تحياتى لجميع الأعضاء
أولا سؤالى مش عشان اقول لكم "انتوا ليه مش بتؤمنوا بمحمد" ولا عشان اتحداكم و اقول لكم "انتوا على خطأ"، و دول قصتين عن نقاشات ليا يدلوا على كلامى:
1- كان واحد مسلم بيحكى و بيقول انه سأل واحد مسيحي عن التصليب "يعنى الحركة اللى بيعملها المسيحين فى الصلاة" رد قال له لأن المسيح اتصلب، المسلم قال له امال لو كان المسيح مات على الخازوق كنتوا هتعملوا الحركة ازاى، قام المسيحي شتمه و مشى. ردى انا على الموضوع ده: طب ما أنتوا "كمسلمين" لما بتحجوا بتحدفوا الهوا بالطوب و تقولوا "احنا بنحدف الشيطان بالطوب" و بتفضلوا تجروا عشان واحدة ست كانت بتجرى "بتهرول" طب زعلانين ليه من المسيحيين مش فاهم.
2-نقطة تانية التناقض لما يقول لى واحد النصارى منقتلهمش و منهينهمش عشان ربنا و النبى اوصونا بهم خيرا برضو و فى نفس الوقت يعتبر المسيحيين مشركين، طب ازاى يا عم ؟ طب امال ازاى فى القران بيقول ان اللى بيعمل منهم خير هيروح الجنة ؟ يقول لى دول المسيحيين اللى بجد اللى هما مش بيؤمنوا بالتثليث، على الرغم ان مفيش مسيحي مش بيؤمن بالتثليث. يعنى بكل بساطة المسلم بيناقض نفسه، و طالما اعتبر المسيحيين مشركين يبقى تسرى عليهم كل احكام الاسلام على المشركين. فأنا بقول ده ف وشهم (كمسلم بيتناقش مع مسلمين)
مش معنى انى جاى من خلفية اسلامية انى جاى اتحداكم، أنا ممكن أكون اعتنقت المسيحية بالكلام لكن مش بالعقل و القلب عشان كدة بسألكم عشان ايمانى يبقى صح و عشان لما اسمع سؤال زى ده ما يتزعزعش ايمانى بالمسيح.
و كمان لأنى غير واثق بأى شئ، والموضوع كبير بالنسبة لى لأن ده موضوع خلاص و جنة و نار مافهوش تهريج.
السؤال هو:
اذا كان المسيح هو من اتم الرسالة الالهية و لا تحتاج البشرية لرسول اخر، لماذا تؤمنوا ببولس أنه رسول وهو أتى بعد المسيح ؟
