دايما بنتكلم عن دور الأم في تربية البنات وننسى دور الأب. مع أهمية دور الأم في حياة بنتها علاقة الأب ببنته هي اللي بتساعدها تكون علاقة ناجحة في المستقبل. لو أهملت بنتك حتتعلم ان مالهاش قيمة وان عادي ان جوزها في المستقبل ما يهتمش بيها. العكس صحيح لو دلعت بنتك حتتفكر ان دي الطريقة اللي لازم جوزها يعاملها بيها ولو ده حصل حتلاقي اللي يدلعها فين في الزمن ده.
عود بنتك على انها شخصية مستقلة ولها كيانها الخاص. ربيها على انها تستمتع بوقتها لوحدها وتستمتع بوقتها في صحبتك لأن ده حيعلمها الحدود الشخصية. ادي لها فرصة تتناقش معاك وخد رأيها لأن ده بيعلمها انها تفكر لنفسها. خليك عادل في معاملتك لها ومعاملتك لأبنك زي ما هو بيشيل اسمك هي كمان بتشيل اسمك. اهتم بدراستها واعمل وقت تسمع لها فيه. خصص وقت لبنتك لوحدها معاك عشان لو بتشوفك بتاخد اخوها الجامع حتغير وحتتفكر ان مادام في حاجات بينكم مشتركة اكتر يبقى أنت بتحبه اكتر. الوقت اللي بنخصصه لاولادنا أهم من أي هدايا. أنا لما بافكر في والدي بافتكر ازاي انه كام بيحكي لنا حكايات قبل النوم مش بافتكر لعبة جابها لي. لو عند بنتك هواية كون أول مشجع ليها حتى لو هوايتها مش نفس هواياتك. خليها تاخد قرارات صغيرة وناقش معاها نتيجة القرارات لأنها لازم تتعلم تحمل المسؤولية.
لو انفصلت عن امها يبقى لازم تشوف انك لسه بتحترم امها كأنسان وخليها ما تستمعش منك إلا كلام حلو في حق امها. اكبر غلط ممكن تعمله لو سبت اولادك بعد الطلاق لأنهم حيمروا بأزمة الطلاق زيكم بالضبط. أهم حاجة في تربية بنتك انها تشوفك بتحترم امها وتراعي ربنا فيها لأن اللي حتشوفه في بيتك هو اللي حتتوقعه في حياتها.
أنت مش بنك لعيلتك أنت رب الأسرة احتويهم الأمان مش أمان مادي وبس.
17 - 02 - 2017, 09:45 AM
العرض الشجري