زمان كنت زى العيال امسك فى ربنا وهاتك خناق معاه .. وليه يارب تعمل كده ؟ وليه تسمح بالخسارة ديه ؟ وليه ترضى بالظلم ده ؟ وليه تسيبنى ادخل فى العلاقة ديه وانت عارف ان كلها أذى ؟ وليه تاخد من وسطنا الشخص الجميل ده ؟ وليه اتعب التعب ده ؟ اشمعنا انا وليه ؟ .. أسئلة كتيرة بدايتها ليه .. وطبعا مكانتش عشان أفهم لكن عشان أتجادل ويمكن عشان اطلعه قاسى او غلطان أو مش واخد باله .. كان عتاب مراهقين .. عتاب واحد مش فاهم ولا دريان .. عتاب قصر نظر
لكن فى الحقيقة بمرور الوقت بتلاقى ساعات إجابات على ليه ديه .. وتتكسف على نفسك .. وتتكسف من طريقتك الخيبانة فى العتاب وتوجيه اللوم لربنا .. وبعد كده واحدة واحدة بتتحول ليه بتاعت المراهقين إلى ليه بتاعت الكبار اللى هيا عبارة عن هات وخد فى الكلام .. تسأل ليه ؟ عشان تعرف ربنا عاوز منك إيه او عاوز يعمل عشانك ايه .. وإن ماعرفتش اهى كانت فرصة حلوة انك قعدت معاه ( ديه تستاهل ) .. وساعات بتتقلب ليه من مجرد سؤال إلى مجموعة ذكريات لزمان وقت ما ربنا جاوبك فيها علي ليه .. وتفضل تشكر من قلبك على حكمته وأمانته ورعايته ليك .. وتتاكد ان اللى حصل زمان مكانش عقاب ولا تأديب ولا انه كان حاطك فى دماغه أو عند زى ماكنت فاكر
مع الوقت وبالنضوج بنوصل اننا مش محتاجين حتى نسأل ليه .. ليه بقت سؤال ساذج زى كده ماتسأل ظابط مرور انت ليه بتوقف الطريق ؟ وحاطط ليه اشارات ؟ ليه تعطل مصالح الناس ؟ .. طبعا اسئلة ساذجة لدرجة ان الظابط ممكن مايردش عليك ولا يعبرك .. انما مع ربنا بتوصل انك ممكن ماتكونش فاهم .. بس مش معترض لانك مطمن انك فى ايديه الأمينة والحنينة .. ايدين ماخذلتكش قبل كده ولا هاتخذل .. ماسابتكش قبل ولا هاتسيب بعد .. اه بيتأخر ساعات اووى فى الرد وممكن مايردش خالص .. وممكن يكون بيرد وانت مصدر له الطرشة .. بس فى كل الأحوال انت مطمن
ده ساعات كمان تبقى متشوق هايعمل ايه جديد المرة ديه فى حياتك وشخصيتك وقلبك وفى تفاصيل مشاعرك وأفكارك وفى ميراث أبديتك .. وتنسى خالص سؤال ليه وتحذفه من قائمة أسئلتك .. وتفضل عبارة واحدة بترددها " شكراً يارب وكمل عملك فيا " ♥
لولا سؤال ليه بتاع المراهقة زمان .. ماكنتش هاتوصل لكلمة شكرا بتاعت دلوقتى
21 - 05 - 2017, 07:09 AM
العرض الشجري