ليه يا قلبي كل يوم تحب واحدة؟

[walaa farouk]

كل شوية نحب حد ومتظبطش معانا، طب آمتى هنلاقي الشخص اللي نحبه ويحبنا بجد!

قصص الحب

أتجرحنا وجرحنا، حبينا واتحبينا، اشتاقنا واشتاقوا لينا، وراء كل قصة حب تفاصيل متنتهيش….. كل مرة بنقول لقينا الحب الحقيقي اللي هيعيش ويكمل معانا بس للأسف بيطلع وهم كبيييير، ونلاقي نفسنا بنتجرح وبنجرح تاني.

ياترى ينفع نلاقي الشخصية المثالية، شخصية تبقي متفصله حسب اللي أحنا عايزينه بالظبط، وكمان تطلع الشخصية التفصيل دي بتحبنا وبنحبها.. بكده نبقى لقينا الشخصية المثالية مع الحب الحقيقي.. يااااااه حلم صعب أووووي، لأن ببساطه كل ما نحب حد نلاقي نفسنا مختلفين وطباعنا مختلفة أو مع الوقت بنختلف، ولما نلاقي شخصية شبهنا مش بيكون عندنا ليهم مشاعر أو العكس..

الحب اللي بجد

لو عايز تلاقي الشخصية المثالية والحب الحقيقي لازم تعرف كام حاجه كده الأول…. قبل ما تطالب بشخصية مثالية لازم تبقى انت شخص مثالي ومتطالبش اللي قدامك بمثالية مفرطه أنت مش قادر توصلها، كمان لازم تكون فاهم نفسك كويس وعارف أنت عايز أيه وأيه اللي يناسبك، ومهم أوووي تعرف أن مفيش شخصيتين على وجه الأرض متفقين في كل حاجه أكيد هيختلفوا في بعض الحاجات، ومفيش شخصية مفيهاش عيوب…. ايوه حتى أنت فيك عيوب فلازم تفهم أن الحب الحقيقي هو اللي بيستوعب العيوب ويسامح على الأخطاء ويساعد اللي بيحبه على التغيير، لو قدرت تستوعب وتنفذ الحاجات دي هتضمن انك هتعرف تقدم وتستقبل حب حقيقي… حب من غير شروط، ولو عايز تتعلم الحب ده بجد بص على حب ربنا لينا، الحب اللي بيقدم بدون مقابل بيحب بدون قيود أو شروط بيحب حب ثابت مش بيتغير، لو قدرت تدرك حب ربنا وتستقبله هتعرف تقدمه وتستقبله من الأخرين.