|
 |
 |
 |
|
رقم المشاركة : ( 1 )
26 - 04 - 2017, 10:24 PM
|
|||||||||||
|
|||||||||||
|
حبيبتي ركزي معايا شوية دلوقتي انتي جالك عريس وفرحانه بيه لازم تسألي نفسك سؤال مهم جدا انتي فرحانه علشان جالك عريس وهتلبسي الفستان الابيض ولا فرحانه علشان جالك راجل متمنتيش افضل منه في حياتك لو للسبب الأول فأسمحيلي اقولك " متستعجليش " علشان قريب اوي هتقرفينا ببوستات اللي كلها نكد وكأبه نيجي لنقطة تانيه اهم من الاولي انتي دلوقتي اتخرجتي وبتدوري علي شغل وبتسمعي كلمة " مش هنفرح بيكي " في كل مكان تروحيه فبتتأثري منها وتكتأبي وتبدأي تصلي ان ربنا يبعتلك عريس علشان متسمعيش الكلمة دي تاني فأحب اقولك " متستعجليش " علشان قريب اوي هتقرفينا ببوستات اللي كلها نكد وكأبه لأن بمجرد ماتتجوزي هيقلولك مفيش حاجه جاية في الطريق انا لحد دلوقتي الناس بتقولي في الافراح عقبال عوضك .. مع ان بنتي بتكون علي كتفي وده لان الناس حافظة مش فاهمه بصي يا ماما .. بصي يا حبيبتي هقولك علي تمرين بسيط تعمليه كل يوم مرتين قبل كل وجبة هتدخلي الحمام وتقفلي علي نفسك الباب وتقفي قدام المرايه وتقولي " وانت مال امك " قوليها تلات مرات قبل كل وجبة قولتيها واتمرنتي عليها ؟؟ شاطره خالص .. انسيها بقي علشان عيب تقوليها للناس ,,, انتي محترمة ومتربيه بس كفاية انك تقوليها في سرك لكل شخص هيقولك مش هنفرح بيكي بقي كنوع من انواع التبريد الداخلي لماتور الدم اللي بيغلي وبخاره طالع من ودانك ايااااااااااااااااااااااااااااااااااااااكي تستعجلي ... وكلمة تستعجلي كلمة جميلة بحب اقولها في كل محاضرة اكون فيها تاملوا الكلمة .. تستعجلي .. تستعجلي .. مشتقه من كلمة " عجل " وهو الحيوان الغير عاقل .. اي لا تفقدي عقلك متستعجليش وتختاري عريس والسلام علشان تهربي من كلام طنط ماري ولا كلام طنط سهام لأن طنط ماري وطنط سهام مش هيبطلوا نميمه عليكي في الرايحة والجاية بعد ماتتجوزي ويتريقوا علي الكحل السايح بسبب دموع عينك اللي نازلة علشان تصرفات المحروس اللي استعجلتي واختارتيه حبيبتي افهمي عندك كم سنة دلوقتي ؟؟ 18 ؟؟ 22 ؟؟ 26 ؟؟ 30 ؟؟ 40 ؟؟ ولسه متجوزتيش ؟؟ طيب ايه يعني طيب ماهي سارة بنت ام سارة 17 سنة ومتجوزة علشان جسمها حلو حبتين وعرسانها كانوا كتار وفرحت انها هتلبس الفستان الابيض سارة دلوقتي معاها اربع عيال وحامل في الخامس وطالع عين ابوها مع جوزها اللي اعتبرها الة لزيادة عدد السكان ليس اكتر لا بتسمع كلمة حلوة ولا بيشيل معاها عيل ولا بيحتويها لما بتضايق تعالي بقي شوفي منال بنت ام منال 38 سنة ولحد انهارده متجوزتش صدقوني بشوفها بصاب ببهجة واحس ان للسعادة اركان كثيرة منهم النظر في وش منال حلاوة ايه واهتمام بالنفس ايه ومرح ايه قولتها كتير وهكررها تموتي ملكة في بيت ابوكي افضل من انك تموتي جارية في بيت جوزك اختاري اللي يعترف انك اميرة .. وان مجاش الأمير اللي يخطفك كفاية انك خطفتي السعادة وعشتيها متستعجلييش وتتجوزي حد طمعان في جسمك متستعجلييش وتتجوزي حد طمعان في فلوس ابوكي متستعجلييش وتتجوزي حد طمعان في جمالك متستعجلييش وتتجوزي حد طمعان في شهادتك متستعجلييش وتتجوزي حد طمعان في شغلك ومرتبك متستعجلييش وتتجوزي حد طمعان في عيلتك وانتي ناضجة وقادرة تفرقي بين طبيعة تفكير اللي قدامك وخدي بالك .. تسرعك مش هيعود عليكي انتي وبس بالفشل بالعكس هيعود علي اطفالك اللي مش هتعرفي تحسني تربيتهم بسبب كسرتك وحزنك هيعود علي اهلك اللي هيحسوا بالندم انهم رموكي هيعود علي اصحابك اللي دايما هيشفوكي حزينه وبعيده عنهم هيعود علي مجتمعك اللي مش هتقدري تفيديه بأي شئ انا الوحيد المستفيد من الموضوع .. هضمن اني اشوف اللايك والشير الجمال بتوعك علي اي قصة او بوست حزين انزله .. انشري البوست ووعي اصحابك .. ساعديهم في فك اول عقدة في حبل بيتربط علي رقبتهم هيدعولك صدقيني قدام شوية .. لما عينيهم تبصر الكارثه اللي كانوا هيتحطوا فيها الجواز مش جامعه هتسبيها وتشوفي غيرها .. الجواز حياة .. الدبلة بدايته والموت نهايته وأرجوكي .. وحياة العيش والملح اللي مش بينا .. متستعجليش متست(عجل)يش 
|
|
| قد تكون مهتم بالمواضيع التالية ايضاً |
| الموضوع |
| متستعجليش على ماسكة الموبايل |
العرض الشجري