر من الكلاب، ودراسة البنية الجسدية تتطلب اننا نوصف الجسم الأول.

جسم البيت بول عضلي جدا، ويتميز بتكتل العضلات وبالذات في منطقة الصدر و الذراعين و العنق و الفك والأكتاف و الأرداف، ونلاحظ ان حجم العضلات بدون اي تمارين بيكون كبير، يعني كتلة العضلة نفسها كبيره، وده بيسمح للبيت بول انه يحصل على تكوين عضلي ممتاز و متناسق و حجمه كبير مقارنة بحجم البيت بول ككل.

والبيت بول كلب قصير، صدره عريض وقوائمه متناسقه، وارتفاعه في المتوسط بيكون بين 45 سم و 55 سم، ووزنه بيتراوح بين 15 كيلوجرام و 25 كيلوجرام. الذراعين فيهم تقوس بسيط، والرقبة عريضه وقوية والرأس متناسق و مربع الشكل، العيون مستديره أو شبه لوزية و متباعده وفي أعلى الجبهة
العريضة. الفك عريض جدا ووغير مدبب، و الخدود واضحه ومميزة بعضلات كبيرة، وفي جزء زايد من لحم الفك السفلي و العلوي (الشلاضيم) شكله مميز و غير مهدل أوي. وعامة حجم الرأس بيكون ضخم.

فراء البيت بول قصير ولامع ولا يحتاج عناية كبيرة، وآذان البيت بول جزء صغير منها مستقيم و الباقي متدلي، والأذن بيتم قص الجزء المتدلي منها في قبل بلوغ الكلب شهرين، علشان تدي للكلب منظر أكثر شراسه ولتحسين قدرة الكلب على السمع، بس رأيي الخاص ان القص عملية ملهاش اي لازمه وبلاش نلعب في خلقة ربنا.

ألوان البيت بول عديده منها الفون و البرندل و البلو (الازرق) و البلاك (الأسود)و الهوايت (الأبيض) و البني، وممكن وجود اي تكوينات لونية وغالبا بيكون فيها الابيض مع اي لون تاني.

ذيل البيت بول عريض وقوي في منطقة اتصاله بالجسم و بيبدأ يرفع ومميز بنهايته المدببه، و الذيل مرتخي وبدون اي التواء او تقوس، و ساعة الاثاره ذيل الكلب بيرتفع لفوق علشان يبعده عن اي هجوم، و في فترات السعاده الذيل بيكون مرفوع موازي للجسم.

كف البيت بول عريض والأصابع واضحه و كبيره، و غالبا بيكون لون الكف وجزء من الذراع أبيض وده اللي بنسميه قفاز أو شرابات على حسب طول اللون الأبيض. وللبيت بول خمس أصابع أماميه وأربعة خلفية.




البيت بول مميز جدا بعرض صدره وتباعد الذراعين، وعامة مواصفات البيت بول بتقاس بناء على عرض الصدر و تقوس الذراعين و حجم الرأس و عرض الفك و ميل الجبهة و قصر القامة. وعامة في حسبه بسيطه بنعملها كده وهي بنقيس عرض صدر الكلب و ارتفاعه من الكتف ونقسم العرض على الارتفاع، وكل ما النسبة قربت لواحد كل ما كان الكلب أحسن.

ده كان الشكل العام للبيت بول، ودلوقتي هنناقش مميزات البنية الجسدية.

1- قصر القامة

قصر قامة البيت بول و عرضه بيديله ميزة خطيرة مش موجوده في كلب تاني خارج مجموعة ال Bullies وهي الثبات، فكل ما كان الكلب قصير وقريب من الارض وعريض كل ما كان ثابت أكتر على الأرض، وزي ما قلت في موضوعي بتاع المقارنة بين البيت بول و الرودفايلر، القوة المطلوبة علشان نوقع كلب بيت بول بتكون كبير لان ذراع العزم صغير، وممكن نتخيلها باننا عايزين نقلب صندوق قصير و صندوق عالي، طبعا الصندوق العالي بخبطه بسيطه يقع انما القصير عايز قوة اكبر. والثبات ده بيخلي صعب جدا ان اي حاجة تقلب البيت بول في اي قتال، وبتسمح له بعض خصم اكبر منه بدون الخوف من محاولات الافلات. وكلنا عارفين ان الكلب اول ما بيمسك الخصم بيفضل يهزه براسه علشان يوقعه.

وقصر القامة كمان بيدي البيت بول ميزة مهمة، وهي ان الكلب بيكون قريب من نقاط ضعف اي خصم و هي السيقان. وكمان بتديله فرصه للسيطره على الرقبة من أضعف مكان فيها وهو الحنجرة. ده غير انها بتجبر المهاجم انه ينحني علشان يوصل للبيت بول وده بيسمح له بالوصول لنقاط الضعف كلها
بسهولة.

2- حجم التكتل العضلي

كلب البيت بول بيتميز بتكوين عضلي ممتاز، فحجم العضلات كبير مقارنة بحجم الجسم العام، و دي بتضمن للبيت بول الخفة و الرشاقة، يعني هنلاقي ان وزن البيت بول مش كبير وفي المتوسط بيكون 25 كيلوجرام وكمية العضلات كبيرة وده معناه ان جسمه خفيف جدا بالنسبة للقوة اللي ممكن يبذلها، ودي بتدي البيت بول ميزة الرشاقه، فنلاقي البيت بول بيقفز مسافات عالية جدا وسرعته كبيره جدا، ده غير انها بتديله رشاقه اثناء الهجوم وقوة كبيره على التعلق في الخصم بدون مشاكل. لكن عيب صغر الحجم هو ان الخصم بيتمكن من حجم أكبر من جسم الكلب، يعني لو كلب تاني كبير زي الرودفايلر مثلا قدر يعض البيت بول هنلاقيه عض مساحة كبيره من جسمه. وتاني حاجة صغر الحجم بيقلل من قصور البيت بول، والقصور ممكن نشرحه بمثال صغير وهو لو طفل وراجل ناضج الاتين بيجروا وخبطوا فيك، طبعا الطفل مش هيأثر أوي لكن الراجل الكبير هتحس بخبطته جدا واكيد هتوقعك على الارض. هو ده القصور، يعني كل ما زادت الكتلة كل ما زاد القصور.

3- قوة الفك و عضلات الرقبة

نظرا لأن جسم البيت بول خفيف مقارنة بحجم عضلاته، وكمان قوة فكه رهيبه، هنلاقي ان البيت بول من السهل عليه التعلق لفترات طويلة جدا بفكه، وكمان قوة عضلات الرقبة بديله ميزة انه ممكن يتعلق بفكه ويأثر بضغط شديد بفكه وفي نفس الوقت يحرك راسه بعنف شديد لاضعاف الخصم عن طريق عضلات رقبته القوية جدا، والضغط مع التحريك العنيف بيخلي البيت بول قادر على تحطيم عظام الخصم بسهولة، وكمان بيكون من الصعب جدا افلات الخصم منه لقوة فكه الرهيبه حتى مع محاولات الخصم العنيفه لان زي ما قلت كتلة البيت بول صغيره، وضيف ليها قوة فك مهولة هتكون النتيجة ان البيت بول لو مسك خصم بفكه صعب جدا انه يفلت منه. وده كان الغرض الاساسي من انتاج السلاله لان مصارعة الثيران بتتطلب ان الكلب يتعلق بفك الثور، وطبعا الثور هيحاول يطوحه براسه والمفروض ان الكلب يفضل قابض بفكه مهما كان القوة اللي الثور بيطوحه بيها.

مع تحياتي