كل ده جوا كل واحد فينا

[walaa farouk]

الكلام اللي في القلب ومش بيتقال و الرسايل اللي مش بتتبعت و الصدف اللي مابتحصلش و اللي عاملين نفسهم عايشين حياتهم و هما بيتنفسوا بالعافية ...
كل الحاجات اللي عوزناها و معازتناش و الحاجات اللي كانت عايزانا و ماشوفنهاش اصلاً رنة التليفون اللي بتقبض قلبك و بتخوفك .. و كل " يا ريييت " اللي قولناها من قلبنا .. كل المرات اللي كنا محتاجين الدنيا تنصفنا و مانصفتناش .. و كل مرة قلنا " تمام و زي الفل " و إحنا متأكدين ان إحنا زي الزفت .. والأيام اللي عيطنا فيها في العلن علشان الزعل كان أكبر أوي من إننا نخبيه ... كل الحاجات اللي اتخلينا عنها علشان مامسكتش فينا ... الناس اللي كان نفسنا نحضنهم و ماقدرناش ... كل الحاجات اللي فجأة اختفت و الحاجات اللى ملحقناش نشبع منها كل المبررات العبيطة و الحجج الفارغة اللى بيوجعوا أكتر ما بيريحوا و الجرح اللي ماخفش من سنين .. الإحتياج لحاجات عمرها ما هاتيجي .. كل الكذب اللي كذبناه على نفسنا و صدقناه علشان منكرهومش .. كل اللي كانوا هنا و مشيوا .. كل مرة كنا فيها لوحدنا من غير سند كل مرة قلنا فيها دول غيرهم و طلعوا أنيل منهم
أنا ماعرفش الحاجات دي تصنيفها إيه.. لكن كل اللي اعرفه أن كل ده جوا كل واحد فينا