خالد منتصر فى رساله جريئه الى شيخ الازهر فضيلتك غلطت في العنوان الملحدين مش هما اللي طردوا المسيحيين م العريش ولا هما اللي فجروا البطرسية
على خلفية تصريح شيخ الازهر بأن الملحدين هم من يقفون وراء الهجوم على الاسلام اتهامه بالعنف و الارهاب و ربط ذلك بدعوات تجديد الخطاب الدينى و تحذيره لقيادات الدين المسيحى و اليهودى بانهم يوما ما سيلاقون نفس الهجوم و يذكرونهم بالحروب الصليبيه
على خلفية تلك التصريحات المثيره للجدل و من خلال صفحته الشخصيه على الفيسبوك ارسل خالد منتصر تلك الكلمات الجريئه الى الدكتور الطيب شيخ الازهر حيث كتب :
" رسالة الي الامام الاكبر الشيخ الجليل ،فضيلتك غلطت في العنوان الملحدين مش هما اللي طردوا المسيحيين م العريش ولا هما اللي فجروا البطرسية ولا هما اللي اغتالوا هشام بركات ولا هما اللي حاولوا اغتيال علي جمعه !!، الملحدين مش هما اللي بيدهسوا بالتريللات في نيس والمانيا وبيفجروا ملاهي في اسطنبول وامريكا وبيقتلوا رسامين كاريكاتير وكتاب ومخرجين سينما وناس عاديين وشرطه وجيش ، الملحد مارفعش سكينة علي رقبة قبطي في ليبيا ولا دبح الشيخ الدهبي واداله رصاصة في عينه ولا قتل رئيس الجمهورية في عيد نصره ولا ضرب رشاشات في صلاة عيد أضحي في أسيوط وحصد أرواح سبعين بني ادم برئ!! الملحد ماحرقش الكساسبه ولا رمي واحد من قمة جبل ولا أكل كبده في سوريا !!... صدقني يافضيلة الامام وباقولهالك بجد ياريت تركز مجهودك علي المجرمين الحقيقيين مش اللي بيعرضهم علي حضرتك مستشارك المفضل .. خلق عدو وهمي اسمه الملحد عدو الاله تضييع وقت وتنشين علي هدف مش موجود أصلاً علي لوحة التنشين ..الملحد في مصر غلبان مابيجيلوش ريالات ولا دراهم ولا دولارات لايملك الا كي بورد مكسر ولاب توب مقشر ومخ بيسأل .. اذا كانت أسئلته بتزعج معاليك سد ودانك ادعي عليه ربنا يسخطه قرد ...الخ لكن صدقني ده مايعرفش يدبح كتكوت ميت !!! وهمسة في أذن حضرتك أنا فعلاً مش فاهم خوف فضيلتك من دعاء الملحد بموت الاله أستغفر الله العظيم ؟؟!! هل فضيلتك متصور ان ربنا بيستجيب لدعاء ملحد ابن ستين في سبعين !!! "
01 - 03 - 2017, 06:18 PM
العرض الشجري