الجواز ونس .....

[Rena Jesus]

طب الجواز سهل،
الحقيقه لأ الجواز كتجربه إنسانيه صعب جدا، مهما تخيلت عكس ذلك،
ومهما كنتم مع بعض قيس وليلي وعمر وسلمي
توقع تماما ان علاقه عنتر وعبله ممكن تتحول بسهوله جدا بعد الجواز الي عنتر ولبلب

طيب يعني بلاش نتجوز!
الحقيقه قطعا لأ، اتجوزوا

بس مش هانقول الكلام بتاع اتجوزي اللي تحطيه في السقف ينور
او اتجوز اللي لما تسيبيها لوحدها تقعد تعيط والكلام الحمصي ده،
لأ اتجوزوا بس بشرطين في رأى هما الضمان الوحيد لإستمرار أي زواج

أولا الإحترام المتبادل
يعني قطعوا بعض في الكلام والنقاش بس حذاري من الإهانه او انك تعايروا بعض بحاجه ايا كانت،
الحاجات دي مبتتنسيش أبدا وواحده واحده بتبني جدار فولاذي من الكره مستحيل هدمه مهما طال الزمان،
طبعا بتكلم هنا عن الإهانه اللفظيه أما الإهانه الجسدية فمرتكبها انا مبعتبروش انسان أصلا ناهيك عن انه يتجوز وينضم للمجتمع أساسا،

تاني حاجه حاولوا بقدر الإمكان في لحظات الزعل والغضب تفتكروا الحاجات الحلوه بلاش تاكلوا الحلو وتنكروا.
"نظريه مشوفتش معاك / كي يوم عدل" بتهدم بيوت.

طب نتجوز ليه أصلا مابلاها وجع دماغ وألاعيب نفسيه معقده!
لأ إتجوز عشان الجواز هايديك حاجه مهمه جدا وصعب تلاقيها في اي علاقه انسانيه تانيه،
الحاجه دي إسمها "الوَنس" يعني إنك ترجع / ترجعى بليل تعبان ومجهد ومخنوق ومحمل بهموم يوم كامل فتلاقي حد يسمعك بإهتمام،
مجرد يسمعك بس حتي لو مش هايحللك مشاكلك،
كفايه اوي يطيبلك خاطرك بكلمتين من القلب وتحس انه واقف جنبك ،
الحاجات اللي زي دي هي بس القادرة علي منحنا الطاقه عشان نكمل في طريق الحياه لو طلبوا مني أوصف الجواز بكلمه واحده هاقول عليه "الونسْ".