محبة أبدية هاحبك

[walaa farouk]

قالي "بحبك"..
قولتله "بصراحة يارب مش مصدق..
ناس كتير قالولي بحبك وبعد ما شافوا عيوبي..
طفشوا.. "
ابتسم وقالي "فاهمك جداً..
وعارف انك بقيت تخاف من اللي بيختفوا من حياتك أو بيتغيروا من غير سبب..
وعارف برضو انك حاسس انك معيوب..
كل ما حد يقرب ويشوفك علي حقيقتك يمشي..
وكل حد يعرف عيوبك يهرب..
بس أنا بحبك زي ما أنت كدة.. بلخبطتك بعيوبك..
أنا الوحيد اللي عارف كل تفاصيلك.. وبحبك زي ما أنت .. بحبك ببلاش.. "
قولتله "طب توعدني ماتتغيرش؟
توعدني ماتمشيش بسبب غلطاتي وغبائي الكتير؟ "
ضحك وقال
"صدقني أنت اللي بتهرب كل مرة..
وباستغرب اوي لما بشوفك بتحاول تنضف نفسك قبل ما تجيلي..
وكإني مش هاقبلك بلخبطتك..
وكإن في حد تاني هايغيرك ويصلحك غيري.. "
قولتله " ما اللي حواليا هم اللي فهموني كدة.. مش هانحبك ببلاش..
لازم تبقي نضيف وجامد..
لازم تبقي مُلفت وجذاب..
غير كدة مليش لازمة.. ومليش حد "
أول ما قلت كدة لقيته سكت وبان عليه الحزن..
لكنه رجع وابتسم تاني بسرعة.. وكانه قاصد يطمني بابتسامته دي.. وقالي..
" حاضر هاوعدك..
اوعدك اني هكون غير الناس..
اوعدك اني هافضل موجود..
اوعدك اني اقبلك بكل حالاتك ومشاكلك..
اوعدك اني هاحبك حتي لو ماتتحبش..
اقبلك حتي لو مفيش فيك حاجة عدلة..
اوعدك ان أنا اللي اصلحك واغيّرك..
أنا بس اللي فاهم اللي جواك..
أنا بس اللي شايف جوعك الرهيب للحُب اللي ببلاش..
اوعدك.. أن محبة أبدية هاحبك..

"